Tui kuhria mboh dahlau di ĐBSCL, ia mbak njaom tame bilan thu tukvak 2023-2024 meda hu aval jang saong dalam jang dut haong dom thun dahlau. Dalam nan, labik dom pabah krong Cửu Long di bilan 1, 2/2024, ranh mbak 4g/l tame dalam meng 55-65km, glaong jang 10-15km dut haong dom thun dahlau.

Mboh lac dalam bhum ĐBSCL, dom bhum pala phun mbang baoh, mbak njaom tame meda ngak kan kandah prong di Long An, Tiền Giang, Bến Tre, Sóc Trăng, ngan haong mbaok taneh praong abih tih jaik 43 ribau 300 ha. Kayua yau nan ye, dom labik ini daok hu jalan khik piah ia rilo di abih piah hu ia pruh ka phun pala tuk aia mbak njom tame dalam, nồng độ mbak angaok dom krong, ribaong glaong jang prein daok dalam mbak di phun mbang baoh.

Ong Trần Trọng Thành, Chi cục Thủy lợi Vĩnh Long brei thau, anak bruk kuhria mboh dahlau di dom urang ilamu ka sa mbang pandiak bhang njaom mbak meda rah tabiak khang dalam bilan thu 2023 saong 2024, gah ngak nong Vĩnh Long hu pachreih bhap bani caik hatai tal bruk samar peih ngak dom jalan piah pacang caga. Dalam nan, tỉnh hu ba tabiak 3 jalan ngak piah pacang caga:  "Jalan ngak ka 3 nan lac mbak njaom tame biak dalam ye độ mbak yau bilan thu thun 2019-2020 ye mbaok aia di kraong ribaong trun biak biar, mbak njaom tame di kreh bilan 1, hu mboh di akaok bilan 2 angaok kraong Cổ Chiên, kraong Hậu saong dui atah tal  bilan 5. Labik pambak meng 1-10 binah ribau di 6 huyện thị. Mblang taneh tui kuhria mboh dahlau njauk kurang aia lac labaih 71 ribau ha".

Tỉnh Tiền Giang hu 83 ribau ha taneh phun mbang baoh, sản lượng mek hu labaih 1,7 triệu tấn. Anak dom bruk hu kuhria mboh dahlau ka dom kan kandah di pandiak bhang njaom mbak, puk palei meda tui iek saong pasang mong biak catang ka chất lượng halaw aia, mbaok aia, độ mbak angaok kraong Tiền, dom pabah kraong. Taphia di nan, pasiam veik jalan ar pacang vin taom dhar bein, pasiam veik dom pabah mbraong piah khik aia taba dalam dom bilan thu saong plaih di bruk aia mbak njaom tame. Ong Trần Hoàng Nhật Nam, Phaok Akaok Sở Ngak nong saong patagok palei pala tỉnh ndom lac: "Ngan haong bhum pala phun mbang baoh tỉnh Tiền Giang hu ngak 6 baoh mbrong pacang aia mbak. Ta-eng mbrong Nguyễn Tấn Thành kayua Mban 10 di Mentri Ngak nong saong patagok palei pala jeng sanya lac dalam bilan mbak tal meda hu buh mbrong tame, ye mong rah tapa ngan haong mblang taneh pacang khik bhum pala drak di gah Pai ye nyu hu siam laghaih".

Bahrau ini, Mentri ngak nong saong patagok palei pala hu tabiak harak caong khin dom tỉnh, ban padang jalan pacang caga pandiak bhang, kurang aia taba, njaom mbak ka tukvak meng thun 2023 - 2025, dom jalan ngak pacang caga samu haong dom kịch bản karei di gauk ka khí tượng, thủy văn, halaw aia kayua El Nino. Nan ye, PGS-TS Trần Bá Hoằng, Akaok Viện Khoa học Thủy lợi gah Meraong brei thau cambaih laih, ngan haong yaok labik, abih di nyu lac dom labik tapen tasik, njauk caik hatai tal bruk pataom khik aia dalam dom danao, kavei hu blaoh atau di dom ribaong hu blaoh piah pabak ka bilan thu, abih di nyu lac di dom labik pala phun mbang baoh: " Khat lahik meda lac biak prong meyah khaol drei oh caik hatai tal halaw aia piah pruh tuk pandiak bhang njaom mbak. Kayua yau nan ye, hadei di mbang pandiak bhang njaom mbak di tukvak 2014 – 2016, Mentri hu tabiak tapuk pan tangin piah tacei pato dom puk palei, bhap bani labik njauk pandiak bhang njaom mbak padang ngak dom danak dak di anak meta, yau takac dom danao, kavei padang aia piah pataom khik ka puac bilan hajan, duh ka bilan thu, ngak siam bruk pacang caga pandiak bhang njaom mbak tapa tukvak kanjah jhak. Meyah caik ka khat lahik, phun mbang baoh njauk 5-10 thun tra meng hu siam veik".

Dom puk palei saong bhap bani bhum ĐBSCL daok yam tame bruk pacang caga pandiak bhang, njaom mbak bilan thu thun  2023 - 2024 hu kuria mboh dahlau lac meda mai aval jang saong biak trak. Dalam nan, bruk pathau khan daong ka bhap bani rahra hu mbaok tame, peih ngak bruk pacang caga pandiak bhang hu jhul khang jang piah patrun patakik jang dom kan kandah ka bruk ngak mbang pala drak saong rai diuk di bhap bani./.