Sở jalan mbak pajeng ba Ban raya HCM brei thau, langiu di sa labik daok hu ngak tui jalan BT, ban raya daok caong hu veik labaih 30.000 tỷ đồng piah peih ngak 3 jalan daok veik, atah abih tih 11,3 km piah pambuak abih jalan Vành đai 2 dalam tukvak meng ini tal thun 2030. Jalan Vành đai 2 Ban raya HCM atah labaih 64 km, praong 6 tal 10 jalan radaih, mbiah tal ini hu ba tame pandar labaih 50 km, daok 14 km ngak oh ka salah, parabha jeng 4 labik.

Meng akaok thun tal ini, Mban Bangsa tỉnh Trà Vinh hu pambuak haong dom so, dom mban, dom gah peih bruk pathau khan ka jaik 3.500 urang hu angan je, dom urang pan akaok dom paha saong Mban khik ramik di 143 paha Khmer; urang jakar, công chức, viên chức dalam dom jabat ngak bruk bangsa. Asal kadha pathau khan pambuak tal sarak bangsa, danak dak bruk ngak negar ka bruk cak rok patagok kinh tế - xã hội bhum bangsa takik tukvak 2021 – 2030… Thun ini, Trà Vinh hu Trung ương buh jien tame peih ngak 3 Danak dak bruk ngak negar ngan haong paok jien jaik 618 tỷ đồng. Tui kuhria tal puac thun ini meda peih jien brei hu labaih 440 tỷ đồng, samu 71% bruk tabiak.

Dom harei jiak  ini, urang ruak pandik meta bhong mai iek ruak saong taong ruak di dom sang iek ruak di ban Cần Thơ tagok rilo. Sang iek ruak Meta - Tagei - Mbaok  Ban Cần Thơ yaok harei taduan labaih 50 urang ruak pandik meta bhong, dalam nan hu rilo uranaih. Tui dom bac si, thun ini, ruak pandik meta bhong hu bruk lac njom mbak meng ban praong yau Hà Nội saong TPHCM mai dom tỉnh bhum taneran kraong Cuu Long rilo jang saong ruak jeng trak jang. Tuk langik hajan rilo saong tathak, ruak mbon njom mbak jeng jit.

Daok di tỉnh An Giang, 2 adit tapa, Sang iek ruak Sản Nhi hu taduan rilo urang ruak tangin takai cambuai. Dalam nan, hu oh takik dom urang ruak trak gam pandiak glaong, handaoh rup pabhap. Tui Sở Y tế An Giang, meng akaok thun tal ini, tỉnh hu labaih 2.640 urang ruak tangin takai cambuai, tagok 12% dut saong tukvak ini thun 2022. Bruk njauk duh hatai nan lac, hu 2 urang metai. Gah y tế khan lac, urak ini janih virus bahrau di ruak tangin takai cambuai hu jru mek khang jang, mbuan njom pambak, jeng trak saong ba tal metai biak glaong. Kayua yau nan ye, tuk mboh uranaih pandiak, pandik tarakaong, klak mbang amaik ame njauk samar drah ba ranaih nao tal labik y tế piah iek ruak saong taong ruak samar drah.       

Kapol khik iek glai saong pacang caga apui khuah, di Chi cục Khik iek glai tỉnh Cà Mau birau taduan saong raong ula klan kayua ong Lê Văn Lẹ (daok di puk 2, xã Trí Phải, huyện Thới Bình) ba mai. Ong Lẹ blei ula klan  di thun 2018 piah raong ma-in. Tuk nan klan trak 25kg, urak ini nyu praong trak labaih 67 kg, atah labaih 3m.  Tapa tukvak duah thau, ong Lẹ meng thau lac drei ula lac janih takik hu, njuak khik caga nan ye ba mai jao brei. Klan haluk di nyaom IIB, athur glai daok mbuan lahik, quý hiếm, daok dalam Tapuk bhong Viet Nam. Urak ini, klan nan daok biak takik  kayua lahik labik daok saong njuak urang chap mek.

Urang pan akaok negar Triều Tiên Kim Jong-un hu nao tal ban Komsomolsk-on-Amur bhum viễn đông di Nga, hadei di nyaom biai pakat glaong haong Tổng thống Vladimir Putin. Tui hãng thông tấn TASS, urang pan akaok negar Triều Tiên Kim Jong-un hu gaok thống đốc bhum saong dom urang kanja karei di sang ga radaih apui di ban. Tui nan, ong hu nao tal Sang mac kapar haok Komsomolsk lac labik ngak tabiak dom sruh kapar haok mesuh gauk bahrau abih di Nga. Ini lac mbang nao rivang Nga ka dua saong lac mbang nao ravang negar langiu camriep abih di Akaok negar Triều Tiên hadei di labaih 4 thun.

Bang Kerala, gah Meraong Ấn Độ brei kareik pabah mbang dom sang bac, jabat ngak bruk saong radaih công cộng harei 13/9 piah pacang caga bruk njom mbak virus Nipah. Dom urang gah y te karja Ấn Độ brei thau, dua urang praong saong sa uranaih  njom ruak  daok taong  ruak di sang iek ruak. Labaih 700 urang hu mek darah dut iek virus Nipah, njom mbak kayua taom gaok ia labar di cim dhun, pabui atau urang njom ruak. Hu takik abih lac 706 urang, dalam nan hi 153 urang y tế, daok hu dut iek ruak piah pasang iek bruk njom mbak di virus.  

Labaih 6.800 urang di cư hu nao tal pulao Lampedusa di Italia tok dalam 24 maong, lac rilo jang dom menuac daok di kaoh pulao ini. Pulao Lampedusa di Địa Trung Hải lac labik tal camriep di dom urang di cư atau meng pak ini, dom urang ini meda nao veik gah Barak piah tal dom taneh ia châu Âu karei. Dahlau di nan, France saong Đức brei thau lac meda oh taduan dom urang di cư nao meng jalan tasik tapa bhum tasik Italia, yaom lac hu dom adat ka bruk tị nạn di Liên minh Châu Âu.