Dalam tuk rilo dam dara dalam palei nao ngak di dom labik ngak kong ye saai Lý Văn Ngọ, Bí thư Chi đoàn palei Lục Mùn, xã Phúc Ninh, huyện Yên Sơn, tỉnh Tuyên Quang pilih ruah bruk cak rok patagok kinh tế pak di dalam palei, ngan haong bruk ngak trang trại pambuak gauk. Saai pilih ruah jalan ngak ini kayua langik tasik, taneh riya pak ini lagaih haong bruk pala phun mbang baoh saong mblang taneh di sang. Tuk bahrau ba tangin tame ngak saai gaok biak rilo kan kandah kayua kurang phun jien saong ilamo. Meng hatai kham marat di drei, hadei di rilo thun ngak biak glaih glar, gam ngak gam bac megru ilamo di dom urang nao dahlau, urak ini, saai hu bein phun mbang baoh lac baoh kandiuk, kruac bhung hu brei baoh paik tani tanat dom thun ini mai. “Yaok bhum yaok prein khang ye urak ini maong mboh prein khang di drei lac mblang taneh drei hu ye drei pataom prein tame pala phun mbang baoh, njam patam, baoh kraoh, ba mai kein laba glaong. Urak ini, kruac bhung di drei rilo meng lac hu sangka iek glang tui jalan hữu cơ, rilo meng lac khak var ro. Ngak tui jalan hữu cơ ye nyu salamat haong urang pandar. Daok phun kayau ye urak ini nyu tamuh siam meda khang kajap jang”.

Patagok yaom glaong di pandap panda, khik salamat ka urang ngak saong urang pandar, ngak tui jalan hữu cơ, ngak nong tuần hoàn lac sa jalan nao siam lagaih haong bruk ngak nong urak ini. Di puk Tiến Xa, xã Mường Bon, huyện Mai Sơn, tỉnh Sơn La, sang saai Tạ Văn Nội jeng peih bruk raong glang tui jalan khép kín. Ngan haong 5 hecta phun mbang baoh, sang saai pala pabak 2 hecta hareik, raong 15 drei kubau saong 4 var raong giun quế. Abih tih mblang taneh praong 120 mét vuông, raong tui jalan khép kín tuần hoàn. Peih ngak bruk ini hu daong ka saai Nội oh blei pandap mbang piah raong glang, trun manieng yaom jien blei khak drak, pandar pandap klaak meng bruk ngak nong, ngak veik jeng pandap hu yaom bahrau, patak pataom hu rilo jien buh tame ngak.“Pagap yau di thun blaoh sang dahlak ngak, jien buh tame dalam sa thun blei pandap mbang ka kubau lac labaih 200 triệu. Min tuk dahlak raong laneng, dahlak mek drei laneng brei ka tapon kubau di sang dahlak mbang. Yau thun ini, sang dahlak meda trun hu manieng jien blei pandap mbang ka tapon athur di sang dahlak”.

Ini lac sa bruk raong glang tui jalan khép kín, ngan haong yaom jien buh tame bier, mbuan ngak. Bruk ngak biak lagaih piah pambak praong, gam langyah bruk alam môi trường, paglaong jien mek tame ka dom baoh sang raong glang. Ong Lò Văn Bưu, Phó akaok UBND xã Mường Bon brei thau:“Tapa pasang iek di sang saai Nội daok di puk Tiến Xa ini, mboh bruk raong glang di sang saai Nội biak siam. Kayua nyu gam tal bruk khak drak ka phun pala haong njam patam, baoh kraoh dom janih. Xã meda pathau khan ka mikva piah pandar jalan raong giun quế ka dom baoh sang piah cak rok patagok kinh tế saong jien mek tame ka baoh sang”.

Jhul samar bruk padang mbang ngui saong dui pachreih bruk buh jien tame ngak mbang di bhum mikva bangsa takik saong bhum ceik jeng lac sa dalam dom asal kadha hu makna praong dalam Danak dak bruk ngak negar Cak rok patagok kinh tế xã hội bhum mikva bangsa takik saong bhum ceik tukvak 2021 – 2030. Piah ka Danak dak hu peih ngak siam lagaih di dom tinh, ban, Ủy Ban Bangsa jeng hu patabiak Sarak ka 02, pato tacei peih ngak dom dự án di danak dak. Padang mbang ngui daok lac bruk sangka di dam dara urang bangsa takik. Dom hatai sahaneng ba tabiak dom danak dak daok rik daong biak siam, salih jalan sahaneng di rahra dalam bruk cak rok patagok kinh tế xã hội./.