Adat pilih ruah, ngak ka dom sang bac oh caga dahlau hu, anek saih jeng haduh hatai

Tiến sĩ Nguyễn Trung Nhân - Akaok Jabat pato magru, Sang bac Đại học Công nghiệp TP.HCM brei thau lac, mbang pilih ruah meng blaoh, dom sang bac gaok rilo kan kandah. Pagap yau, adat pilih ruah thun 2022 tacei lac brei ba tabiak cambaih chỉ tiêu tui gah, dalam tuk dom anek saih bhian tui jalan tut angan tame dom gah biak rilo, dom gah biak takik nan ye pilih ruah oh ginup tui jalan ba tabiak lac sa kan kandah praong, abih di nyu nan lac ngan haong dom sang bac hu pato rilo gah. Langiu di nan, kayua ini lac thun camriep salih jalan pilih ruah lọc ảo nan ye jeng ngak ka dom sang bac kan kuhria mboh dahlau dom anek saih hu pilih ruah. Piah ka mbang pilih ruah thun hadei hu peih tabiak dalam siam lagaih, TS Nguyễn Trung Nhân hu panuac caong, Mintri pato magru brei hu adat pilih ruah tani tanat piah ka dom sang bac tui nan bo patabiak, padang dom adat pilih ruah ka yaok sang bac:“Kol dahlak caong khin cập nhật mbuan jang, takik jang piah ka dom sang bac dalam tuk langyah dom dữ liệu jeng tani tanat. Abih di nyu nan lac dom anek saih jeng mbuan tut angan tame saong buh jien lệ phí.”

Ong Trịnh Hữu Chung, Phó akaok sang bac Đại học Gia Định jeng mboh lac, bruk patabiak adat pilih ruah biak suai ngak ka dom sang bac oh caga dahlau hu dalam bruk pambuak haong dom sang bac THPT piah pathau khan jalan pilih ruah, meng nan caik ka anek saih meda pilih ruah aval jang. Bruk lọc ảo pandar ka taong abih dom jalan ngak lac oh lagaih, kayua yaok sang bac hu meng 3-5 jalan pilih ruah, dalam nan hu dom jalan pilih ruah karei di yaok sang bac. Piah plaih rahtabiak rilo tavak tavaiy dalam gah kỹ thuật tuk lọc ảo, njauk halei oh Mintri pato magru tok pandar kết quả pacacah yau yaok thun saong jao veik quyen pilih ruah ka dom sang bac đại học.

Tui TS Nguyễn Đức Nghĩa, dahlau daih ngak Phó Yam ndok Đại học Quốc gia TP.HCM, mbang pilih ruah thun 2022 hu dom adat pambuak tal bruk pilih ruah lọc ảo di taong abih dom jalan pilih ruah, yaok anek saih tok hu pilih ruah sa nguyện vọng duy nhất. Thun ini, jeng daok hu bruk lac anek saih tuh tame pilih ruah dom sang bac, dom gah atau tuh tame sa jalan pilih ruah. Tui kuhria mboh tuk camriep, anek saih tut angan tui hatai caong di drei tame đại học lac 940.000. Min hadei di mbang pakacah tamat THPT, dom anek saih ini daok veik jaik 620.000. Saong puac abih tuk pilih ruah lọc ảo di mangaok hệ thống daok jaik 570.000 adei hu pilih ruah, tỷ lệ ảo jeng daok biak glaong. Rilo sang bac đại học njauk pilih ruah pabak meng di tuk tamat mbang pilih ruah ka 1. Thun ini, dom adat pilih ruah salih karei biak rilo, brei mboh di bruk anek saih njauk tut angan pilih ruah tame đại học tal 4 mbang. Dom adat pilih ruah patabiak biak suai damuai, dalam tuk jalan pilih ruah aval di dom sang bac hu ba tabiak dahlau di nan 3 bilan. Harei tame bac di anek saih jeng suai jang dut saong dom thun dahlau jaik 1 bilan ngak kan kandah oh takik tal danak dak thun bac di dom sang bac. TS Nguyễn Đức Nghĩa, lac:“Tui adat hu vak dalam quy chế thun 2022, meng thun 2023 langiu di bruk brei thau bruk pilih ruah di sang bac yau yaok thun, dom sang bac đại học brei ba tabiak dom adat pilih ruah di sang bac di drei. Yau nan, Mintri pato magru njauk samar brei thau adat pilih ruah thun 2023, abih di nyu nan lac dom adat hu pambuak tal bruk ba tabiak ngak dom quy chế. Dom sang bac meda rami ramik dom adat pilih ruah di drei ka nyu lagaih. Langiu di nan, dom adat pilih ruah jeng njauk ngak ka nyu mbuan jang jhui kan kandah lo.”

Tui maong mboh di dom urang ilamu ka bruk pilih ruah anek saih lac thun 2022, Mintri pato magru patabiak adat pilih ruah biak suai ba tal rilo tavak tavaiy ka sang bac, jang yau ka dom anek saih. Kayua yau nan ye, piah ka mbang pilih ruah thun 2023 saong dom thun hadei hu mbuan lagaih, Mintri njauk samar patabiak dom adat, jang yau khik tani tanat, suai lavik./.

Urang lang: Thu Thao – 18/10