Di mbang taom gaok Kapul “Cháu ngoan Wa Hồ” lac dom anek saih bac naih, chỉ huy đội joi dom pakat di tỉnh Bình Dương rah tabiak di dah page harei ini (30/8) di Jabat Akaok negar, amuk Võ Thị Ánh Xuân, Phó Akaok negar brei thau lac, Đảng, Kanja saong rahra drei tuk halei jeng caik dom hatai anit ranam, bruk sangka biak praong tal bruk iek glang, khik caga saong pato pakai dam dara, uranaih, tuk halei jeng palagaih ka dom adei hu labik bac daa, pasram ilamo, pasram rup pabhap, jeng rahra hu jalan diukrai siam mekre tuk dom adei praong tagok. Phó akaok negar ieu kakei tỉnh Bình Dương patui veik sangka tal, caik dom bruk siam di abih piah sangka dom adei uranaih hu praong tagok. Gam tui di nan jeng sangka rilo jang tal dom anek mbik di urang ngak di dom tinh, ban karei mai ngak, dom uranaih di dom labik ngak kong, bhum atah biyar jeng hu sangka, bac taa.

Uan bilan Vu lan - Báo hiếu Phật lịch 2567, mBan khik iek Nam Thành Thánh thất (đạo Cao đài) pambuak bruk haong kapul iek glang prein yava bhap bini Việt Nam pakat negar (Jabat gah meraong negar) haong kapul Chữ Thập đỏ Quận 1, TPHCM bahrau alin hadiah 300 pok pandap brei ka urang jaoh jo, urang sang kan kandah daok dalam Quận. Ini jeng lac bruk ngak siam tui jalan anit ranam gauk, daong ba gauk, hala siam pacang hala tahak, brei mboh bruk siam mekre di dom agama dalam bilan lễ Vu lan. Hu thau, dalam bilan Vu Lan báo hiếu thun ini, di dom baoh baha, labik tự viện Phật giáo di TP.HCM jeng hu rilo bruk ngak pahla, daong ka urang kan kathaot, urang gaok kan kandah dalam raidiuk.

Dalam dom harei ini, di dom paha, tu viện di tỉnh Tiền Giang jeng hu peih dom danak dak uan harei Vu Lan. Ini lac bruk ilamo di Phật Giáo brei mboh hatai anit ranam, thau dhar phol amaik ame. Rilo paha, tự viện daok hu danak dak “rao takai thau dhal phol” amaik ame di bilan Vu lan - thau dhar phol amaik ame; alin pandap ka dom baoh sang kan kathaot. Abih di nyu nan lac di paha Liên Hoa (huyện Chợ Gạo) hu rilo bruk ngak hu makna yau ye alin pandap ka rahra, anek saih kan kathaot di akaok thun bac bahrau, palao pajaih kaya iakan trun kraong Tiền, peih danak dak daoh tamua Vu Lan thau dhar phol amaik ame.

Kayua abih bilan paik baoh nan ye baoh durian di tỉnh Tiền Giang daok tagok yaom, tagok tal labaih 90 rabau đồng/kg. Urak ini, urang ngak bein di tỉnh Tiền Giang daok kham merat iek glang bein durian tui dom jalan ilamu bahrau, buh khak, pruh jru siam lagaih piah ka phun tabiak bingu, ndam baoh rilo. Kayau baoh durian hu labik pablei mbuan lagaih, nan ye taneh pala durian di Tiền Giang gam gam tagok. Dalam tỉnh urak ini hu labaih 20.000 ha phun durian, dang akaok gah taneh pala duk haong dom janih baoh kayau karei dalam tỉnh. Thun blaoh, baoh durian yaom 80 rabau  đồng/kg, urang pala hu laba labaih 1 tỷ đồng yaok ha.

Sang iek ruak Chợ Rẫy bahrau tabiak panuac kakei pambuak tal khau tin tut angan ngak harak thẻ alin tung pruac pak sang iek ruak njauk lahik jien ngak lac 500 ribau đồng. Gam haong nan lac mek thoat tin nhắn hu asal kadha “cò di sang iek ruak taduan daong ngak 500.000 đồng”. Sang iek ruak Chợ Rẫy samar drah kakei tal rahra lac khau tin nan piah pacang caga dom kol kanjak jhak pambak tame bruk tut angan alin tung pruac piah mek kein laba ka drei. Sang iek ruak brei thau lac bruk ba tabiak harak the tut angan alin tung pruac di pak ini lac oh lahik jien.

Urang pan akaok Triều Tiên lac Kim Jong-un hu panuac ieu patagok prein khang lin tasik di taneh ia ini tuk Mỹ, Japon saong Hàn Quốc peih dom bruk pasram mesruh haong gauk. Ong Kim Jong-un hu panuac lac Mỹ daok ngak brei bhum tasik jaik Triều Tiên jeng “bhum tasik srau kadau di abih”, mbuan hu mesruh metak hạt nhân. Saong daok hu ndom lac, bruk di urak ini ngak ka lin tasik Triều Tiên brei khik bruk caga mesruh, salih bahrau phao ndao saong pandap mesruh, saong lin tasik Triều Tiên lac sa binah oh kurang hu dalam bruk mesruh hạt nhân di taneh ia.

Urang peih kapar haok Sultan Alneyadi di dom Tiểu vương quốc A-rập thống nhất (UAE) meda mai gilac baoh taneh di puac adit ini, hadei di tuk ngak salah bruk dui atah 6 bilan di mangaok Bilai vũ trụ dunya (ISS). Dalam bruk ngak di mangaok langik mbang ini, urang phi hành gia Alneyadi hu mbaok tame labaih 200 bruk ngak iek ilamo dalam rilo gah, dalam nan hu di truyền thực vật saong ilamo raidiuk di anek manuac. Saai Alneyadi hu jeng rahra A-rập camriep abih nao takai di mangaok langik tuk ngak bruk di mangaok Bilai Vũ trụ Dunya (ISS).

Tui yaok pataom di Pasak pasang iek saong Pacang caga jit ruak Mỹ (CDC), dom menuac tame sang iek ruak kayua Covid-19 di taneh ia ini daok tagok gam gam dalam 6 adit blaoh. Tui harak gar di Pasak pasang iek saong Pacang caga jit ruak Mỹ brei mboh EG.5 lac biến thể hu mbaok rilo abih dalam dom urang ruak Covid-19 di Mỹ, meblah labaih 20,6%. Urak ini daok sa biến thể bahrau hu duah mboh lac BA.2.86 saong hu 13 urang mboh hu di dunya, dalam nan hu 3 urang di Mỹ. Tui dom chuyên gia y tế, biến thể bahrau ini, hu prein njaom mbak samar jang min urak ini, oh ka mboh lac nyu ba tal ruak trak damak.