Dalam nan, cakrok du lịch sinh thái bein hu thau lac lac gah ngak mbang praong dang akaok. Kadha vak: Long Khánh: Patagok bruk ngak nong đô thị di Ngọc Liên angaok Báo Đồng Nai. 

Tal urak ini, ban Long Khánh hu mboh rilo bruk, rilo urang nong ngak mbang naih joi, urang nong khang hatai buh jien tame cakrok dom bruk ngak nong, abih di nyu lac ngak nong ilamu glaong, patagok du lịch sinh thái bein. Pagap yau ong Triệu Văn Quang (daok di xã Bình Lộc) lac sa dalam dom urang nong oh lac jak jeng dalam bruk pala, ngak, bo daok hu ba bruk ngak ka rilo urang ngak dalam palei.

Urak ini, labik ngak bimao di sang ong Quang bhian hu 30 urang ngak bruk tani tanat saong 15 tal 20 urang ngak tui bilan haong yaom jien bilan meng 6-7 triệu đồng sa urang sa bilan. Ong Quang lac kreih camin hadah pakat negar di ban Long Khánh ka bruk ngak mbang naih joi.

Dalam danak dak padang ngak palei pala bahrau di tỉnh tukvak 2020-2025 brei thau, urang nong lac pasak dalam padang ngak palei pala bahrau paglaong, palei pala bahrau kiểu mẫu…, saong sa dalam dom bruk praong lac cakrok ngak nong hữu cơ, ngak nong pandar ilamu glaong tui jalan ngak tabiak pandap pablei, kak haong darak pasar pablei pandap, ilamu chế biến sâu kaya nong saong dom dịch vụ ngak nong piah paglaong yaom saong patagok khang kajap...

Tui jalan peih ngak dom bruk praong di tỉnh, ban Long Khánh hu padang ngak, patagok rilo bruk ngak mbang kapul nyaom dalam ngak nong, salih bahrau saong paglaong kein laba dom bruk tư vấn, daong ba, pato pakai bruk ngak ka urang nong cakrok bruk ngak mbang, pablei salih. Urang nong hu daong brei mesraiy phun jien piah ngak mbang, ba ilamu kỹ thuật tame bruk ngak. Hu thau, dalam vaktu 2018-2023, Kapul urang ngak nong ban Long Khánh hu daong ka jaik 400 sang hu mesraiy phun jien abih tih jaik 17 tỷ đồng, yaok ratuh urang ngak hu bruk ngak tani tanat.

Abih di nyu lac, dalam dom thun jaik ini, Long Khánh hu jeng labik du lịch sinh thái bein dane angan dalam saong langiu taneh ia. Yaok thun, ban Long Khánh dui pachreih hu yaok ratuh rabau mbang tuai mai ravang me-in bein, pataom rilo di dom labik dalam dom phường, xã yau: Bình Lộc, Hàng Gòn, Xuân Lập, Bảo Quang, Suối Tre… Dalam nan, harei pataom baoh kayau hu peih ngak di Long Khánh yaok thun, lac sa dalam dom kadha praong ngak jeng angan je ka Long Khánh.

Ong Đỗ Chánh Quang, Akok UBND TP.Long Khánh brei thau, piah hu dom baoh bingi saong pandap karei hu angan, langiu dom siam lagaih hu langik tasik alin hadiah brei, urang nong Long Khánh daok hu bruk tari taring, takre bac megru, samar thau ba dom ilamu kỹ thuật bahrau tame pala drak, daong ngak jeng labik angan pandap kaya nong karei ka Long Khánh.

Tal urak ini, taong abih taneh pala bahrau saong pala veik di ban hu pandar phun pajaih siam, chất lượng glaong, dalam nan hu labaih 100ha phun mbang baoh hu brei angan lac mek hu tanut chuẩn VietGAP. Urak ini, ban Long Khánh hu padang ngak saong hu công nhận 24 mã bhum pala dom janih phun mbang baoh haong taneh pala labaih 3 rabau ha, lac: durian, chôm chôm, panat, thanh long.

Langiu di nan, dom janih kaya nong yau: kruac bung kanduh hijao, bimao saong makhut, durian, sak mao kak kajap haong bhum taneh Long Khánh hu Cục Sở hữu trí tuệ (Mintri Khoa học-Công nghệ) brei harak tut angan nhãn hiệu saong  xác lập chỉ dẫn địa lý, ini lac prein khang piah pambuak seok ka angan kaya nong Long Khánh hu jalan nao tal dom labik karei dalam taneh ia./.