Dalam 2 thun peih ngak tui Panuac tamat ka 01 di Mentri Chính trị ka bruk patui ngak Chỉ thị 05 dalam tỉnh Vĩnh Long hu labaih 10.000 kapol nyaom saong urang naih gheih;  dalam nan hu 832 lac agama, bangsa, baoh sang bhap bini saong bhap bini naih joi dalam bruk  bac megru saong ngak tui jalan diukrai siam mekre di Ho Chi Minh. Bruk bac megru saong ngak tui jalan diukrai, jalan ngak bruk  di Ho Chi Minh di tỉnh Vĩnh Long hu jeng bruk bhian randap; ngak brei salih siam jalan sahaneng saong bruk ngak di dom pakat, dom gah, urang jakar, urang đảng saong bhap bini dalam tỉnh.

Mintri jalan mbak pajeng ba hu harak payua UBND dom tỉnh, ban lac: TPHCM, Cần Thơ, Bình Dương, Vĩnh Long, Tiền Giang haong Long An ieu roh duah, brei panuac ka harak pathau khan roh duah meda ngak hu danak dak jalan pasei TPHCM-Cần Thơ. Dalam nan, dom tinh ban njauk kuhria tal bruk lagaih di danak dak haong bruk patagok di puk palei, bruk njauk padang ngak, brei panuac ka jalan nduac, labik saong mbaok taneh praong sit di dom nhà ga. Jalan pasei TPHCM-Cần Thơ hu peih tabiak meng ga An Bình – Bình Dương tal TP Cần Thơ, nao tapa 6 tỉnh, ban, atah abih tih labaih 174km, danak dak hu yaom jien buh tame ngak abih tih jaik 214 tỷ đồng.

Kayua bruk BĐKH saong ia tasik tagok, dom takai kraong, takai tasik di tỉnh Cà Mau njauk glut jaleih dak harei dak trak. 10 thun tapa, glut jaleih ngak lahik jaik 5.300 ha glai tapen tasik, jaik 26 km jalan mbak nao mai saong jaik 250 baoh sang bhap bini, kuhria abih tih khat lahik labaih 1.100 tỷ đồng. Piah pasiam bruk nan, Akok Mentri Ngak nong saong patagok palei pala brei tabiak dom jalan pacang caga bruk glut jaleih di Cà Mau di danak dak hu makna praong pakat negar. Tui nan Mentri brei kapol urang jakar ngak bruk  saong da-a dom urang ilamu di dom taneh ia ngak bruk pacang caga bala meng langik tasik, pacang glut jaleih takai tasik, takai kraong piah duah dom jalan pasiam veik siam lagaih.

Rilo janih baoh kayau di ĐBSCL daok tame bilan paik baoh haong sản lượng mek hu biak praong. Nan ye yaom dom janih baoh daok trun duk haong dahlau daih. Pagap yau durian, yaom daok trun hadei di sa tukvak tagok glaong, hu tuk tagok tal 200.000 đồng/kg, urak ini tok daok 50.000 đồng/kg. Tui panuac khan di dom po bein, durian thun ini hu rilo baoh saong baoh biak siam min yaom tok daok 50.000 - 80.000 đồng/kg janih mbiah, trun labaih meteh yaom duk haong tukvak tabung glaong dahlau di ini dom bilan. Urak ini durian daok paik baoh rilo, pabak hu bruk pablei tabiak negar langiu saong pablei dalam taneh ia.

Tui  Bác sĩ Đặng Quốc Quân, Yam ndoc Sang iek ruak Đa khoa khu vuc Hóc Môn – TPHCM biar harei 11/5, dalam tuk radaih  kuac hluk  tagok ngak paga pacang danak dak  sang iek ruak birau di labik jaik Pasak  y te huyen Hóc Môn ye duah mboh baoh mbom atah labaih 1 met, bauk gluh, ndih dalam trun meteh met. Sang iek ruak brei padeih ngak saong khan brei Huyện ndoi huyen Hoc Mon thau, tui nan khan brei Sở Y tế TPHCM thau. Melam 11/5, dom jabat  chưc năng mai panduan mbom nao tabiak truh labik nan.

Pak  mbang megei baoh taneh gam gam rah tabiak di huyện Lô Định dalam tỉnh Tứ Xuyên, gah Tây Nam Trung Quốc tuk mesup ini (12/5), haong prein khang meng 3 tal 4,5 độ. Urak ini oh ka hu panuac khan brei thau ka dom khut khat di dom mbang megei baoh taneh ini, min menuac sia pak nan biak duh hatai saong oh ndih hu tuk dom mbang megei baoh taneh gam gam rah tabiak. Tứ Xuyên lac sa dalam dom bhum hu rilo mbang megei baoh taneh di Trung Quốc. Harei ini jeng lac bak 15 thun harei rah tabiak bruk megei baoh taneh khang palai pajoa huyện Vấn Xuyên, tỉnh Tứ Xuyên. Bala nan ngak ka jaik 70 rabau menuac metai, jaik 18 rabau urang lahik, labaih 370.000 urang njauk rambus saong labaih 46 triệu urang gaok kan kandah.

Bruk ginum biai di Tổng thống Mỹ Joe Biden saong Chủ tịch Hạ viện Kevin McCarthy di đảng Cộng hòa harei ini 12/5 piah tabiak jalan ngak ka bruk tavak sre hu kadun veik tapa adit anak. Hạ nghị sỹ McCarthy brei panuac lac bruk kadun veik mbang ginum biai oh njauk lac brei mboh dom bruk ginum biai gaok kan kandah, min ong jia lac dom urang ginum biai njauk brei ndem meyai dahlau tuk urang ngak praong taom gaok gauk. Tui 2 khaw tin, Nhà Trắng meda cakak  trun jien cai pandar atau brei khik catang ngan haong bruk  cai pandar dalam tukvak anak tal meyah khin mek hu bruk njauk gauk.

Dom urang ngak adat hukum di negar Anh hu peih pasang iek, duah thau ka bruk samu gauk di chuỗi pabak pandap mbang menyum di taneh ia, piah duah thau makna rahra daok dang anak bruk lạm phát yaom pandap mbang atgaok glaong di abih dalam jaik 50 thun tapa. Tui adat, UB Môi trường, pandap mbang saong palei pala hu adat duah thau meng urang ngak nong, labik ngak pandap, labik pablei lẻ saong menuac blei mbang, meng nan payua pathau khan tal rajaei Anh gam tui dom panuac ieu kakei. Đảng Dân chủ Tự do cagar veik di Anh hu panuac ieu rajaei duah thau kein laba di dom siêu thị, kayua mboh lac dom sieu thi daok duah laba oh njauk./.