Kayua nao vak di bhum atah biyah nan ye piah caga ka yaok mbang nao labik tapen negar, yaok urang vak bhian duah thau dahlau dom adat cambat, bruk ngak di urang jakar, urang lin saong bol bhap rahra. Hu urang vak daok caga pandap alin ka dom uranaih sit, dom pandap pandar yaok harei ka rahra bhum tapen negar piah bruk nao vak hu mbuan lagaih jang. Hu oh takik adei saai urang vak eng drei bac sap ndem di mikva bangsa pak nan piah tuk gaok mikba, meda ndem mayai, sua tangi mikva hu siam lagai jang. Yaom lac kan kandah, glaih glar saong rilo mbang dang anak bruk mbuan gaok bala, min ngan haong urang vak Thu Hoà, ngak bruk di Mban Bangsa VOV4 di Rayo sap ndem Việt Nam ye bhum tapen negar daok lac labik ndung bak oh thau hadom hatung hatian siam mekre  di bhap bini, bruk abih hatai jai saong oh huac matai lahik di dom urang lin bộ đội biên phòng daok ngak bruk khik caga quyen ngak po di taneh ia. Urang vak Thu Hoà brei thau lac:

“Mayah drei mboh bruk kan kandah glaih glar lac sa paga pacang angaok jalan nao vak ye drei tok nao hu sa tal dua mbang. Hadei di nan, drei oh khin nao veik. Min mayah drei thau cambaih, klah rabha haong dom urang lin biên phòng, haong mikva dom bangsa ye kol drei mboh yaok mbang nao lac peih tabiak sa jalan nao hu rilo kein lagaih, siam makre saong oh lac drei ba mai bruk klah rabha haong mikva bo lac mikba ba mai hatai jia ka drei, piah ka drei khang takai yam jang dalam jalan ngak mbao".

Bruk ngak mbao ka oh padeih dui pachreih rilo dam dara urang daok ranaih, kayua nyu kak kajap haong dom mbang nao, ngak ka drei mboh chreih chrai saong taduan hu bruk iek praong di manuac sia, di rahra. Min gah likuk nan, lac dom kan kandah, glaih glar bo oh njauk thei jeng thau, abih di nyu nan lac tuk nao vak di dom bhum atah biyah, bhum tapen negar, bhum mikva bangsa takik. Urang vak Phú Thiện, ngak di pasak ilamo papar sap, papar binguk Nam Trà My, tỉnh Quảng Nam khan lac, di labik glaong 800 mét luac thun lac gluh baok, glut jaleih biak kan kandah meda rahtabiak tuk halei oh thau hu. Min dom kan kandah nan ka oh tuk halei pacang hu takai yam di urang vak daok ranaih ini:

"Yaom lac langik tasik kan kandah, sarau kadau, raidiuk pak ini daok biak rilo kan kandah. Min mikva jeng biak kham marat, biak jumpataom gauk, anit ranam gauk. Nan lac dom hatung hatai biak siam khik takai kol dahlak daok veik pak ini, dang anak dom bala meng langik tasik, ba drei tame khik caga langik tasik".

Ngan haong dom urang ngak báo bhian vak dom kadha duah thau ka kol toi pham di bhum tapen negar, ye bruk gaok bala lac biak mbuan hu. Tui takai, duah thau bruk palai pajoa glai, atau dom sruh di dom kol dang akaok pablei salih athur glai tapa dom negar, hu dom kadha vak, urang vak brei ngak dalam yaok thun. Urang vak Đỗ Doãn Hoàng, ngak di mbao online Dân Việt brei thau:

"Tapa duah thau di kol dahlak ye vụ án oh lac meng dom lâm tặc, bo daok hu  dom urang jakar, min dahlak tuk halei jeng sahneng lac tuk raidiuk hu dom bruk yau nan, lac biak huac, biak jhak. Yau nan, urang vak dang pak halei? Nan ye kol dahlak  meng dang tabiak ngak".

Ngan haong urang ngak mbao Nguyễn Viết Tôn, Phaok Akaok Jabat urang vak, mbao Tin tuc, Thông tấn xã Việt Nam bahrau brei tabiak mbak baoh tapuk  angan “labik pambak hijao di bhum tapen negar” ini lac 35 kadha vak ka bruk ngak di dom urang jakar, urang lin bộ đội biên phòng kayua urang ngak mbao Viết Tôn hu vak dalam dom thun ngak mbao. Yaom lac tame umo 50 thun, min saai jeng daok sami samar pambuak haong dom bruk, dom bhum palei, nao jaik haong dom labik bhum tapen negar atah biyah, piah vak tabiak dom kadha brei thau ginup, thau njauk, ka dom bruk ngak di bộ đội biên phòng. Urang vak Nguyễn Viết Tôn ndem lac:

“Dom kadha mbao chi di dahlak saong tuk dahlak in tabiak jeng tapuk jeng brei mboh dom bruk hu yaom glaong di urang lin daok ngak bruk di bhum tasik kulao kaoh atah biyah atau di bhum tapen negar. Dom urang lin nan kham marat saong oh huac glaih glar, oh huac metai lahik, nan lac bruk pachreih dahlak vak jeng kadha mbao chi bo dahlak biak takre. Baoh tapuk labik pambak hijao bhum tapen negar lac dom bruk bo dahlak hu mboh di grauk labik di bhum tapen negar atau labik tasik pulao kaoh. Dom urang nan, harei melam khik iek bhum tapen negar, oh huac kan kandah, glaih glar.

Thau lac urang vak nao tal bhum atah biyah, bhum tapen negar mbuan hu dom bala, min hatai anit ranam bruk ngak, oh sahneng hagait tal bruk glaih glar, ye hatai khang oh tuk halei trun nao dalam hatung hatian di dom urang ngak mbao./.