Daok mala takai ceik Lang Biang, buôn B’Nớ C, ban sit Lạc Dương lac labik daok meng lavik zaman di urang Lạch (bangsa K’Ho). Urak ini, di labik ini hu labaih 70 sang urang bangsa K’Ho daok menyim khan bai, duh ka bruk duah thau ilamu di tuai damuai tuk mai tal bhum taneh ini. Pandap khan bai di mikva lac dom blah khan praong sit ginup abih piah ngak khan ngui, ao cuk di tuk rija, roya, phui masam…. Tuk bruk du lịch bhap bini tabiak rai, dom tuai mai ravang iek saong blei pandap rilo jang, ngak pachreih bhap bini, abih di nyu lac urang daok ranaih, hu hatai caong megru menyim khan bai

Oh lac ba mai ka tuai thau bruk menyim khan bai, bhap bini bangsa K’Ho di buôn B’Nớ C daok ngak ka tuai biak caik hatai haong bruk ngak càphê hacih. Di pak ini, tuai thau tal cà phê Arabica; duah thau saong ba rup tame ngak càphê hacih, blei cà phê nao ngak pandap alin hadiah...

Atah di buôn B’Nớ C 2km, pak di pasak huyện Lạc Dương, bruk du lịch bhap bini Tẹ & Saly dui pachreih hu biak rilo tuai mai ravang me-in. Labik khik ramik ilamu meng kan bangsa Cơ Ho-Tẹ & Saly raok meng 400-600 mbang tuai yaok malam. Hu padang ngak tui jalan pambuak sre, taphia bruk maong iek danak dak daoh tamia, tuai daok hu mbang dom janih pandap di palei. Njauk ndom tal di abih lac ralo am saong alak cần.

Tui panuac khan di amuk Saly – urang padang tabiak saong patagok bruk du lịch bhap bini ini, taong abih pandap mbang jeng hu dom menuac dalam sang ngak. Pandap piah ngak jeng lac pandap di bhum palei. Alak cần hu blei mai meng dom urang bangsa K’Ho.

Tui ong Ha Tiên, Bí thư Chi bộ buôn B’Nớ C, dalam tuk ngak du lịch, bhap bini thau paglaong hatai sahneng jang dalam dak padang, khik ramik ilamu meng kan jeng yau khik ramik alam langik tasik, ngak brei mekre jang labik daok. Meng hu du lịch bhap bini, raidiuk di mikva pak ini hu ginup jang, hu brei mboh cambaih tapa dom jalan praong sit dalam puk palei hu tuh bê tông khang kadang, hacih, mekre.

Langiu di nan, du lịch bhap bini daok hu daong pasiam kinh tế ka mikva dalam palei. Rilo sang tabiak truh kan kathaot, hu jien mek tame tani tanat meng ngak du lich. Amuk Saly khan lac, dahlau daih menuac dalam sang amuk oh hu bruk ngak tani tanat. Meng hu du lịch, hu daong ka anek kamuan, gauk gar but pajaih hu bruk ngak, hu jien tame.

Huyện Lạc Dương thau lac, bruk du lịch bhap bini lac sa dalam dom pandap meda patagok hu ilamu di palei saong mada meriak gauk hu. Anak bruk tuai du lịch mai tal Lạc Dương dak harei dak rilo, huyện hu padang jalan nao lagaih piah cakrok du lịch bhap bini, taphia bruk parilo dom janih pandap du lịch karei karei.

Ong Cao Anh Tú, Akaok jabat Ilamu saong Brei thau huyện Lạc Dương khan lac, huyện hu pataom tame cakrok dom pandap du lịch pambuak haong ilamu, sangka dom bruk du lịch bhap bini kak gam haong patagok ilamu di bhap bini bangsa takik daok dalam huyện.

Thun 2022, dom tuai du lịch mai tal huyện hu labaih 2 triệu mbang, jien mek tame hu jaik 188 tỷ đồng. sarak ka 05 harei 31/5/2021 di Huyện ủy Lạc Dương hu ba tabiak bruk lac tal thun 2030, meda taduan raok labaih 3 triệu mbang tuai, mek jien tame hu mangaok 395 tỷ saong ba bruk ngak ka 3.000 urang ngak daok dalam huyện./.