Di darak "Chợ tràm", ong Nguyễn Văn Đức umo 50 thun (daok di xa Tân Bằng, huyen Thới Bình) ndam pagam saong bruk galam kayau tràm hu jaik 30 thun. Yaok kayau phun tràm hu praong hu sit, ong galam tapa jalan, tabiak tal labik tapen trun barait 11 duah hu 800 đồng. Harei rilo, di nyu ong duah hu 500 ribau dong, harei takik bruk jeng duah hu 200 ribau dong. Pagam saong bruk ini yaom lac biak glaih min daong ka ong saong diuk hu ginup kuhria ka raidiuk.

Sang ong Đức oh atah dom tal darak "Chợ tràm”. Tui ong saong rilo urang ngak mbang apah bruk galam kayau lavik thun thun di labik ini, darak ini oh lac labik piah ngak mbang duah jien blaoh daok ieu lac sa labik piah ngak mbang, tamuh rilo bruk bui sambai dalam raidiuk.

“Hu bruk ye ngak meng tuk 6 sup page tal labaih tuk 4 biar harei meng hu padeih padei. Bhian cakuai gaok dom anek halak di phun tràm gaok tame ngak kalaok kalik abih mbong. Mai sang biak katal, ngak ka ndih oh hu, min jeng kham merat ngak piah duah jien”.

Langiu di bruk glam bak kayau tràm, pajeng tràm jeng ieu lac sa bruk hu ngak rilo urang ngak di darak "Chợ tràm”. Ong Phạm Văn Dẻo (daok di xa Nguyễn Phích, huyen U Minh) meng sa urang galam di darak "Chợ tràm” hu patak pataom jien, blei gaiy blaoh salih tapa urang pajeng kayau tram. Harei halei jeng yau nan, ong Dẻo song urang ngak pah nduac gilai gaiy nao mek tràm pajeng mai tal labik pataom biak aval. Tuk nao atah meng 40 – 50 km, ong brei nduac gaiy peih nao meng kreh malam, daok harei halei suai ye jeng nao meng tuk 3 masup page.

“Drei pajeng meng gaiy di drei, saong pah urang piah ngak saong gauk. Kaoh abih dom jien buh tabiak ye sa bilan jien laba jaik dua pluh trieu. Min ngak rambah lo, po pah urang kagaik phun yaok ro, radak tabiak di pabah ribaong. Drei mai pajeng ba tagok gaiy, pajeng mai saong caik tagok ar ribaong ini ka dom urang nan. Bruk jeng hu bhian ngak min gaok mai tal abih tukvak kaoh kagaik phun ye padeih padei labaih pluh harei, cang tal tuk kaoh kakaik hadei meng hu nao ngak veik”.

Bruk pajeng kayau tràm ba mai jien mek tame glaong jang, min rahra brei hu jien piah blei gaiy. Langiu di dom baoh gaiy pajeng ba meng dalam glai kayau tabiak, daok biak rilo gaiy meng bhum taphia mai ini piah mek kayau tràm nan labik darak “Chợ tràm” biak chreih chrai, bui sambai.

Langiu di dua bruk bhian ngak, darak "Chợ tràm" daok hu dom baoh sang rahra hu ram dang. Ini ieu lac sa bruk pambah tame dom dhar klak meng phun tràm hadei tuk neh rabha phun, kaoh akaok, kaoh iku. Ong Nguyễn Duy Thanh (xa Khánh Thuận, huyen U Minh) pagam saong bruk ini hu 10 thun pjje. Sa urang umo 70 thun dahlau diah jeng hu ngak mbang ndam gam saong darak "Chợ tràm” min urak ini oh ngak bruk trak damak ini blaoh salih tapa blei dom phun dhar kayau klak piah ram jeng dang.

Yaok paok kadung dang 15kg ba mai ka ong hu 70 ribau dong. Bruk ram dang jeng biak rambah, brei lavik malam meng hu ndih saong medeih tagok tuk hadah page min taong daong ka diuk pasang taha hu labaih 5-7 trieu dong yaok bilan. Ong Thanh ndom lac, ngan saong dom urang praong thun, oh daok prein yava piah galam kayau tràm ye brei pilih bruk ram dang piah ngak mbang duah jien.

“Vaktu Malam ye cuh apui ram dang; vaktu harei kagaik njuh blaoh ba tame ka diuk pataom tame piah cuh. Rambah biak, gaok mada mai ngak oh samu ye pah urang mai ngak, 1 tuk ye bayar ka urang 30 ribau dong. Ngak bruk ini ye mek prein piah mek laba”.

Darak "Chợ tràm" di taneh glai U Minh Hạ ieu lac labik pataom dom urang tari taring, kham merat piah ngak mbang duah jien. Yaom lac rai diuk daok rilo kan kandah, glaih glar, min tapi dom urang nan jeng brei mboh hatai anit ranam radiuk. Sap mikva bui klao, sap mac jamariak patuh, ngak jeng sa buah darak "Chợ tràm” biak karei di taneh glai U Minh Hạ./.