Dalam tuk jit kan kandah bruk ieu phone ka gauk gar jeng lac biak prong 

Meng tuk ong Yam ndok labik drei ngak peih bruk jak ba vak ka “VOV TPHCM – DOM HAREI BILAN DAOK DALAM PASAK JIT”, drei rilo mbang daok la tame bàn vak min oh vak truh. Hadar tal dom harei, bilan pandik harao nan, ia meta drei nyu haok tabiak oh pacang hu, dom hagait di anak meta nyu sabil veik abih, mbaok meta hadom menuac krein randap bo drei daok kanal cambaih meng sap ndom biai, tal sap klao bui sambai chreih chrai, gam haong dom bruk praong daok caong khin ngak, caong samar ngak hu, urak ini miat miat tabiak nao, klaak veik amaik ame, diuk anek, adei sa-ai, ayut sahabat…hadei di mbang jit praong Covid-19 nyu puh tapa dalam dom harei di bilan 7, bilan 8 thun 2021.

Jeng thau lac menuac sia drei daok di dunya ini, blaoh taha nao, blaoh ruak kik, blaoh metai nao, lac bruk oh thei plaih hu, min bruk metai lahik kayua jit, metai lahik dalam dom harei jit praong Covid ini, lac biak pandik harao. Dom urang umo daok ranaih, prein yava khang kadang, min kan suak yava dalam dom harei blaoh metai. Dalam nan, hu gauk gar di drei, dom menuac krein randap haong drei, patui gauk tabiak nao miat. Dalam labaih 6 rabau urang Cam daok di ban raya HCM ini, tuk tabung glaong, harei halei jeng hu urang tabiak nao mait miat. Hu harei dom urang. Thei jeng mboh huac, jeng mboh duh hatai. Thei jeng mboh cambaih bruk diuk haong metai lac biak jaik, biak lapih yau ngin yau sauk. Thei jeng likau haong po brei ka Covid-19 nyu jhui mai jaik drei haong gauk gar di drei.

Min Covid nyu oh neh rabha taha atau meda, hu atau oh hu ruak dahlau dalam rup, kaya meda atau kan kathaot, menuac hu angan je atau oh hu angan je…. Taong abih jeng meda njaom ruak saong metai. Hadar veik dom harei bilan nan, drei jeng daok mboh sru la-an.

Uan tagun po yaok dah mesup ndih tagok

Peih meta tabiak thau lac drei daok diuk di dunya,

Panuac ariya nan di urang cuak ariya angan Kahlil Gibran (1883-1931), dahlau daih drei bhian puac min oh ka thau hu abih makna dalam dalel di nyu, urak ini, drei meng mboh lac biak njauk. Nan lac haniem phul, lac bruk biak praong, biak hu yaom di abih bo menuac sia TP. Hồ Chí Minh tuk ini daok caong khin, tuk daok dalam pasak jit. Min oh njauk lac urang halei jeng hu bruk patuah jamo nan…

Ja adei likei di diuk kumei di drei, umo labaih 40 thun, khang yau kubao…..min hadei di dom harei pandiak, melam puac abih jeng daok ndom biai biak rilo, daok mbang, daok menyum hu, min tal saboh mesup ye ruak trak tagok. Ieu phone ka dom sang iek ruak piah ba adei nao, jeng taduan hu panuac javap jalei lac oh daok labik brei ka menuac ruak tame taong ruak. Tal jala harei nan, Sang iek ruak 115 meng hu labik saong brei radaih cấp cứu mai pajeng nao. Nan jeng lac sruh radaih puac abih di rai adei. Dom Bác sĩ brei thau, adei palang lahik dahlau di tuk tame tal Phòng Cấp cứu, saong Sang iek ruak lac adei njaom Covid nan ye khik meyit veik piah ba nao am, cuh.. Yau nan, lac adei tabiak nao bo oh sa panuac kakei halei dahlau di tuk metai, blaoh kandang joa ralai jeng bau. 

Bruk metai blaoh ba nao am jeng bau, ngak ka rilo urang Cam Islam mboh biak huac, biak duh hatai. Kayua tui hukum di urang Islam, menuac metai brei ba nao dar, ba nao kubo. Bruk am cuh menuac metai lac bruk oh brei ngak saong bruk nan meng dahlau mai oh ka bhian mboh.

Bruk pandik harao meng lahik ja adei likei daok trak cada, ye 6 harei hadei, tamaha kumei di drei palang kayua ruak taha. Ba amaik nao kubo dalam joa lange, oh hu puk paga mai haiy meyit nao, tok hu dom anek taco dalam sang. Mikva dalam hẽm daok njauk pacang veik nan ye oh hu urang halei tabiak haiy meyit. Dom anek taco dalam sang hong dom urang dalam kapul ngak pahla drur drui ba amaik nao tal labik kubo.

Ini njauk lac dom harei harak cada di drei haong adei sa-ai dalam sang. Diuk kumei di drei hadei di tuk klauk vaccine mbang 1 ye pandiak, kan suak yava jaik 10 harei. Nao sang iek ruak tuk ini oh hu. Drei jeng duh hatai, melam ndih jeng mboh pandik caga, kan suak yava.

Melam halei jeng yau nan, dua diuk sang drei urang halei tatuak tagok ye ravang iek urang daih daok suak yava halei oh. Dahlau daih, drei oh lac menuac bi quan, min tuk ini, yaok mesup ndih tagok peih meta mboh langik hadah meng thau lac drei daok diuk.

Yaom lac hatung hatian daok srau kadau yau nan, min bruk hit yaok harei di drei jeng kham merat ngak siam. Huac lac mesup oh daok peih meta mboh dunya, drei vak tagok lịch tual brei thau ka Password thẻ ATM, dom laik phone di labik drei ngak bruk…. piah meyah po mek yava drei nao, diuk anek di sang daok thau jalan. Vak bloh, dalam tuk diuk kumei di drei prein yava oh siam, nan ye drei pilih ruah baoh panuac biai brei diuk thau, plaih ngak ka diuk duh hatai. Daok diuk kumei di drei, jeng mboh prein yava oh siam, oh thau diuk metai yau habar, nan ye tacei brei ka drei thau labik caik jien ndo, meh pariak, harak gar …                           

Hu sa bruk duh hatai karei jeng kateik trak angaok cada di drei. Dom sa-ai kumei di palei (An Giang) ieu phone mai brei thau lac amaik daok ruak. Amaik di drei thun ini umo labaih 90 thun, min po brei ka amaik oh ravar ravai. Dom sa-ai điện messenger brei amaik menyai haong drei. Amaik thau lac Bei Gon daok ruak trak. Amaik thau lac hu biak rilo menuac metai. Amaik iek mbaok drei haong diuk kumei di drei, meta amaik yau khin haiy. Amaik ranam drei lo, kayua sang tok hu drei lac anek likei, bo daok lac anek taluac. Drei lac haong amaik jhui duh hatai, anek haong diuk haong dom taco po brei salamat abih gauk min. Iek mbaok amaik, drei khin preo hiay, abih di nyu lac tuk amaik lac, amaik taha ye, oh thau metai harei halei, min likau hong po brei amaik jhui metai tuk ini, oh taom hu abih anek taco.

Drei kham pacang sap haiy, ndom klao haong amaik piah amaik jhui duh hatai. Min hadei di nan, tuk padam điện thoại bloh, drei preo hiay yau anek anaih…Bloh yaok mbang mboh laik phone di palei ieu mai, drei tateik drei huac lac dom sa-ai lumei ieu khan bruk oh siam. Min biak patuah, dom mbang ieu phone nan, lac dom sa-ai kumei ieu sua piah thau prein yava, piah brei ka amaik taom mbaok, ndom biai…

Biak uan tabuan lac tal tukvak ini, jit ruak praong Covid nyu daok cadu trun, raidiuk daok hu mai veik haong siam mekre bahrau. Drei hu nao tal labik ngak bruk veik hadei di 2 bilan ngak online di sang.

Caong lac tapa bruk di drei ini, hu daong ka dom urang daok ranaih umo, thau ka yaom glaong di bruk daok diuk di dunya, piah thau iek praong dom hagait drei daok hu, piah mboh lac drei biak patuah, jhui hawa hamak, jhui khin ngak praong naih, jhui mek janeh gauk, bo brei thau anit ranam gauk jang, diukrai siam mekre haong gauk jang./.

Urang lang: Mousaphuong -30/1