Mblang kapal ahaok par Long Thành hu peih ngak mbang ka 1 meng bilan 1/2021, tui phun jien buh tame labaih 110.000 ty ndong kayua Taong Kongti Mblang kapal ahaok par Viet Nam (ACV) dang buh jien tame.

Caga tui kuhria, paok bruk dang ngak sang ga tuai damuai hu salah blaoh saong ba tame pandar dahlau si abih bilan 8/2025, paok dang ngak jalan brei papar tagok jeng ye pataok par trun di kapal ahaok brei blaoh dahlau di harei 30/4/2025, paok dang ngak jalan mbak pambuak brei blaoh dahlau bih bilan 12/2025 saong dom paok dang ngak karei brei salah blaoh dahlau bih bilan 8/2026.

Brei ka bruk praong glaong di danak dak mblang kapal ahaok par Long Thành, ong Nguyễn Trọng Nghĩa – Uy vien Mentri Chinh tri, Bi thu Trung uong Ndang, Akaok Mbang Tuyen giao Trung uong brei thau, ini lac sa danak dak pasak asal di negar, ieu lac sa bruk jak jeng di negar hadei di 40 thun salih bahrau. Tuk danak dak ba tame pandar nyu rik tame bruk cakraok patagok kinh te, biak hu makna angan praong dalam taong abih dom danak dak pablei salih saong dunya:  “Oh lac sa janih brei ka danak dak kinh te bhian blaoh nyu bo daok ieu lac sa bruk tuk Viet Nam daok yam tame jaman bahrau – jaman pok drei patagok. Bruk ba drei tame saong jhul khang kinh te lac sa dalam dom kein lagaih peih akaok meti ka jaman bahrau piah khol drei pok chaok papar tagok glaong”

Tui di gah bhum palei, mblang kapal ahaok par Long Thành jeng ieu lac sa dalam dom tapang gang hu angan makna, lac gah cakrok patagok bahrau di tinh Dong Nai. Ong Nguyễn Hữu Nguyên – Yam ndok Sở Kế hoạch saong Đầu tư tinh Dong Nai brei thau, Dong Nai caik hatai paglaong kein lagaih di bhum jaik taphia mblang kapal ahaok par piah daong prein cakrok patagok jeng ye ka tinh jeng ye brei ka abih di bhum Đông Nam bộ. Dalam nan, bruk padang jeng bhum palei ban mblang kapal ahaok par ieu lac brei padahlau di dalam bruk ngak patagok.

Langiu di nan asal kadha di ha tang jeng biak hu makna, piah ngak rilo abih hu siam lagaih di mblang kapal ahaok par Long Thành. Ong Nguyễn Hồng Lĩnh – Bi thu Tinh uy Dong Nai brei thau: Urak ini bruk njauk brei ngak dahlau nan lac jalan mbak pambuak tal mblang kapal ahaok par Long Thành. Rilo jalan vil di nan jeng daok hu peih ngak labik pabak hu hatai caong pajeng ba tuai damuai. Langiu di nan, tinh Dong Nai jeng sangka iek praong ka bruk pak danak dak ban mblang kapal ahaok par piah dui pachreih buh jien tame saong padang sa labik bandak mblang kapal ahaok par bahrau.

“Asal kadha ba tabiak ieu lac jalan mbak pambuak tal mblang kapal ahaok par Long Thành tal Ban raya Ho Chi Minh saong dom bhum jaik taphia meda oh pabak hu hatai caong. Urak ini Rajaei hu pato tacei peih dom jalan mbak pambuak lac brei ngak catang min tui kuhria mboh lac daok brei peih oh lac hu nyu ka njauk veik jalan mbak, do nan oh pabak hu hatai caong.”

Ong Lý Thành Phương sa urang kiến trúc – Akaok kapul Kiến trúc sư tinh Dong Nai brei thau, dom jalan mbak dalam bhum daok peih ngak min daok oh dak hu masa dak dalau. Tui ong Phương, danak dak padang ban mblang kapal ahaok par Long Thành hu ba tabiak asal kadha ka sang daok, labik pandaokpadeih padei, labik ngak kong tui pakat jammariak glaong, logistic jeng yau hu mblang hijao pok yam tal jalan ngak sinh thai, net zero: “Sa dalam dom asal kadha hu makna abih di mblang kapal ahaok par ieu lac logistic saong gah ngak kong piah duh pagam haong bruk di mblang kapal ahaok par. Daok jalan mbak ndo thi jeng brei mboh bruk jalan mbak ka rahra lac bruk asal pasak, dalam nan hu radaih buyt BRT saong jalan pasei njuel LRT.”

Mblang kapal ahaok par Long Thành daok ieu lac sa patau binguk bahrau, ba tui rilo hatai caong takre di dalam bruk jhul pachreih patagok di tinh Dong Nai jeng yau di dalam negar yam tame jaman cakrok patagok bahrau. Tuk peih ngak, mblang kapal ahaok par Long Thành brei dui pachreih dom gah buh jien tame dalam saong langiu negar, lac pasak logistic praong dalam bhum saong brei mboh hatai caong takre, hatai uak drei tagok khang kajap, brei mboh labik dang di drei, prein khang ka kinh te di taneh ia negar./.