Ong Từ Đức Lợi lac sa dalam dom sang hu rilo taneh pala drak ngak nong prong di ấp Trà Canh A1, xã Thuận Hoà ngan haong jaik  20 ha taneh ngak padai saong pala caraih. Tui nan, yaok thun ong pandar biak rilo jru pacang khik phun pala piah pabak ka bruk pala drak. Piah plaih di bruk nerak môi trường meng kalaok, ba-ar tapok jru pacang khik phun pala hu pandar blaoh, ong bhian pataom mek ba caik di sa labik taneh klaak saoh di sang, blaoh am cuh klaak. Jaik dua bilan ini, tuk bruk danao pataom mek ba-ar tapaok jru pacang khik phun pala hadei di pandar blaoh hu Kapul urang nong xã peih ngak, dom janih hareik hareim nan hu ong pataom mek saong buh tame abih dalam danao nan. Ong Lợi brei thau: “Dahlau diah drei pataom mek, ba nao caik di sa labik halei nan blaoh hadei di nan am cuh. Hadei ini, hu danao ye drei buh tame nan, nyu mbuan laghaih jang. Drei oh cuh tra, drei tok buh tame danao lac blaoh, dahlau diah mikva drei daok parah klak langiu mblang hamu neriak tachuac, urak ini dhul pataom veik.”

Xã Thuận Hoà, huyện Châu Thành jeng lac labik hu rilo bhap bani Khmer daok. Urak ini, urang nong di labik ini daok dalam tukvak glang iek padai Hè Thu. Meng bruk pataom mek ba-ar tapaok jru pacang khik phun pala hadei di yuak kuak, pak dom mblang hamu di xã Thuận Hoà urak ini oh daok mboh bruk ba-ar tapaok, kanduh klaok jru pacang khik phun pala pandar blaoh prah klak ban glai ban klo tra. Ong Lý Đông, Bí thư Chi bộ ấp Trà Canh B, xã Thuận Hoà brei thau, ấp hu 345 ha taneh ngak padai ngan haong 700 baoh sang saong hu daong 16 danao padang caik klaok, ba-ar tapaok jru pacang khik phun pala pandar blaoh, urak ini mblang hamu dalam  ấp tuk halei jeng hacih sa-at. “Palei jeng peih ngak biak siam dalam bruk pathau khan jak ba bhap bani hu mbaok tame. Hadei di yaok mbang nyaom biai chi bộ ye chi bộ jeng pathau khan tabiak kapul nyaom, dom mban bhap bini di ấp, hadei di nan, kapul nyaom meda pathau khan veik tal dom urang dalam kapul nyaom di drei piah peih ngak siam bruk hacih sa-at môi trường di puk palei.”

Ong Sơn Minh Hoàng, Akaok kapul urang nong xã Thuận Hoà brei thau, bruk danao pataom mek ba-ar tapaok, kanduh klaok jru pacang khik phun pala tapa pandar blaoh hu Jabat Tài nguyên saong Môi trường huyện daong ngan haong 45 danao padang caik di dom palei. 3 bilan sa mbang meda pataom mek dom kanuh, ba-ar tapaok jru pacang khik phun pala di dom baoh danao padang caik tal labik xử lý tui njauk adat hukum. Ong Sơn Minh Hoàng, daok brei thau lac: “Meng bruk ngak nan, Kapul hu pambuak bruk haong Mban bhap bani dom ấp peih ngak ba caik di dom canah klau, canah pak, labik hu mikva ngak tabiak rilo piah tuk bhap bani drei pandar blaoh ye drei meda pataom mek buh tame mbuan laghaih jang, atah rilo jeng kan ka mikva.”

Bruk ngak danao pataom mek kanduh jru pacang khik phun pala hu daong ka urang nong salih bruk bhian randap oh parah klak hareik hareim dalam bruk ngak nong bal glai bal klo, ngak jhak tal alam môi trường. Bruk ini daok hu pambak prong saong rilo urang nong di Sóc Trăng pachreih tui piah pacang khik alam môi trường di mblang hamu, ribaong kraong, ngak jeng rilo yaom prong glaong ka pren yava saong bruk pala, ngak di urang nong./.