Dahlau daih, dom nghệ nhân yau amuk Đàng Thị Tuyết Hạnh tok ngak lan am piah pablei ka urang blei pandar dalam sang yaok harei. Min urak ini, tuk abih labik dalam palei Hamu Traok - Bàu Trúc salih tapa ngak lan am mỹ nghệ piah ba pandap lan am nao tal darak pasar dalam saong langiu taneh ia, amuk Hạnh kham merat nao duah thau rilo darak pasar saong salih bahrau bingu la, parilo mẫu mã di pandap. Meng dalam tuk jit Covid-19 daok rah tabiak srau kadau di rilo labik, mikva jeng taduan hu dom harak blei padap kayua HTX lan am Hamu Traok mbaoh tangin haong dom menuac urang, dom doanh nghiệp piah ngak tabiak dom janih pandap lan am Cam trang trí nội thất, ngak mekre sang danaok. Amuk Đàng Thị Tuyết Hạnh daok di Khu phố Bàu Trúc, ban sit Phước Dân, khan lac: “ Dahlau diah dahlak bac di amaik, tok ngak pandap bhian pandar dalam sang. Tuk salih tapa ngak pandap mỹ nghệ hu tame tal pasram ngak 6 bilan…”

Langiu di bruk sangka ngak tabiak rilo mẫu mã bahrau di janih lan am mỹ nghệ, lan am phong thủy, lan am ngak mekre sang danaok meng gah dalam tal gah langiu haong rilo bingu la bahrau, mekre, dom nghệ nhân dalam palei Hamu Traok hu buh prein roh duah, ba dom ilamu phương Tây, ilamu Việt tame dalam pandap lan am Cam piah salih bahrau kiểu dáng, paglaong siam mekre ka pandap. Thun ini, umo bahrau  17 thun, adei Đàng Nhĩ Khang hu labaih 3 thun kak kajap haong haluk lan, haong ia saong pui di palei ngak lan am Cam Hamu Traok. Meng hatai takre lan am Cam, adei  Khang hu ngak tabiak yaok ratuh janih pandap lan am biak gheih, rik daong khik ramik ilamu di lan am Cam meng kan.

Thun 2021, yaom lac gaok rilo kan kandah kayua jit ruak Covid 19, palei njauk pacang veik dalam tukvak atah min jien mek tame di HTX lan am Cam Hamu Traok jeng daok hu labaih 400 triệu đồng, jien mek tame di yaok urang dalam HTX hu jaik 6 triệu đồng sa bilan…Piah hu dom harak pambuak bruk blei pandap; bhap bini haong dom gah chức năng hu jhul khang bruk yaih khan angan je, padang Website brei thau ka palei ngak, yaih khan angaok Facebook, zalo. Meng rilo jalan yaih khan lan am Cam, gam haong bruk ngak dom janih pandap lan tui panuac kakei di urang blei, bo hu dom rup patau lan am Cam hu urang blei kakei ngak yaom meng 30 tal 40 triệu đồng sa pandap. Ong Phú Hữu Minh Thuần, Yam ndok HTX lan am Cam Hamu Traok brei thau: “ Khol dahlak tuk halei jeng kham khik ramik ilamu Cam, jeng yau bruk ngak lan di palei…”

Urak ini, lan am mỹ nghệ Hamu Traok rilo meng hu pablei di ban raya HCM, Hà Nội, Đà Nẵng haong dom tỉnh Lâm Đồng, Đắc Lắc, Khánh Hoà. Dalam tuk jit ruak Covid-19, bruk caga ngak pandap tui panuac kakei di urang blei, rilo meng lac dom pandap lan hu yaom glaong jang duk haong janih pandap lan dahlau daih, hu ngak ka raidiuk di mikva hu glaong tgaok meng bruk ngak lan am. Ong Bạch Văn Nguyên, Chủ tịch UB bhap bini huyện Ninh Phước, tỉnh Ninh Thuận brei thau ka kein laba di bruk pandar ilamu công nghệ dalam ngak tabiak saong pablei lan am: “Tapa bruk pandar ilamu công nghệ saong salih mẫu mã pandap piah patagok prein meriak gauk, pandap ini oh njauk lac hu pablei dalam tỉnh bo daok hu ba nao pablei di gah Brak saong gah Meraong negar. Abih di nyu nan lac, pablei khang di dom khách sạn, dom labik ngak mbang praong. Nyu tagok prein meriak gauk, tagok yaom glaong ka pandap di palei ngak.”

Bhap bini palei lan am Cam Hamu Traok tuk halei jeng thau khik ramik tani tanat dom ilamu gheih meke hu patoa veik meng dom saman ini mai di bruk ngak lan am. Dalam yaok menuac urang di palei ngak jeng daok hu dalam hatung hatian dom sahneng kuhria ka harei hadei di palei ngak, kayua lan am lac suan yava, lac bruk hadah mbaok meta di urang Cam Hamu Traok. Bruk kham merat abih drei di dom nghệ nhân dalam jalan ngak hadah krah, ngak tui hatai caong, tui panuac kakei di urang blei piah lagaih haong darak pasar dalam tuk pacang caga jit Covid-19 dak brei mboh angan je lan am Cam angaok darak pasar./.

Urang lang: M.Phuong -7/2/2022