Mik va Cham uan raok Kate dalam bui sambai

Mai tal palei Caklaing, ban sit Phước Dân, huyện Ninh Phước, tỉnh Ninh Thuận dalam dom harei ini, mikva urang Cam kuria rami ramik caga sap janih dom pandap panda lak hala kaya kan piah pok tagok ka po yang, muk kei di drei, dom janih ngak ilamo, yau ye daoh tamia, main pahit dait balaong piah ta duan raok harei Kate - thun 2022.  Muk Lâm Nữ Minh daok di Palei Caklaing, ban sit Phước Dân, huyện Ninh Phước Ninh Thuận brei thau lac: Harei Kate thun ini peih mbaok njauk tame bilan manik raya yuak juak padai yau nan ye hu jien padai blei salih dom ndap nda, pasiam sang danaok piah uan raok harei Kate bak hatian, haniem phul, chreih chrai bui sambai jang. Muk Minh jeng daok khan lac 2 urang anek di drei daok saong ngak bruk di Sai Gon, jeng rami ramik bruk ngak waktu piah mai sang Mbangg Kate gam haong adei saai dalam sang, gauk gar.

Tuk Kate bahrau tamat bloh... ye mik va pok kakuh....

Di dom palei Caklaing manyim jih dalah, palei ngak gaok glah Hamu Craok hu Kanja daong buh jien tame padang ngak jalan mbak; daong pato bruk ngak, salih bahrau ngak kong, pachreih bruk pablei salih pambuak haong bruk jirah rivang main, bahrau mboh hu ba kein laba mai brei ka mikva dalam bruk ngak Mbangg, blei salih, paralo jien tame kadung mai meng dom ndap nda di palei manyim jih dalah, palei ngak gaok glah, daong ka raidiuk, Mbangg ngui di urang bangsa Cam hu salih bahrau, dak harei dak hu hadah makre glaong. Ong Phú Văn Ngòi – Akaok HTX manyim jih dalah di Palei Caklaing biak uan tabuan, chreih chrai brei thau lac, Pesta raya Kate ieu lac tukvak masa piah ka tuai damuai atah jaik mai tal palei manyim jih dalah, palei ngak gaok glah ralo jang abih.

Piah uan raok Kate sang dahlak hu puh ramik...Cham drei

Hadei di labaih 2 thun harei Kate njauk padeih kayua jit COVID-19, thun ini, Kate hu brei peih raok uan gac, mikva urang Cham di Palei Hamu Craok, Palei Caklaing uan raok harei Kate meng labaih 100 urang dang tamia. Kampulan tamia rilo urang di mblang Sang ilamo Palei Hamu Craok saong dalam Mblang Pahat rup di Palei Caklaing. Muk Đàng Sinh Ái Chi, Phó akaok UBND ban sit Phước Dân, huyện Ninh Phước khan lac:

Di harei kate di labik ban sit Phước Dân, dalam nan mikva hu tamia di mblang pahat rup. Nan lac rilo rai gam tamia dom kadha tamia siam makre, gam haong sap kadet Saranai, ginang Paranưng ngak jeng sa harei roya biak chreih chrai di ban sit. Abih di nyu nan lac di pak ini hu 2 palei ngak, nan lac palei jhik manyim khan bai saong palei ngak lar am, saong mikva daok hu peih danak dak pacacah gauk ngak lar, ngak gaok, pacacah gauk jhik manyim saong pacacah gauk papaok ahar.

Dalam harei Kate ini, di bimon kalan Po Klong Garai, di phường Đô Vinh, ban Phan Rang – Tháp Chàm, tỉnh Ninh Thuận mbuan hala mada hu labaih kurang 100 ribau tuai damuai mai rivang main saong roh duah thau ilamo urang bangsa Cam.

Thượng tá Nguyễn Đình Thượng Hải – Akaok Công an Ban Phan Rang – Tháp Chàm, tỉnh Ninh Thuận brei thau lac Kong An hu ba tabiak jalan ngak piah khik tani tanat kajap karo ka mikva Cam saong tuai damuai mai main Kate di bimon Po Klong Garai.

Công an ban jeng hu ba tabiak jalan ngak piah khik tani tanat an ninh trật tự dalam harei Kate, abih di nyu nan lac dalam harei 24/10 lac harei peih tabiak praong di bimon Po Klaong Girai di phường Đô Vinh saong di palei Cuah Patih di xã Thành Hải, công an ban jeng hu caga dahlau piah thau cambaih laih bruk ini, paglaong bruk mesuh, pacang caga khik tani tanat an ninh trật tự piah ka mikva Cam Mbangg harei Kate biak salamat saong saron mbon, siam makre.)

Dreih yau di tỉnh Ninh Thuận,  mikva urang Cam daok di tỉnh Bình Thuận jeng daok chreih chrai piah uan raok harei Kate. Abih di nyu nan lac, harei Kate thun ini, di bimon Po Sah Ine (phường Phú Hài, ban Phan Thiết), urang pal akaok UBND tỉnh Bình Thuận meda pathau khan saong jao harak di Mintri Ilamo, Thể thao saong Du lịch ka bruk ba harei Kate di urang Cam tỉnh Bình Thuận tame angan inem krung ilamo pakat negar. Ini ieu lac sa bruk biak hadah mbaok di mikva urang Cam tỉnh Bình Thuận jang yau di mikva Cam di dalam negar saong dom urang takre ilamo bangsa Cam.

Saai Trần Đức Dũng – Akaok Mbang khik ramik inem krung illamo di bimon Po Sah Ine brei thau lac, harei Kate di bimon Po Sah Ine hu peih tabiak tui njauk adat cambat di urang Cam. Rilo bruk ilamo hu peih tabiak piah pabak ka mikva Cam jang yau ka tuai damuai. Brei ka adat cambat harei Kate hu adat peih pambang yang bimon, raok khan aw di po yang, manei ka po yang… daok gah main ilamu pesta hu peih tabiak bruk pakacah yuk saranai, chrai brak, pakacah gauk ndua ia tapa dom kan kandah, main tapeik mata jan glah… gam ngak tui adat gam main brei ka bui sambai chreih chrai ba mai khang kajap, siam makre saong jumpataom gauk.

Khol dahlak hulin hu peih tabiak bruk pathau khan ka harei Kate di mangaok panpage di sang miuyim piah ka tuai thau ka harei Kate. Dalam danak dak peih pakah hu pambuak gauk peih tabiak  uan harei Kate saong pathau khan harak di Akaok Mintri Ilamo, Thể thao saong Du lịch ka bruk ba harei Kate tame angan inem krung ilamo oh maong mboh pakat negar. Dalam danak dak peih pakah di dah page harei 25/10 jeng hu kadha parang iek khan aw, ngui cuk di urang Cam di dom urang kumei siam binai mai meng ban raya HCM.

Mikva urang Cam daok di 2 tỉnh Ninh Thuận saong Bình Thuận urak ini labaih kurang jaik 130.000 urang. Harei Kate di Ninh Thuận saong Bình Thuận ieu lac harei praong di mikva bangsa Cham, dui rik tame bruk khik ramik saong patagok dom yaom glaong di ilamo bhap bini bangsa urang Cam. Ini ieu lac harei piah yaih khan ilamo di urang Cam tal tuai damuai di dalam jeng ye di langiu nagar drei./.

Urang lang: Samad Hẳn -23/10