Dom harei jaik tet, sang saai Dương Đức Xuyên, ấp 3, xã Bình Lợi, huyện Bình Chánh, TP.HCM daok jar var cakak hala, sangka phun, papaok gha saong buh bingu mai tame chau piah pajeng nao pablei dom tinh, ban gah barak. Biak chreih chrai, bui sambai jang tuk hu rilo mikva urang nong sang jaik taphia tapa daong ka sang saai caga ka đơn hàng pablei nao aval.

Sang saai Xuyên lac sa dalam dom baoh sang urang ngak nong camriep abih salih janih phun pala, meng pala padai, tabau ba akaok tapa pala bingu mai saong ngak jeng palei mai praong abih di ban raya ini. Meng 2.600m2 taneh hu amaik ame brei piah padang mbang ngui, hadei di 20 thun meng plaak tangin di drei, tal urak ini, hu tagok labaih 16ha mblang taneh pala bingu mai kanjik, hu jeng sa dalam dom bein bingu mai praong abih di pak ini. Saai Xuyên khan lac, yaok phun mai kanjik hu pablei tabiak oh lac ndung bak ilamo di po bein bo nan daok lac ilamo meng kan, bruk sa tangin haong gauk di dom po bein. Langiu di bruk daong gah ilamo di kanja palei, urang pala bingu mai Bình Lợi bhian khan brei gauk thau bruk darak pasa, daong gauk gah phun jien piah ba gauk cak rok patagok. Saai Xuyên brei thau: “Tuk camriep bahrau peih bruk ngak mbang oh hu labik masaiy jien, ka oh hu pambuak haong gilang paraik ye njauk nao nyim sraiy saong hu mikva daong. Tuk nan, abih janih jeng pah abih, meng taneh pah blaoh pah gam urang ngak. Blaoh anak hatai caong di darak pasa glaong jang, phun gheih mekre meng pablei hu, ye drei njauk nao bac megru ye hu pato tacei meng dom saai, dom cei”.  

Mblang taneh Palei mai Bình Lợi, urak ini tagok biak praong, labaih 520ha haong yaok ratuh sang urang nong, sang bein, hu jeng labik pala mai kanjik praong abih di Việt Nam urak ini. Di bhum gah maraong negar, rilo tinh, ban jaik taphia yau ye Long An, Bình Dương, Tiền Giang… mblang taneh pala bingu mai jeng tagok khang dalam dom thun jaik di ini. Tui amuk Phan Thị Thanh Công, Akaok Kapul urang ngak nong xã Bình Lợi, yaom lac daok gaok rilo kan kandah min bingu mai kanjik angan Bình Lợi urak ini jeng hu urang blei tani tanat. Rilo sang bein khik tani tanat đơn hàng meng nan mai meng hu pambuak gauk lavik thun. “Langiu prein di urang ngak nong saong bruk mayaih khan di kapul, jang yau bruk ieu daong ka jalan pablei tabiak, ye sang bein, dom urang dalam HTX mai kanjik Bình Lợi jeng ba tangin tame haong kapul urang ngak nong ngak tabiak dom pandap hu chat luong, pabak hu ka darak pasa, bruk siam makre di abih lac rahra po bein hu ngak jeng angan je ka palei mai Bình Lợi”

Di xã Bình Lợi, huyện Bình Chánh, TP.HCM, angan je bingu mai kanjik ini daok kak kajap haong dom pajaih mai đột biến, mai biak rilo bingu, mai bonsai tok hu di pak ini. Bruk karei ini daok lac prein khang piah khik takai urang mai blei, daong ka po bein hu jien mek tame tani tanat piah kuhria ka raidiuk luac thun di urang ngak nong. Ong Nguyễn Phạm Minh Giảng, Akaok UBND xã Bình Lợi, huyện Bình Chánh, TP.HCM brei thau: “Urak ini, UBND huyện Bình Chánh hu ba tabiak danak dak cak rok patagok du lịch sinh thái dalam nan hu pilih ruah bruk ngak du lich pambuak haong phun mai kanjik piah daong ka gah ngak nong hu jalan cak rok patagok veik dom gah cak rok patagok karei veik. Huyện Bình Chánh daok peih ngak, jang yau ba tabiak veik dom danak dak sit cambaih jang piah ngak tabiak dom labik du lich pambuak haong phun mai”.

Kan kandah di bruk kinh te di darak pasa, bingu mai kanjik dalam tuk tet jeng pambak tal lac oh sit. Dalam tuk rilo po bein nao grauk labik piah duah jalan pablei pandap, plaih nyaih bruk oh pablei hu, ye sang bein pak Bình Lợi jeng daok kham marat ngak brei tani tanat ka darak pasa phun mai meng bruk sa tangin haong gauk pambuak kajap jang talei pambuak gauk dalam bruk duah jalan pablei tabiak, klah rabha sa binah darak pasa, piah ba gauk yam tapa kan kandah, ba bilan xuan di gah maraong negar nao tal grauk labik dalam taneh ia./.