Bhum ceik xã Phước Kháng, huyện Thuận Bắc, tỉnh Ninh Thuân hu khan brei thau lac bhum biak mbuan hu bala kan kandah kayua bruk glut jaleih taneh saong patau kalung trun tuk hajan khang.

Piah khik siam makre, salamat ka labaih 50 baoh sang urang bangsa Raglai daok tapen takai ceik di 3 palei Đá Mài Trên, Đá Mài Dưới saong Cầu Đá, thun 2022, tỉnh Ninh Thuận hu padang ngak sa labik tái định cư praong jaik 5ha, haong yaom jien abih tih jaik 93 tỷ đồng piah ba rahra tabiak truh labik glut jaleih.

Ong Nguyễn Đăng Thư, Phaok Yam ndok Mban Khik ramik danak dak buh jien tame padang ngak huyện Thuận Bắc brei thau, labik tái định cư hu 175 lô, yaok lô meng 202-240 mét vuông:

“Tui jalan ngak lac meng thun 2022 – 2025. Min tal harei ini, bruk padang ngak cơ sở hạ tầng hu ngak salah. Urak ini, huyen daok ngak dom bruk patui di nan, lac biyar jien bồi thường, daong ka rahra meng labik daok klak tapa labik daok bahrau saong tui kuhria meda ngak salah dalam thun 2024, samar tani tanat labik daok ka mikva.”

Urak ini po buh jien tame ngak danak dak daok pambuak haong dom gah pambuak tal peih bruk biyar jien bồi thường. Kanja palei jeng hu ba tabiak sarak daong ka dom baoh sang panduan tabiak nao, abih di nyu nan lac jien padang ngak sang daok bahrau.

Ngan haong dom baoh sang kan kathaot, kanja palei daong abih tih jien padang ngak sang daok lac 178 triệu đồng. Dom sang oh daok dalam angan sang kan kathaot ye hu daong mateh yaom daong sang kathaot.

Tui ong Chamalé Hiu, Akaok UBND xã Phước Kháng, huyện Thuận Bắc, tỉnh Ninh Thuận, tal urak ini xa jeng hu peih bruk ginum bai haong rahra. Jaik abih dom baoh sang jeng njauk hatai ka bruk nao daok di labik bahrau. Min, mikva jeng haduh hatai tuk taneh klak oh daok, ye mikva oh daok taneh piah pala drak, ngak mbang:

 "Palei biak uan tabuan tuk hu jalan ngak ini. 37 baoh sang rahra daok caga parabha lô dahlau, dalam nan hu 11 baoh sang rahra likau Kanja padang ngak sang, daok 26 baoh sang likau lac eng drei padang ngak. Danak dak panduan ba rahra nao daok di labik karei jeng ngak suai. Suai oh lac kayua padang ngak bo kayua daok tavak sarak.”

 Phước Kháng lac xa harat urang bangsa Raglai di huyện Thuận Bắc, tỉnh Ninh Thuận. Dalam xa hu labaih 653 baoh sang, dalam nan hu 400 sang kan kathaot. Mikva rilo meng ngak nong, pala drak pamaong tame ia langik saong hu takik rahra raong limo, pabe saong pabo, nan ye raidiuk di mikva biak kan kandah, thun halei jeng hu Kanja daong pacang eik lipa.

 Kayua yau nan ye, piah samar drah langyah tavak tavaiy dalam tuk peih ngak danak dak, UBND huyện Thuận Bắc, hu harak ka 3092 payua ka UBND tỉnh Ninh Thuận piah likau jalan daong dom sang daok dalam angan panduan ba nao daok di labik bahrau.

Tui nan, langiu di bruk daong padang ngak sang tái định cư ye daok pabak gilac veik taneh ka dom baoh sang panduan ba nao daok di labik karei piah pala drak, ngak mbang saong raong glang. Ngan haong dom labik taneh daok gilac veik di danak dak, hadei di tuk ngak salah bruk tái định cư meda jao palei piah peih ngak sarak pabak taneh daok ka dom urang caong hu./.