Long Thành (Đồng Nai) daok di labik biak hu yaom - sa labik nao mai praong bhum klau kieng praong di kinh tế gah meraong. Ini lac labik hu taneh ginup prein pabak ka sa danak dak caong hu taneh praong labaih 25.000ha, dalam nan mblang kapal haoh meblah tal 5.000ha.

Long Thành urak ini oh daok thaot binguk di sa ban sit atah bayah. Salih tame nan, lac bruk pablei salih chreih chrai, patagok. Yaom taneh di labik ini tagok yaom tal having akaok. Kayua Long Thành daok jeng pasak di sa ban, anak tal meda lac ban pakat dunya, hu brei mboh meng mblang kapal haoh dunya, hu prein taduan raok 100 triệu tuai yaok thun – sa mblang kapal haoh praong abih di Việt Nam.

Pilih ruah Bình Sơn (Long Thành) ngak mblang kapal haoh lac pilih ruah hu  labik ameh ka nao mai, pablei salih. Mblang kapal haoh tok daok atah di ban raya HCM 40km nao gah timur; atah di pasak labik ngak kong Biên Hòa 30km nao gah Đông Nam; atah ban tasik Vũng Tàu 70km saong daok jaik taphia  jalan cao tốc TPHCM - Long Thành - Dầu Giây, sa labik pambuak gauk biak siam ka dom bruk nao mai, kinh tế, pablei salih, dịch vụ saong du lịch.

  Bruk brei padang mblang kapal haoh pakat dunya Long Thành brei mboh jalan maong praong, atah di dom urang pan akaok taneh ia, hu peih tabiak sa bruk salih bahrau khang ka patagok kinh tế harei hadei. Danak dak hu peih bruk padang ngak vaktu ka 1 harei 5-1-2021, tui kuhria hu ngak salah bloh di thun 2025. Tui quy hoạch, hadei di tuk ngak salah, mblang kapal haoh hu 4 jalan par tagok siam di abih, meda taduan raok dom janih kapal haoh 2 tal biak praong; 4 nhà ga siam di abih meda taduan raok 100 triệu tuai yaok thun (vaktu ka 1 lac 25 triệu tuai yaok thun)…

Yau nan min, jalan nao tal bruk padang ngak mblang kapal haoh Long Thành oh mbuan yau “1 pagam 1 jeng 2”. Jeng bak dalam dom hatai sahneng ka  mblang kapal haoh bahrau, dahlak hadar tal dom panuac phản biện di dom urang ilamu, biak abih hatai jai bo jalan ndom biai oh lac oh thuyết phục. Long Thành kan piah meriak gauk hu haong dom mblang kapal haoh praong hu meng lavik mai dalam bhum yau ye mblang kapal haoh Chek Lap Kok (Hồng Công), mblang kapal haoh Changi (Singapore), mblang kapal haoh Kuala Lumpur (Malaysia), mblang kapal haoh Suvarnabhumi (Bangkok, Thái Lan). Caong khin mblang kapal haoh Long Thành jeng mblang kapal haoh pajeng ba pakat dunya lac oh njauk haong bruk di anak meta saong bruk 100 triệu tuai yaok thun, tui kuhria mboh dahlau, jeng lac sa bruk kurang ilamu khoa học…Dom panuac phản biện abih hatung hatian di dom urang pan akaok, urang Quốc hội, chuyên gia hu sahneng kuhria, ndom biai nao mai biak tantu cambaih tui jalan ilamu khoa học. Bruk puac di abih hu ba tabiak. Blaoh harei ini, pak di labik ini, dahlak hu mboh sa danak dak hu kuhri kuhria dalam rilo thun, daok tabiak jeng mbaok meta. Labik ini oh lac taduan raok tuai dunya, labik padeih takai, nao tapa di dom mbang par di dom hãng kapal haoh, lac labik taduan mek, pajeng ba pandap panda dunya, bo daok lac labik pabak dịch vụ hàng không, pabak xăng menyek, pasiam kapal haoh ka dom hãng kapal haoh dunya saong Việt Nam...

Bruk di “drei ine girai bahrau” Long Thành nyu yau habar, oh ka thau. Min meda sahneng mboh hu dom salih bahrau di bhum taneh daok mbeik drei yam tapa piah hu jak jeng ini./.

Urang lang: M.Phuong - 3/8/2022