Taong abih hu parabha tukvak brei trun pajaih laghaih haong halau aia pruh

Mbang bhang mbak thun 2019-2020, bhum pala durian di huyện Cai Lậy (Tiền Giang) njauk khat lahik trak, ngan haong jaik 40% mblang taneh metai atau abih pren cak rok. Yau nan min, mbang bhang mbak thun 2022, rilo bein durian di dom xã Tam Bình, Ngũ Hiệp… (huyện Cai Lậy) jeng daok that hijao, phun bak baoh. Ong Đặng Văn Lâm, Bí thư Đảng ủy xã Tam Bình brei thau, kayua karja palei saong bhap bani hu ba tabiak jalan pacang caga meng atah saong pandar rilo jalan ngak pacang caga bhang mbak siam laghaih nan ye thun ini meda lac oh hu mblang taneh durian halei njauk khat lahik. Dom bein durian njauk abih pren meng mbang bhang mbak thun 2019-2020, urak ini jeng daok tamuh siam, brei baoh gilac veik. 

Jeng dalam mbang bhang mbak thun 2019-2020, urang nong huyện Tân Trụ (Long An) njauk khat lahik trak tuk padai đông xuân daok sraoh ye njauk thu aia, atau njauk ia mbak njaom tame ngak ka phun padai metai. Bilan bhang thun ini, meng peih ngak rilo jalan pacang caga mbak nan ye padai đông xuân di huyện pala njauk khang, pablei hu yaom glaong, urang nong thei jeng bui sambai. Phaok Akaok UBND huyện Tân Trụ - Trịnh Phước Trung brei thau, meng dom baoh mbrong dalam huyện hu padang ngak khang kajap plaih hu aia mbak njaom tame dalam mblang hamu. Gam haong nan, hu aia meng ribaong Nhựt Tảo duh ka bruk pala drak, nan ye 5.000ha padai di huyện oh njauk hagait saong mek hu rilo padai brah.

Thun 2022, dalam dom puk palei gah Pai di tỉnh Tiền Giang yau huyện Gò Công Đông, Gò Công Tây saong ban sit Gò Công hu yuak padai thu đông piah “plaih njaik” mbak; salih binah mblang taneh pala padai tapa pala phun mbang baoh, atau njam patam abih takik aia pruh jang.

Ong Nguyễn Văn Quý, akaok Jabat ngak nong saong patagok palei pala huyện Gò Công Đông, khan lac: “Langiu di phun padai ye huyện daok hu labaih 900ha phun mbang baoh saong yaok rituh hécta njam patam dom janih, taong abih hu parabha tukvak brei trun pajaih laghaih haong halau aia pruh. Nan ye, mbang bhang mbak thun ini oh ngak kan kandah hagait tal bruk pala drak”.  

Akaok Sở ngak nong saong patagok palei pala tỉnh Tiền Giang Nguyễn Văn Mẫn brei thau, piah ngak siam bruk pacang caga bhang mbak bilan thu thun 2021-2022, gah ngak nong hu brei cakak trun mblang taneh ngak padai thu đông di dom huyện gah Pai saong peih bruk trun pajaih avar jang bilan padai đông xuân. Jalan ngak bo tỉnh ba tabiak nan lac pacang aia mbak, pasiam veik dom mbrong binek piah pacang mbak, pataom tame kuac kuah ribaong krong, jak ba mikva padang khik aia piah pala drak saong pandar patak pataom aia.

Sa urang pal akaok Sở Ngak nong saong patagok palei pala Tiền Giang khan lac: “Huyện hu brei salih dom mblang taneh pala padai bhian njauk ia mbak tapa pala plang, pala la-u… nan lac dom phun tamuh hu dalam pandiak bhang, bo daok ba mai kein laba glaong”. Ong Nguyễn Văn Hải, akaok jabat ngak nong saong patagok palei pala huyện Tân Phú Đông brei thau, phun plang brei jien mek tame glaong jaik 3 tal 5 mbang dut haong pala padai, bo oh huac ka bruk aia dalam bilan bhang mbak. Ini hu mong lac sa jalan panduan salih siam laghaih./.

Urang lang: Jasi – 12/05