Labik jalan menyek tapak, atah labaih 1.500 mét, praong 3 mét dalam palei Xóm Lớn, xã Châu Điền bahrau ngak salah blaoh, ba tame pandar meng hatung hatian di mikva pak ini, tuk hu labaih 30 sang rahra alin hadiah taneh ngak jalan. Taong abih dom sang nan, jeng lac mikva bangsa Khmer.

Cei Ông Văn Tiên, sa dalam dom urang hu alin hadiah tanehngak jalan brei thau, jalan bê tông dahlau daih tok praong labaih 1 mét, jalan khut mbaih mbaoh trak, ngak ka bruk nao mai di mikva biak kan kandah. Tuk karja palei brei peih praong, ngak pasiam jalan nao mai tui jalan ngak lac “Karja saong rahra ba gauk ngak”, rahra alin hadiah taneh, karja buh jien ngak jalan, padang tatua, dahlak pachreih tui, oh sahneng hagait. Cei Ông Văn Tiên chreih chrai brei thau lac:

“Sang dahlak klah rabha haong karja palei piah jalan mbak hu praong siam jang, pak halei hu jalan mbak, gom dien ye riadiuk di mikva hu siam tagok. Dahlau daih jalan gluh baok, mbuan labuh, nao mai biak kan kandah. Urak ini jalan gheih mekre yau ini, yaom lac dut haong rilo labik mboh drei oh ka patagok samu, min dahlak mboh yau ini jeng biak siam paje”.

Daok amuk Thạch Thị Sa Nguône, jeng lac sa dalam dom sang alin hadiah taneh ngak jalan di palei Xóm Lớn brei thau, mikva Khmer pak ini rilo meng ngak nong. Dahlau daih pandap panda kaya nong ngak tabiak kan pablei kayua jalan mbak oh lagaih, jien pajeng ba glaong, nan mbuan njauk urang blei kateik yaom. Urak ini hu jalan ini, radaih pajeng pandap meda mai tal labik pataom pablei pandap kaya nong, raidiuk di mikva hu siam jang. Amuk Thạch Thị Sa Nguône bui sambai lac:

“Drei daok di palei ngak  nong, pandap kaya nong kan pablei kayua jalan mbak oh lagaih, tuk thau karja ngak jalan ye dahlak halan hatian alin hadiah taneh. Karja padang jalan ini ka mikva puk palei, ka anek taco drei harei hadei nao mai mbuan lagaih jang. Puk palei drei ba gauk padang palei pala bahrau, hu jalan siam dahlak mboh bui sambai rilo”.

Xã Châu Điền, huyện Cầu Kè, tỉnh Trà Vinh lac labik hu rilo bhap bini bangsa Khmer daok, meblah 82% rahra dalam xã. Thun 2022, xã Châu Điền mek hu angan palei pala bahrau paglaong. Ong Lê Quốc Thuần, Akaok UBND xã Châu Điền brei thau, pakat ủy ndang, karja saong rahra pak ini daok patagok bruk gul pataom, oh padeih pasiam saong paglaong chat luong asal kadha palei pala bahrau paglaong, kham merat padang hu xa palei pala bahrau kiểu mẫu di dalam thun 2024 ini. Dalam nan, gah asal kadha jalan mbak, tapa pasang iek, puk palei pilih ruah jalan dalam palei Xóm Lớn piah buh jien ngak khang kajap, peih praong.

Daok ong Huỳnh Văn Kim, akaok palei Xóm Lớn brei thau, tuk hu bruk buh jien, ngak khang kajap jalan, karja palei hu peih bruk pataom mbaok rahra piah pathau khan, jak ba mikva. Tapa nan, mikva thau cambaih kein lagaih di bruk peih praong jalan, pandap panda kaya nong ngak tabiak hu pajeng ba lagaih, anek kamuen nao bac jeng mbuan…abih di nyu nan lac jalan ini hu daong ka mikva nao tapa dom palei jaik taphia lac xã Tân An, huyện Càng Long samar drah jang. Meng nan, abih tih mikva jeng njauk hatai ngak tui. Ong Huỳnh Văn Kim brei thau:

 “Dahlau daih, jalan ini nao mai biak kan kandah, tuk hu karja palei jak ba ye mikva njauk hatai ba gauk alin hadiah taneh ngak jalan, bruk jak ba ini rah tabiak mbuan lagaih, oh gaok kan kandah hagait”.

Bruk alin hadiah taneh ngak jalan di mikva Khmer palei Xóm Lớn, xã Châu Điền, huyện Cầu Kè, tỉnh Trà Vinh lac bruk ngak siam njauk pambak tabiak, peih praong. Tapa nan, brei mboh bruk gul pataom, pambuak gauk, bruk jia di mikva tame pakat ủy ndang, karja palei dalam yaok bruk ngak, ba mbuan lagaih ka Châu Điền pamaong tal bruk padang ngak hu xã palei pala bahrau kiểu mẫu dalam thun 2024 ini./.