Sang cei Nguyễn Văn Cấu daok ieu lac cei Bảy, daok di xã Thường Thới Hậu A, huyện Hồng Ngự, tỉnh Đồng Tháp lac sa dalam dom sang katung halam nyuel yaok harei angaok mblang hamu ia ini. Cei bảy nao ngak haong sa-ai kamei lac Nguyễn Thị Lợi, daok ieu lac nai Sáu saong 2 kamuan likei. Sang 4 urang, labaih 1 bilan ini mai, tukvak rilo meng daok di angaok mblang hamu ia, katung nyuel duah ikan. Tuk palao nyuel trun kreh hamu ye 2 anek likei di nai Sáu katung tame ar, nai Sáu saong cei Bảy daok di angaok gilai raok piah daong katung, tal tuk mboh ikan di ala nyuel. Harei rilo ye hu labaih 200 kilo dom janih ikan, takik ye jeng hu labaih rituh kilo. Jien mek tame yaok rituh ribau meng nan lac bruk bui sambai haong yaok urang, kayua jien mek tame nan glaong jang bruk nao ngak pah yaok harei dalam bilan thu. Cei bảy chreih chrai brei thau:

" Nao ngak hamu ye biak bui sambai, daok pak sang ye jua lo. Daok pak sang nao halei hu, daok hu bruk piah nao ngak yau ini adei sa-ai, anek kamuan bui sambai. Pak ini lac angaok hu lisei ala hu ikan, ia tagok thei jeng chreih chrai. Sa thun hu sa mbang ia ndik min."

Dom urang ba gauk nao ngak di mblang hamu ia ini bhian lac menuac dalam sang, gauk tian, nan ye yaom lac glaih glar nao ngak duah jien min gilac pambuak hatai anit ranam. 4 tuk page, baoh gaiy sit sang cei Bảy pajeng dom urang dalam sang tabiak nao ngak. 5 tuk page tal mblang hamu Thường Thới Hậu A, abih urang dalam sang ba tangin tame ngak. Tal bier harei, hadei di tuk teik pablei ka urang blei di mblang hamu meng lac salah blaoh sa harei nao ngak di abih urang dalam sang. Harei halei rilo ikan hadang, pablei hu rilo jien ye drei bui sambai rilo jang. Lavik lavik hu dom drei ikan praong ye maong yau patuah jamo po langik alin brei, thei thei jeng chreih chrai.

Labaih 10 tuk taong ikan angaok kraong ia, var huak jala pandiak jeng mbang samar drah angaok gaiy. Nai Sáu khan lac hadah page nai tanek lisei ba tui, blaoh hu ging gas angaok gaiy nai ngak huak ka abih gauk. Nai Sáu bui sambai khan lac:

" Harei daih cap hu 2 drei ikan sa-đai 6 kilo, pablei hu 9 rituh ribau. Hu harei hu ikan pra, 4 kilo. Ikan riel, ikan dhung phluc, ikan caoh-muan hu rilo. Bilan ia ndik palaik nyuel yau ini yaok harei hu jien. Katung ikan tagok ruah, tal mon 9  atau mon 10, nai ngak ia bai masam atau kho ka anek kamuan mbang pandiak pndiak nyu bingi, ba meng sang mai ye nyu la-an lo mbang oh bingi."

Var huak bilan ia ndik oh abih rilo jien min pahe bingi, ndung bak hatai anit ranam gauk. Mbuan mbiah yau nan, min haniem phuel pambak tabiak mblang hamu bak ia.

Atah di gaiy nyuel di nai Sáu, cei bảy oh hadom lac 2 suh gaiy sit di sa-ai Trương Văn Linh saong 3 adei sa-ai. Dom sa-ai daok di xã Thường Phước 1 jeng mai tal mblang hamu ia xã Thường Thới Hậu A piah katung nyuel mek ikan. Jaik 11 tuk jala pandiak, dom adei sa-ai di sa-ai Linh  samar drah katung mek ikan, caga huak lisei. Ngak bruk meng hadah page nan tung tian nyu lipa. Ngak bruk tanek huak, sa-ai Linh mek dom drei ikan bahrau palaik nyuel hu, buh tame gaok kho, gam haong paok njam pun paik di hamu meng hadah page. Nan lac ginup ka var huak samar drah di dom uảng nao ngak duah jien angaok mblang hamu ia yau dom sa-ai. Sa-ai Linh brei thau:

"Harei halei jeng yau nan. Mek hu lac tanek tuk nan. Tian lipa mbang hagait jeng mboh bingi".

Raidiuk tok caong hu yau nan, nan ye var huak yaom lac oh hu rilo kaya pandap mbang bingi, yaom lac labik daok oh lagaih, angaok gaiy mbleing mblang, min biak buai sambai, chreih chrai. Meng nan ngak jeng bruk biak karei di raidiuk bhum kraong ia, piah thei mai nlaoh  jeng mboh ranam, thei atah palei blaoh jeng mboh uan./.