Glaong biar mblaih mblaoh gah diah ia kakuer dalam glai tamo luac thun la-an mat hu Palei jirah rivang bhap bini Vi Rơ Ngheo di urang bangsa Xơ Đăng di xa Đắk Tăng, huyen Kon Plông. Palei Vi Rơ Ngheo caik veik bruk mbuan hadar haong tuai damuai jirah rivang kayua daok khik tamo adat camabat bhap bini palei, gheih ghang saong ndung bak ilamo di bangsa Xơ Đăng. Dalam nan mboh lac, 63 baoh sang rahra dalam mbon palei jeng padang pambang jang meng dom phun kayau hu mek dalam glai, pala yaok ribau pheing bingu lan. Ini lac bruk gheih karei dut haong dom mbon palei di Kon Tum.

Sa-ai A Hiền, sa urang ngak jirah rivang dalau abih di mbon palei Vi Rơ Ngheo brei thau: Meng harei hu nao rivang me-in, sua tangi bac megru di dom tinh karei ye drei mboh lac piah ngak jirah rivang hu ye dahlau abih brei pahacih sa-at pasiam alam langik tasik vil taom dar, khik ramik dom yaom kaom ilamo meng kal. Blaoh jak ba mikva padang kapulan gong caing saong kapul tamia xoang, ngak labaih 10 baoh sang tong yau meng kal, pacang khik glai saong alam langik tasik vil taom dar. Hu yau nan mboh tuai damuai mai mbon palei dak harei dak rilo, daong mikva hu jien mek tame karo.

Sa-ai Nguyễn Thu Hằng, tuai damuai mai meng tinh Binh Duong brei thau: Mai palei Vi Rơ Ngheo, dahlak hulin mboh biak gheih ghang, thaik thaot bingi makre dan hu ba drei tame ragam ragu gong caing biak gheih, mbang dom janih kaya bangsa palei biak bingi. Biak siam gheih takik mboh halei hu.

Jak jeng meng bruk ngak di Mbon palei jirah rivang bol bhap rahra Vi Rơ Ngheo hu ngak jeng prein pambak praong dalam bol bhap rahra bangsa Xơ Đăng di bhum taneh Măng Đen gheih ghang anit ranam. Urak ini bol bhap rahra bangsa Xơ Đăng hu thau sangka iek praong caga glang bruk khik ramik ilamo gong caing, bruk ngak meng tangin di bhap bini meng kal piah duh ka tuai damuai.

Sa-ai kamei Y Bé, daok di palei Kon Vong Kia, ban sit Măng Đen brei thau: Urak ini dalam mbon palei hu 7 baoh sang buh jien tame ngak sang tong, tanek dom kaya mbang huak tui bhap bini bangsa di drei saong pambuak bruk pala njam, pala bingu bhum la-an piah pablei duh ka tuai damuai. Tuk ngak bruk jirah rivang daong dom baoh sang hu jien mek tame meng 4-5 trieu ndong sa bilan…

Piah patagok gah jirah rivang karo kajap, UB Bhap bini huyen Kon Plông hu pato tacei UB Bhap bini dom xa, ban sit tacei ba Mbang Pasang iek dom Mbon palei jirah rivang bol bhap rahra pambuak haong dom gah jirah rivang me-in nao roh duah, padang dom pandap nda kaya janih gah jirah rivang. Gam saong nan, patui bruk brei urang jakar daong pato patacei rahra ngak bruk jirah rivang di dom Mbon palei hu mbaok tame dom tal bac megru ka ilamo ndom puac, raok da-a saong duh tuai damuai mai jirah.

Sa-ai kamei angan Y Lim, Mbon palei jirah rivang bhap bini Kon Pring brei thau: Gam 2 baoh sang tong, saong thau ngak tape, mek dom janih pandap panda pak meng la-a meng krem di mikva piah pablei ka tuai damuai, yaok bilan jien mek tame labaih 10 trieu ndong. Min piah patagok gah jirah rivang karo kajap ye dahlak hulin brei hu mbaok tame dom tal bac megru, oh padeih bruk sua tangi, thau tanat dom hatai caong di tuai damuai piah hu jalan salih bahrau ka lagaih.

Huyen Kon Plông jeng pato tacei dom xa, ban sit jak ba dom baoh sang rahra di Mbon palei jirah rivang peih dom kadai meyit meyao pablei dom kaya pandap panda yau ye: Patei glai, ia dalko, sâm talei, kaphe saong dom pandap meng bruk ngak bhap bini meng kal piah dui pachreih tuai damuai meda pandar saong blei ngak pandap alin hadiah. Tal masa tukvak ini, huyen hu padang angan je ka 24 pandap panda hu angan je Măng Đen.

Ong Phạm Văn Thắng, Phaok Akaok UB Bhap bini huyen Kon Plông brei thau: Piah urang bangsa takik patagok bruk jirah rivang karo kajap, dalam tukvak anak tal, huyen hu roh duah ka bruk patagok jirah rivang bhap bini di dom mbon palei hu kein lagaih. Pato pakai ka urang menuac, khik ramik yaom kaom ilamo gong caing, dom bruk ngak meng kal. Gam haong nan likau da-a dom gah rik phun jien tame ka jirah rivang bhap bini di dom mbon palei.

Gam tui thaik thaot glai klo kayau patau alam langik tasik gheih ghang saong ilamo siam gheih di urang bangsa takik saong dom jalan langyah cambaih laih, je lac urang Xơ Đăng di bhum taneh măng Đen hu patui veik patagok dom kein lagaih ka ilamo, alam langik tasik piah patagok gah jirah rivang, parilo jien mek tame saong ngak kaya meda di angaok bhum taneh mbon palei di drei./.