Sa-ai Nguyễn Văn Hiếu, daok di xã Trường Thắng, huyện Thới Lai, lac urang dalam HTX Trí Vinh pala dưa lưới saong dưa lê tui jalan hacih sa-at, mek hu tanut chuan VietGAP. Bruk padang ngak sang màng tui cong nghe Israel haong taneh praong 5.000m. Meng tuk padang ngak sang màng tui công nghệ Israel, sa-ai Hiếu hu lagaih janag dalam bruk iek glang saong buh khak ka tamun kayua taong abih jeng hu ngak meng phone tangin, takik abih prein yawa iek glang. Urak ini, tamun dưa lưới hu urang blei veik abih haong yaom 35.000 đồng sa kilo saong brei baoh hu meng 3,5 tal 4 tấn di mangaok sa ribau met vuông, nan ye jien mek tame meng bruk ini hu glong. Sa-ai Nguyễn Văn Hiếu kuhria mboh, yaok thun pala 5 mbang tamun angaok taneh sa ribau met vuong, yaok mbang hadei di kaoh abih jien buh tame ngak daok laba hu meng 50 tal 60 trieu đồng, meyah kuhria dalam sa thun laba jeng hu meng 250 tal 300 trieu đồng sa hecta. Yau nan min, piah padang ngak sang màng pala tamun dưa lưới tui công nghệ Isarael abih biak rilo jien, camereip sa hecta taneh tagok tal 500 trieu đồng, hu tuk rilo jang, ini lac jien oh takik ngan haong urang ngak nong sit sot:

“Công nghệ nan phun jien tuk camereip lac praong, khin peih praong brei hu bruk daong meng dom jabat, mban ngành saong karja palei piah mesre hu phun jien piah urang nong dalam palei drei peih praong bruk pala drak pandar  công nghệ glong. Mesre hu phun jien ralo ye ngak tabiak kaya nong,  asar kaya nong hu siam jang.”

Dom kaya nong di HTX Trí Vinh hu siêu thị di ban Cần Thơ blei abih nan ye oh huac ka bruk pablei pandap. Dalam tuk peih ngak, dom urang dalam HTX hu gah Ngak nong palei saong ban tacei pato jalan pandar ilamu, công nghệ tame bruk ngak tabiak kaya nong tal bruk pablei pandap.

Ong Trần Quang Vinh, Yam ndoc HTX njam hacih Trí Vinh brei thau, dom urang dalam HTX hu pasram ilamu ky thuat, daong jien piah pala njam tui tanut chuan VietGAP, padang mã số labik pala, logo ka pandap saong hu daong pambuak haong dom labik pablei saong peih bruk yaih khan, pablei kaya nong tapa blah web online di Cần Thơ.

Yau nan min, bruk ngak nong pandar công nghệ glong piah ngak tabiak kaya nong jeng daok hu dom tavak tavaiy. Bruk pala dalam sang pacang halam njul daok sit, meng nan bruk pabak ka darak pasar daok takik. Langiu di nan, jien padang ngak sang halam daok glong jang rilo mbang dut saong jien mek tame di urang nong di palei pala nan ye rilo urang oh khin ngak.

Urak ini, gah ngak nong daok jhul khang bruk jao brei dom ilamu ky thuat birau ka bhap bini piah palong bruk pala drak, asar siam di kaya nong saong jien mek tame ka bhap bini. Langiu di nan, gah ngak nong jneg hu daong pambuak haong dom đơn vị, D.N blei kaya nong. Ong Trần Thái Nghiêm, Phaok Yam ndok  Sở Ngak nong saong Patagok palei pala Ban Cần Thơ brei thau:

  “Gah ngak nong pataom tame pambuak haong dom gah gam tal piah jhul khang  bruk  salih số dalam  ngak nong. Khol dahlak pataom tame pato pakai, pasram megru piah paglong jalan sahaneng, ilamu di dom urang jakar salih số, hệ thống pachreih nong. Bruk salih pandar số tacei pato mikva thau ba kaya nong tagok angaok dom blah web pablei salih online”.

Bruk ngak nong cong nghe glong pambuak haong bruk pablei kaya nong di huyện Thới Lai, Ban Cần Thơ hu daong ka bhap bini paglong jien mek tame, tani tanat raidiuk saong pamong tal bruk padang gah ngak nong salamat saong khang kajap./.

Urang lang: Ai Nghiem – 13/10/2022