Nghệ sĩ Ưu tú, nhạc sĩ Sơn Lương daok hu angan ieu lac Chanh Sa Thia, daok di xã Phú Tân, huyện Mỹ Tú, t.Sóc Trăng. Lac urang takre ragu ragam, bo daok thau me-in dom alat ragam, nan ye tuk umo 16 thun, ong hu pilih ruah tame ngak nhạc công di Đoàn Nghệ thuật Khmer Sóc Trăng. Tukvak ngak nhạc công hu daong ka ong thau cambaih jang, mboh takre jang, anit ranam jang dom ragu ragam Khmer meng kan.

Dalam paneh kadha, ong vak rilo janih ragu ragam, yau kadha daoh, ragam tamia, nhạc phim, ragu ka sân khấu Dù kê… tui ragu ragam Khmer meng kan. Dalam nan hu rilo kadha daoh kak kajap haong angan je di ong yau ye: “Pakacah ghe ngo”, “Bui sambai angaok taneh ia Angkor”, “Phum sóc raok bruk bui sambai”, “Anai kumei palei pala”, “Tông Lê Sáp anit ranam”.

Oh lac patagok dom yaom glaong dalam gilang ragu ragam Khmer meng kan, bo dalam rilo thun tapa, Nghệ sĩ Ưu tú, nhạc sĩ Sơn Lương tuk halei jeng roh duah piah brei tabiak rai dom kadha daoh gam ndung bak rilo asal kadha, gam bahrau gah ragu ragam, panuac daoh. Tui ong, dalam ragu ragam meng kan Khmer Nam Bộ hu rilo janih karei di gauk saong taong abih dom ragu ragam nan jeng kak kajap haong raidiuk yaok harei di bhap bini, abih di nyu lac dom rija, roya saong hu jeng janih oh kurang hu di urang Khmer meng dom zaman ini mai.

Yau nan min, dang anak dom ragu ragam bahrau urak ini, ragu ragam meng kan Khmer Nam Bộ daok gaok saong meda gaok rilo kan kandah saong mbuan si lahik nao. Piah hu daok veik saong dang kajap di urak ini saong harei hadei, biak caong hu dom nhạc sĩ abih hatai kham merat khik ramik, patagok, saong brei thau duah pataom, sahneng jalan ngak bahrau ragu ragam Khmer meng kan.

Lac menuac dang akaok Đoàn Nghệ thuật Khmer Sóc Trăng, ong tuk halei jeng sahneng duah jalan ngak habar piah pambuak ilamu meng kan haong ragu ragam bahrau, piah gam pabak hatai caong iek, caong pang ragu ragam urak ini, gam khik ramik dom janih nghệ thuật Khmer meng kan yau Rô băm, Dù kê.

Gam haong nan, ong caik tabiak rilo tukvak saong prein yava piah paneh tabiak rilo janih, dalam nan njauk ndom tal di abih lac kadha daoh, hu vak meng dua - dua sap Khmer - Việt. Kadha daoh di ong hu ragu ragam jeng daok ndung bak ragu daoh bhap bini Khmer meng kan, min asal kadha saong panuac daoh gheih jang, bahrau jang. Pagap yau dom kadha daoh: “Thun bahrau mai angaok taneh Sóc anit ranam", "Sa bui sambai haong gauk", "Talei rohim Việt Nam - Campuchia"…

Abih di nyu lac dom thun jaik di ini, dalikan ka Wa Hồ tuk halei jeng ngak pachreih hatai ong dalam bruk paneh tabiak dom kadha daoh. Hu thau, dom kadha daoh di ong jeng hu vak meng dua - dua sap Khmer - Việt, brei mboh hatai anit ranam, bruk thau dhar phor di urang Khmer brei ka Wa Hồ praong uranam, yau ye: "Phum sóc hadar Wa", "Panuac ru hadar Wa", "Hadar dhar phor Wa", "Panuac Wa dane miat dalam baoh hatai"... Dom kadha daoh ini daok lac panuac kakei, payua, pachreih ba bhap bini urang Khmer Nam Bộ gam gam bac megru saong ngak tui jalan diukrai siam mekre, hadah krah di Hồ Chí Minh.

Langiu di paneh kadha daoh, dalam labaih 40 thun ngak bruk nghệ thuật di drei, ong daok hu biak rilo bruk roh duah ilamu Khmer Nam Bộ biak hu yaom glaong. Ong bhian mek hu rilo giải thưởng dalam taneh ia saong angaok dunya ka bruk ngak nghệ thuật saong roh duah khoa học dalam gah ilamu bangsa./.