Kadha vak hu angan “Mbaok meta bahrau di xã anh hùng Hà Đông” di Hoàng Qui, urang vak di Rayo sap ndom Viet Nam daok di Tây Nguyên brei thau ka bruk nan.

 Bilan paik cà phê 2022 salah bloh, dom sruh radaih pajeng kaya nong jeng daok patui gauk nduac tapa tatua Kon Ma Har pajeng ba mikva tagok apuh ramik phun, cakak dhan saong pajeng mai sang dom mbao cà phê puac vụ. Sa-ai Đinh Nhưc, umo 35 thun, daok di palei Kon Ma Har, xã Hà Đông bui sambai khan lac, meng hu mbaik tatua bahrau ngak di thun 2020, ginup ka 2 sruh radaih pajeng kaya nong plaih gauk, daong ka mikva 5 palei nao mai mbuan lagaih, pajeng ba pandap panda jeng hu mbuan laghaih jang:  “Meng tuk hu mbaik tatua bahrau ini, bruk nao mai, pajeng ba kaya nong di mikva hu mbuan laghaih, bruk nao mai di mikva, dom anek kamuan dalam palei nao bac jeng oh lahik rilo tukvak, jalan mbak hacih sa-at, ndua dhal phol Đảng saong Karja hu sangka tal labik daok gaok rilo kan kandah yau ini”

 Meng puk palei kan kathaot, dom baoh sang kathaot hu rilo saong bruk ngak nong sit sot, mikva dom palei Ba Na di xã Hà Đông hu thau pandar ilamu  khoa học tame dalam bruk pala cà phê, ngak padai aia, peih prong mblang bein phun mbang baoh… Oh takik urang nong hu jeng triệu phú. Yau sa-ai Đinh Hùng daok di palei Kon Sơ Nglok, umo 38 thun hu 4ha cà phê daok paik baoh pablei, 5ha phun keo, 3 ha phun hala bầu (sa janih phun mek kayau)  brei jien mek tame labaih 300 triệu đồng yaok thun. Meng baoh sang kan kathaot, tal thun 2019, Đinh Hùng hu jeng baoh sang ngak kinh tế naih jioy di xã. Sa-ai Đinh Hùng khan lac:  “dahlau diah drei jeng ngak nong min hadei di ini cak rok patagok phun cà phê hu pandar ilamu khoa học, ta-eng phun hala bầu drei daok hu karja palei sangka brei nao bac megru ilamu. Hadei di tuk pala dom janih phun ini mboh siam hu labik pablei tani tanat, nan ye drei jeng tacei pato mikva dalam palei cak rok patagok bruk ngak ini”

Taha palei Đinh Đăm, daok di palei Kon Sơ Nglok, xã Hà Đông brei thau, Hà Đông lac bhum căn cứ cách mạng, njauk mbom siu la-ua tayah, nan ye tuk halei jeng hu hatai kham merat yam tapa kan kandah, oh huac glaih glar gaok mai van klaak rup drei. Kayua yau nan ye, mikva meda patagok ilamu meng kan, pambuak haong đảng bộ, karja xã khang hatai padang ngak palei pala bahrau, cak rok patagok bruk ngak mbang kinh tế, paglaong rai diuk:  "Mikva patagok hatai saneng di bhum taneh cách mạng piah pataom tame ngak mbang pala drak, dak padang palei negar khang kajap. Hu bruk sangka di Đảng saong karja, dahlak saong mikva jia lac bhum taneh Hà Đông dak harei dak cak rok patagok, rai diuk di mikva bhap bani dak harei dak hu paglaong.”

Ong Hoàng Cam, Bí thư Đảng ủy xã Hà Đông brei thau:  "Xã daok pataom tame tut angan piah peih ngak danak dak pakat negar ka cak rok patagok kinh tế xã hội bhum urang bangsa takik jeng yau danak dak pakat negar patrun kathaot. Urak ini, daok hu dự án ramik veik ka nyu tani tanat labik daok, parabha veik bhap bani ka 5 puk palei, rami ramik labik daok bahrau".

Rai diuk di urang Ba Na daok di xã Hà Đông tal urak ini hu biak rilo salih bahrau dut haong tukvak dahlau diah, min oh ka mek hu jalan bruk bo Đảng bộ xã ba tabiak. Danak dak Bruk ngak negar ka padang ngak palei pala bahrau di xã jeng daok 10 chỉ tiêu tra caong khin ngak salah blaoh. Pakat ủy, karja xã saong huyện Đak Đoa hu ba tabiak rilo jalan ngak piah pasiam veik dom cuang kandah, jhul khang bruk cak rok patagok kinh tế di dom puk palei./.