Ông Trần Thành daok di xã Nhơn Hải, huyện Ninh Hải lac urang dang akaok sa tổ mesraiy phun jien tín chấp di Dhar Gilang pariak Ngak nong saong Patagok palei pala huyện Ninh Hải, tỉnh Ninh Thuận ngan haong dom urang nong mesraiy phun jien piah ngak sara. Yaom lac bruk ngak sara pagam pambak rilo tame langik tasik saong kein laba di bruk ngak mbang mai meng yaom sara di darak pasar, min urang nong jeng hu mesraiy ginup phun jien piah ngak mbang. Ong Thành brei thau, labaih pluh thun dahlau, urang ngak sara tok hu mesraiy tín chấp meng Agribank rilo di abih lac dom triệu đồng, ye urak ini hu mesraiy glaong di abih tagok tal 200 triệu đồng. Yaom jien ini hu daong ka mikva biak rilo: “Dahlau daih biak kan piah mesraiy hu, mesraiy dom triệu jeng biak kan. Urak ini harak gar piah mesraiy jien biak mbuan. Mikva caong hu phun jien piah ngak mbang lac hu chip, mbuan jang dahlau biak rilo.”

Ong Hoàng Quang Siêu, Yam ndok Dhar Agribank Ninh Sơn brei thau, dalam huyen urak ini hu 65 tổ mesraiy phun jien tín chấp ngan haong yaok rabau urang nong daok mesraiy phun jien tapa dom tổ, phun jien pandar hu kein laba, bayar sraiy jeng biak siam: “Kol dahlak pandar abih dom sarak piah ka bhap bini hu phun jien tui bruk ngak mbang. Buh phun jien tabiak ka bhap bini sraiy ye kol dahlak oh huac. Ngak gilang pariak lac brei mesraiy, kan kandah di tuai lac kan kandah di drei saong brei duah jalan lang talaih.”

Ong Nguyễn Đức Hòa, Phaok akaok UBND huyện Ninh Sơn mboh lac, jalan brei mesraiy tín chấp di Gilang pariak Agribank ka urang nong lac lagaih, siam di abih. Harak gar brei mesraiy, yaom jien brei mesaiy saong yaom laba brei mesraiy jeng lagaih haong urang nong, lagaih haong bruk ngak nong di huyện. Ong Hòa lac: “Di huyện hu dom kapul, nyaom dang tabiak ngak dom tổ mesraiy phun jien tín chấp hu daong ka urang nong biak rilo, samar jang saong siam mekre jang. Dom thun meng sarak ini bo tuk urang nong caong hu ye mesraiy phun jien di Agribank hu samar jang.”

Urak ini, jien brei mesraiy tín chấp di Agribank păk tỉnh Ninh Thuận lac  1.326 tỷ đồng, brei ka 16.712 urang nong mesraiy tapa 425 tổ mesraiy phun jien. Langiu di bruk brei ka urang nong mesraiy tín chấp piah ngak mbang, jaik ini, Agribank daok hu peih praong brei mesraiy tín chấp blei pandar. Ong Nguyễn Duy Hưng, Phaok Yam ndok điều hành Agribank - Dhar tỉnh Ninh Thuận brei thau: “Bruk ini Agribank ngak hu 20 thun ini mai saong ba mai rilo siam lagaih njauk uan tabuan. Tapa danak dak, langiu di pabak hu phun jien ngak mbang ye daok pabak hu bruk blei pandar di urang nong. Agribank jeng khik iek hu jien sraiy saong bruk brei mesraiy di danak dak lac biak siam.”

Iek tui bruk di anak meta ka phun jien piah ngak mbang saong raidiuk di bhap bini bo di dhar Agirbank dom huyện, ban di tỉnh Ninh Thuận hu dom jalan ngak siam lagaih dalam brei mesraiy saong mek jien sraiy tui jalan tín chấp. Bruk njauk biai nan lac phun jien brei mesraiy ini hu daong ka urang nong ngak mbang hu kein laba, dak harei dak paglaong raidiuk ka rahra palei pala./.