Angaok jalan cao tốc Vĩnh Hảo – Phan Thiết, labik jaik tatua nao tapa xã Phong Phú, huyện Tuy Phong, jaik pluh janih radaih daok sami samar ngak jalan gar, jalan pataom tagok tatua cầu vượt.

Ong Nguyễn Công Thức, urang dang akaok tacei pato di Cty Tự Lập – sa dalam 3 liên danh padang ngak pok thầu XL1 jalan Vĩnh Hảo – Phan Thiết brei thau, jalan hu ngak salah blaoh bruk tuh nhựa, takai jalan jeng hu ngak salah: “Kol dahlak daok brei pala hareik ngak brei gheih mekre. Urak ini, Cty daok pataom tame ngak dom jalan gar saong jalan pataom piah tuh nhựa saong tui kuhria, meda ngak salah dahlau di harei 30/4 piah brei radaih nduac nao mai”.

 Kuhria tal akaok bilan 2, bruk padang ngak abih danak dak hu jaik 72% yaom  hợp đồng. Dalam nan, jalan praong ngak hu jaik 87%, suai jang 0,1% duk saong tukvak ramik veik. Dom gah daok padang ngak bê tông nhựa di dom labik angaok jalan; ngak hệ thống an toàn jalan mbak, padang dải phân cách, sơn kẻ; ngak jalan pataom, jalan gar, nút giao…

Ong Nguyễn Đình Việt, lambaok Cty Đạt Phương - sa dalam 3 liên danh padang ngak pok thầu XL1 di jalan Vĩnh Hảo- Phan Thiết brei thau, Cty hu khik menuac ngak dalam tuk Tết Nguyên đán meng blaoh, khang hatai ba danak dak ngak njauk tui tukvak ba tabiak: “Taong abih jalan praong urak ini ngak hu salah blaoh abih mbaok jalan. Kol dahlak daok kham merat ngak pasiam dom bruk daok veik, yau ye pala hareik, ngak pakhang dom labik njauk ngak saong dom jalan pataom, jalan pambuak  piah ngak salah danak dak njauk di tuk roya 30/4”.

 Tui Mban Khik ramik danak dak 7, kuhria meng tuk Akaok Mintri Jalan mbak pajeng ba mai pasang iek di harei 21/11/2022 tal urak ini, dom nhà thầu hu pabak labaih 200 janih radaih (yau ye radaih lu, radaih parai, radaih pajeng pandap), brei 14 dây chuyền padang ngak móng, ngak mbaok jalan, patagok abih tih dom radaih padang ngak lac 574 sruh. Nhà thầu praong jeng hu salih dom kapul padang ngak oh siam di abih 4 pok thầu haong abih tih jaik 36 km jalan praong saong 3 tatua. 

Tukvak ngak salah di danak dak daok mai jaik tal, dom nhà thầu daok pataom abih prein khang, daok pabak mac moc jamriak, abih di nyu lac khik bruk ngak 3 ca 4 kíp, piah tal harei 30/4 anak tal ba danak dak tame pandar, brei ka radaih peih, nduac./.