Long Hưng lac “labik bhong” di tỉnh Tiền Giang. Di baha Long Hưng, dalam melam 23-11-1940, karja cách mạng tỉnh Mỹ Tho (urak ini lac tỉnh Tiền Giang) hu padang tagok saong peih bruk mít tinh hu labaih 3.000 menuac mai hu mbaok di baha Long Hưng piah tabiak mbaok bhap bini. Di pak ini, mbang camereip abih hala dok bhong patuk kanjik hu mboh di angaok jhung phun bàng anak baha, haong băng rôn hu tual tagok haong talei akhar haroh lac "Việt Nam Dân chủ Cộng hòa quốc" saong rah tabiak bruk khởi nghĩa Nam kỳ camereip abih, yava dane kayua amuk Nguyễn Thị Thập – Akaok Kapul urang kumei Việt Nam, jeng lac urang anek naih gheih di palei Long Hưng dang tabiak pan akaok ba jalan. Thun 1995, baha Long Hưng hu Mintri Ilamu – Brei thau (urak ini, lac Mintri Ilamu-Thể thao saong Du lịch) dak angan Inem krung sajarah cách mạng pakat negar. Baha Long Hưng harei ini, lac sa dalam dom labik dui pachreih tuai damuai atah jaik mai ravang iek. Sa-ai Lê Thị Huyền Trang hu 7 thun ngak thuyết minh di labik inem krung baha Long Hưng khan lac: "Adei mboh biak uan tabuan tuk hu ngak bruk di labik inem krung ini piah pabak bruk "menyum ia hadar halau ia" ka rairah harei ini saong harei hadei".

Patagok bruk gheih ghang di khởi nghĩa Nam Kỳ 1940, urang jakar, urang đảng saong bhap bini xã Long Hưng hu buh prein, sa hatung hatian haong gauk kham merat ngak mbang, pala drak, jhul kadun likuk eik lipa, kathaot rambah. Pagap yau sang amuk Nguyễn Thị Nở, urang ngak nong daok di palei Long Bình B, xã Long Hưng meng dua plaak tangik saoh urak ini jeng kaya meda meng kak kajap 30 thun haong bruk raong pabui. Labik raong pabui di amuk Nở tuk halei jeng hu labaih 100 drei, yaok thun pablei jaik 20 tấn pabui ralow: “Urak ini yaom pabui yau ini, lac diuk hu, yaom 60 rabau đồng sa kg ye urang raong diuk hu, oh daok glaih glar tra. Anak tal bo hu yau ini, bhap bini drei biak sahnang hatai, cakrok patagok hu. Di pak ini, raong pabui biak siam, var raong pabui rilo nan ye pacang sre veik, jaik tame jit di bilan 8 ye yaok adit pruh jru sa mbang piah pacang caga jit".

Đảng bộ, karja saong bhap bini Long Hưng daok yam tagok dalam bruk ngak mbang, pala drak, dak padang puk paga siam mekre, kaya meda. Tal urak ini, mbaok meta bhum palei ini hu salih bahrau: taong abih sang rahra hu pandar ia hacih, taong abih jalan xã, jalan palei hu tuh nhựa lagaih ka bruk nao mai, pajeng ba pandap panda di bhap bini. Ribaong Nguyễn Tấn Thành cakak xã Long Hưng urak ini hu tatua bê tông pambuak dua gah takai ribaong; bilai y tế, dom sang bac hu padang ngak siam mekre, khang kajap.

Urak ini, huyện Châu Thành daok buh jien tabiak ngak, peih praong jalan huyện 34 pambuak meng jalan roya 1 tal xã Long Hưng, peih jalan ka gah du lịch pak ini cakrok patagok. Long Hưng daok ngak pasiam saong paglaong dom tanut di xã palei pala bahrau piah tal thun 2026 mek hu chuẩn xã palei pala bahrau paglaong. Ong Ngô Văn Nhỏ, Bí thư Đảng ủy xã Long Hưng daok brei thau lac: "Đảng bộ, karja saong bhap bini pataom tame peih ngak dom tiêu chí piah hu pakat angaok pok brei angan lac xã palei pala bahrau paglaong. Meng nan, patagok jalan mbak, kraong ribaong ba raidiuk bhap bini glaong tagok, patrun patakik sang kan kathaot, patagok parilo sang kaya meda. Karja jak ba bhap bini pala dom janih phun hu năng suất glaong, raong dom janih hu yaom kinh tế glaong, tal urak ini raidiuk hu samu saong bhap bini dalam xã".

Gam haong dom bhum palei cách mạng karei karei di tỉnh Tiền Giang, xã Long Hưng harei ini hu mbeik drei yam tagok, raidiuk bhap bini saong sang sarak karja hu tani tanat saong cakrok patagok. Đảng bộ saong bhap bini pak ini hu patagok ilamu meng kan anit ranam taneh ia di menuac sia palei Nam Kỳ Khởi nghĩa, daok dak padang bhum palei ini dak harei dak salih bharau jang./.