Mai palei Rạch Sên, xã Thạnh Phú, huyện Mỹ Xuyên, rah tabak tui jalan 57 di huyện, dua gah jalan mblang hamu padai praong hijau daok matian daok chraoh nerang. Di ini, yam dua klau rituh mét gilac mboh sa baoh barait ribaong dalam mblang hamu praong labaih 10 mét bak ia taba brei ka bruk ngak hamu ngak apuh. Dua tapen mbaok jalan bak dom baoh apuh bein pala ganap janih njam patam baoh karaoh, gam saong dom rup urang ngak nong daok bubap jan Var kuria bruk hamu puh.

Ong Sơn Uôi, sa urang daok di palei Rạch Sên khan brei thau lac, labaih 10 thun dalau, bruk ngak nong mboh biak kan, kayua hạ tầng oh ganap sampurna. Min tapi dom thun barau mai, bruk jan war glaih glar nan oh daok kandaong. Ribaong barait urakni hu rami ramik laneng lanoi dan saong bak ia taba daong tui pruh ia di bilan thu, jeng ye jalan mbak hu padang ngak brei dui atah mbiah tal apuh tal bein, urakini mikwa drei blei salih mbiak biak lagaih, oh daok duh hatai kuria pajeng nao pablei atah yau dalau.

“Bruk pala njam patam baoh karaoh meng labaih 10 thun dalau mikwa biak kan kandah tuk tui ia tuh ia, kayua oh hu brait oh hu ribaong, mikwa njauk rok danao mek ia padang. Meng di tuk karja kuac barait caoh rok ribaong ye mikwa blei jamariak mai njuk ia tuh, blei kapal ghe nao apuh blaoh pagam majam raok tuh ia kali kalih, raok tuh ia taeng…”

Palei Rạch Sên, xã Thạnh Phú, huyện Mỹ Xuyên ieu lac sa baoh bhum taneh biak khang katang di dalam bruk pala njam patam baoh karaoh jeng ye khik ilamu yau nan meng mbiah lawik. Abih dalam palei hu labaih 40 ha taneh pala baoh karaoh njam patam. Tui saong jien buh tame brei padang jalan mbak jeng ye peih ngak ribaong kraong barait hu daong ka bruk ngak mbang di mikwa dak harei dak kein lagaih, tantu mek hu yaom kinh tế glaong, tui di nan, daong ka ralo baoh sang hu pabak jien tame, rai diuk dak harei dak karo, uak rup tagok.

Ong Đinh Văn Diễm, Akaok Kapul Urang ngak nong di puk palei Rạch Sên, xã Thạnh Phú khan brei thau lac, mikwa ba hatai tui pandar ilamu jammariak ky thuat barau tame ngak mbang, ba mata pajaih barau tame pala, yaom kom jak jeng kinh tế oh padeih ndik tagok. Saai Diễm tah tih kuria, di dalam langik tasik lagaih, yaok sa kong taneh pala mada brei jien mek tame labaih kurang 40 triệu đồng/năm. Saai Diễm khan: “Bruk tui ia tuh ia ka njam patam baoh karaoh ye drei ngak tui ilamu barau urakini mboh biak njuol prein yawa, bih jien takik. Pajaih jeng hu pilih brei lagaih tui langik tasik, brei hu asal yaom glaong, yau ye baoh amriak tuk ini drei paik baoh dui atah harei jang di dalau diah, jien mek hu tame jeng karo ralo, rai diuk mboh tagok jang di dalau diah”.

Bruk urang ngak mbang blei salih naih joi di xã Thạnh Phú dan saong ndom mayai karei di palei Rạch Sên njom praong biak khang, sang sang kham marat pala drak, raong glang piah pabak jien tame sang, uak drei tagok pasiam dalam rai diuk. Di dom mbaok baoh ar barait ribaong ia dalam mblang hamu, luac dalam thun, urang ngak nông di ini bubap jan war saong hamu apuh, piah patagok yaom mbang ngui kinh tế, mikwa daok pandar jamariak ngak kong barau, yau ye caga palai brei kali kalih dalam tui ia tuh ia, pandar jamriak tuh ia taeng… tui di nan, daong patukik patrun buh jien, patrun hu prein ieik glang jeng ye patagok kein rababa tame bruk ngak mbang.

Ong Lê Hồng Quang, Phó chủ tịch UBND xã Thạnh Phú, huyện Mỹ Xuyên, khan brei thau lac, yaok sa thun Thạnh Phú pala jaik 1.200ha njam patam; asal pataom dalam nan di dom bruk pala njam di mbaok ar ribaong barait saong di takai hamu bilan thu. Bruk caik hatai buh jien tame padang ngak hạ tầng palei ngak nong blaoh sampurana mada daong patagok prein khang bruk pala njam patam baoh karaoh di palei pala.

“ Urak ini di dom jalan meng tỉnh tal huyện, jalan dom palei ngak nong di xã hu brei pambuak gauk. Ia barait ribaong kraong hu kuac kuah daong ka mikwa lagaih lagu di dalam tui ia tuh ia, pajeng jeng ban dap nda. Urang blei mai tal palei tal puh biak lagaih”.

Urak ini, urang ngak nong daok di palei Rạch Sên daok bubap janwal ieik glang njam patam, gam saong lagaih sanang dalam ngak tabiak ndap nda, mikwa biak jie hatai hu sa bilan yuak kuak paih baoh njam patam jayah siam makre, rai diuk dak harei dak trei sil./.