Xã Giao Phú lac sa dalam dom xa kan kandah abih di huyện Bảo Thắng, tỉnh Lào Cai. Dahlau deih, taneh pala drak di sang saai Phạm Thị Yên - urang bangsa Tày hu takik. Langiu di taneh ngak padai tok ginup mbang ye janih baoh kayau  karei dalam bein jeng ginup ka jien darak pasa. Atah di ini 4 thun, diuk pasang saai Yên hu huyện brei nao bac tal ngak nong pandar công nghệ glaong. Hu Kanja daong brei masaiy 200 triệu đồng gam haong phun jien di sang, saai Yên khang hatai pala njam patam saong baoh dưa lưới dalam sang màng saong sang lưới praong 1, 7 héc ta. Tal urak ini, jak jeng ba mai ngak ka rilo menuac mboh mahu. Saai Phạm Thị Yên brei thau: “Meng di tuk peih bruk ngak tui jalan công nghệ glaong ini, ye prien ngak biak takik, khik hu siam mekre salamat hacih saat pandap panda tuk drei ba tabiak darak pasa saong tagok jien mek tame ka sang biak glaong.”

Urak ini di rilo tinh, ban hu urang bangsa takik daok dalam taneh ia, hu dom bruk ngak nong pandar công nghệ glaong ngan haong dom jalan ngak karei di gauk, ba mai kein laba galong ka urang ngak saong urang blei pandar. Mayah atah di ini 3 thun, saai Ya Thuyên, xã Đa Quyn, huyện Đức Trọng, tỉnh Lâm Đồng daok having akaok dalam bruk pala njam patam baoh karuac piahpablei, min meng hu pasram ilamo kỹ thuật saai khang hatai buh tame labaih 100 triệu đồng pala 3 sào mateh traong ndaiy tui jalan công nghệ glaong. Meng nan, kein laba tagok mboh cambaih laih. Hadei di tuk kaoh abih yaom jien buh tame, yaok thun saai Ya Thuyên mek tame hu labaih 200 triệu đồng meng baoh traong ndaiy:“Hu patrun prein ngak biak rilo. Pagap yau 1 harei mayah urang pruh ia ye abih sa jala, min mac pruh ia ye lahik labaih 30 minit.”

Kaya nong hacih daok lac jalan cak rok patagok khang kajap kayua bruk caong blei pandap mbang siam mekre salamat di urang blei dak harei dak tagok. Kayua yau nan ye, dalam dom thun tapa, pandar công nghệ glaong tame bruk ngak nong daok hu rilo tinh, ban, doanh nghiệp di dalam taneh ia ba tame ngak, abih di nyu nan lac hadei di tuk Thủ tướng Rajaei khang hatai pato tacei dom Mintri, dom gah tame daong cak rok patagok bruk ngak nong pandar công nghệ glaong, ngak nong hacih. Urang nong, abih di nyu nan lac bhap bini bangsa takik bhum atah biyah, tuk mehit tal ilamo công nghệ bhian mboh haduh hatai, kayua ilamo daok biar saong sahneng oh ka tal. Min, dom urang ngak sarak di rilo tinh, ban hu thau pilih ruah dom bruk ngak, asal kadha lagaih, mbuan pandar tame bruk ngak nong di mikva. Abih di nyu nan lac dom asal ini hu pablak tame dom danak dak pato bruk ngak puk palei. Amuk Giàng Thị Dung, Phó Akaok UBND tỉnh Lào Cai brei thau:“Bruk pato bruk ngak hu siam lagaih dahlau di abih lac meng gah rahra. Njauk duah thau lac rahra caong pato bruk ngak hagait. Gam haong nan, tui jalan cak rok patagok di tỉnh, pagap yau Lào Cai pataom tame cak rok patagok bruk ngak nong pandar công nghệ glaong, saong patagok dom prein khang di Lào Cai yau ye patagok phun njam patam, baoh ôn đới, njam siam salamat, njam karei bilan saong tea.”

Min, bruk ba ilamo công nghệ tame ngak nong di bhum bhap bini bangsa takik saong bhum ceik jeng daok hu rilo cuang kandah, tavak tavaiy caik ka dom mintri, dom gah pambuak tal brei hu bruk rami ramik veik saong padang ngak dom danak dak, sarak lagaih. Dom tinh, ban njauk paglaong bruk pato, pasram, paglaong ilamo khik iek saong công nghệ ka dom urang jakar cơ sở; pato pasram ilamo ka urang nong, pato dahlau ka urang hu mbaok tapak tame danak dak lac urang kumei, padang sarak pachreih doanh nghiệp pambuak haong bhap bini dalam bruk peih ngak dom danak dak ba tame pandar công nghệ bahrau di bhum palei pala, bhum ceik, bhum bangsa takik./.