Dom melam Som, But, Suk, duk di pasak ilamo ban Cần Thơ gilac yava tagok sap đờn sap daoh tài tử saong gam sap ndom klao chreih chrai. Urang bac megru di ini hu rilo umo karei di gauk, min jeng hu hatai ranam ngan haong bộ môn ini.  Tal bac ini hu Nghệ nhân ưu tú (NNƯT) Kiều Nga, Phaok akaok Sang daoh Tây Đô peih tabiak jaik 6 thun ini mai. NNƯT Kiều Nga ndom lac, piah pato bruk tal yaok urang bac megru, anai parabha tui nyaom  brei ka urang bahrau bac saong nyaom brei ka urang hu thau blaoh đờn ca tài tử: “Tui jalan pato di dahlak meng dahlau mai, dahlak pato tui căn bản blaoh urang bac megru njauk daoh hu dom kadha daoh cải lương, kadha Barak, kadha Meraong… blaoh lac taong abih dom điệu lý. Dahlak meda pato tacei meng kadha sit tal kadha prong, meng nan drei meng pato hu 20 kadha Ong akaok di đờn ca tài tử. Kayua lac 20 kadha Ong akaok ini lac biak kan daoh”.

Gam ba ilamo đờn ca tài tử nao tal rilo manuac, NNƯT Ái Hằng caik tabiak tukvak dalam melam Jip saong melam Dit yaok adit tal Sang ilamo uranaih quận Ninh Kiều tacei pato ka dom urang bac. Urang halei tuk ba drei tame labik tal bac jeng mboh pachreih tui dom sap yava meng mbaik đờn kìm, lai tame haong sap taih nhịp di alat ragam song loan.

NNƯT Ái Hằng brei thau, jaik 30 thun tui bruk, jaik meteh tukvak anai kak kajap haong dom tal đờn ca tài tử pato brei saoh ka bol bhap rahra. Urang halei hu hatai takre duah thau, caong hu bac daoh tài tử, Ban tổ chức dom tal bac jeng uan raok ba tame, dalam nan hu dom ayut ranaih, abih di nyu lac dom adei sit lac hu caik hatai sangka rilo di abih: “Dahlak nao tal halei, tal labik halei, dahlak jeng caik hatai piah duah thau, duah mboh dom urang bahrau saong pabak brei apui chreih takre tapa ka dom kamuan. Dahlak jeng ba tabiak mblang ma-in ka dom anek bhik hu ba drei tame, hu taom gaok, bac megru saong pakacah taong abih dom mbang pakacah. Meng hagait daok mboh anak meta, dom anek kamuan mboh pachreih hatai, hu pren khang piah gam haong anai pabak apui ka rilo ayut jang”.

Pabak brei apui ka dom adei daok hu dom baoh hatai chreih takre tài tử nan lac ong amuk, amaik ame. Tal bac gaok tuk mai oh ka tal 10 adei sit bo hu dom adei gilac mai meng dom quận/huyện langiu ban. Amaik ame oh huac kanda jalan atah, tok caong khin anek ranaih daoh hu dom kadha đờn ca tài tử hu njaom tame dalam hatai bhap bani Tây Nam bộ. Urak ini dak harei dak takik dom ayut ranaih caong duah thau, tui bac, chreih takre dom nghệ thuật meng kan, jeng yau đờn ca tài tử. Kayua yau nan ye, dom ayut mai haong tal bac hu mong yau dom asal pajaih, gam piah raong ba cak rok patagok, gam piah pambak prong tal bhap bani, piah ka bruk ma-in đờn ca tài tử dak harei dak peih prong.

Bruk pato veik bruk meng dom tal bac đờn ca tài tử ba mai siam mekre mbiah tuk hu pablak tame dom danak dak xúc tiến bruk rivang ma-in di ban. Di dom labik rivang ma-in prong yau Bến Ninh Kiều, Darak angaok kraong Cái Răng… bhian hu dom danak dak đờn ca tài tử, giao lưu nao mai haong tuai damuai gam ba mai kadha bahrau bahrang ka tuai damuai, gam lac tuk caik ka dom urang bac megru patagok ilamu di drei. Adei Nguyễn Ngọc Như Phúc, daok di quận Ninh Kiều hu mbaok tame tal bac brei thau: “Anek mboh dom ragu pak ini biak bingi pang saong anek biak takre. Langiu di kadha Oán ye anek daok takre dom kadha lý, dom kadha daoh vọng cổ, anek hu nao giao lưu di ala bến Ninh Kiều atau anek hu mbaok tame ngak văn nghệ di tal bac. Tuk anek daoh blaoh, dom ayut thei jeng pah tangin ngak ka anek mboh biak bui sambai”.

Ilamu Đờn ca tài tử Nam Bộ oh padeih hu gru pato sahneng duah ngak bahrau meng panuac daoh tal jalan pato tacei saong bruk pandar dom nền tảng mạng xã hội, hu ba mai kadha chreih chai ka urang bac megru, abih di nyu lac dom uranaih. Ngan haong hatai ranam hu blaoh, tapa dom tal bac, dom rai ranaih daok patui jalan khik ramik saong cak rok patagok yaom glaong di ilamu daoh đờn ca tài tử, ba sap đờn – panuac daoh dak harei dak yava atah./.