Menuac maong iek urak ini kak kajap rup drei haong phone tangin saong ba bruk me-in sambai, giải trí tapa dom nền tảng online yau ye YouTube, TikTok... Cải lương tui nan jeng njauk salih karei, hu rilo janih jang yau ye ngak kênh YouTube dom kadha daoh tài tử, dom kadha hu asal katut, cakak panak dom labik gheih abih dalam dom vở tuồng piah ba tagok TikTok, YouTube...
Dom vở diễn atah 3 mon njauk cakak veik daok 2 mon, atau 90-100 minit. Hatai takre di urak ini lac katut panak, ndung bak makna saong gheih di abih. Pak rayo papar binguk peih sa vở cải lương tok dalam tukvak meng 90-100 minit. Mangaok YouTube oh ngak vở diễn min meda ngak dom kadha daoh, atau dom kadha hu asal yau ye: đờn ca tài tử, vọng cổ, ca lẻ... Dom kadha padang ngak veik jeng brei tui jalan phim cổ trang piah ngak jeng bruk bahrau bahrang, dui pachreih. Oh lac menuac maong iek mbaiy ka-ing haong cải lương bo pak cải lương jeng brei salih karei piah lagaih haong hatai takre saman ini.
Nghệ sĩ Quốc Tín, urang abih hatung hatian ka bruk cakrok cải lương mangaok dom nền tảng số, brei thau: “Cải lương lac janih ma-in bo urang Nam Bộ tuk halei jeng takre, saong menuac sia gah Barak jeng anit. Kol drei njauk roh duah salih bahrau jalan pang - iek di rahra piah lagaih haong jalan cakrok di menuac sia. Daok khang hatai khik bruk klak lac oh hu, kayua cải lương lac bruk patagok meng tài tử tal ca bộ. Cải lương njauk patagok piah khik hu suan yava, patagok piah lagaih haong jalan nao harei ini”.
Ðoàn Cải lương Hương Tràm urak ini jeng hu rilo salih bahrau biak siam tuk pabak hu bruk maong iek tui jalan Online. Ðoàn hu máy quay, máy padang rup thaot, phòng thu... Hadei di yaok vở diễn atau yaok malam pakacah di dom nghệ sĩ, đoàn hu ê kíp thu saong papar binguk veik taong abih dom danak dak mangaok blah fanpage, YouTube piah duh ka urang maong iek Online.
Langiu di nan, dahlau di tuk peih dom danak, dom malam ma-in hu padang ngak, đoàn jeng brei menuac padang trailer yaih khan, thaot binguk, brei thau, danak dak, diễn viên hu mbaok saong labik parang me-in... khan tagok dom nền tảng mạng xã hội. Ini lac jalan yaih khan samar drah saong siam lagaih di abih. Gam haong nan, đoàn jeng hu taom gaok puk palei ieu daong ba tagaok dom khau tin cambaih laih ka Jabat Ilamu – Brei thau huyện piah ba mai xã, ấp khan brei bhap bini thau meng jalan papar sap, nan lac jalan ngak ka đoàn parang me-in hu jak jeng dalam tukvak jaik ini.
NSƯT Lịch Sử, Trưởng đoàn Cải lương Hương Tràm, khan lac: “Urak ini saman công nghệ 4.0, oh meda nao ghe, nduac radaih khan, menuac mehit menuac oh mehit, drei njauk khan meng thaot biguk, meng khau tin. Dom blah mạng xã hội biak khang, drei pambak tame labik khang ini piah ba bruk ngak di đơn vị, oh lac bruk ngak di malam parang me-in, bo taong abih dom bruk ngak di đoàn nao tal menuac maong iek".
Ngan saong urang nghệ sĩ, bruk hu daoh hu ma-in ginup abih sa tuồng tích atau sa trích đoạn lac bruk haniem phul saong jeng lac bruk iek praong bruk ngak. Kayua yau nan ye, urang oh ka bhian randap saong oh ka lagaih hu haong dom nền tảng số, dom jalan ma-in sambai - giải trí bahrau bahrang. Nghệ sĩ Thanh Thảo khan lac: "Dahlak thau hatai takre di menuac maong iek lac hu iek hu maong mangaok mạng. Rilo adei sa-ai nghệ sĩ jeng nduac show quay dom trích đoạn katut panak piah ba tagok YouTube, TikTok..., min dahlak oh takre. Nyu samar drah saong srau kadau. Tuk nao parang me-in gaok menuac maong iek atau urang daok la pang drei daoh meng hu bruk pambuak gauk glaong saong nghệ sĩ jeng thau hu bruk urang takre atau oh ka njauk hatai ka drei".
Ngan saong dom nghệ sĩ ranaih, langiu di bruk klah rabha, pambak tabiak khau tin di mangaok mạng xã hội, urang daok hu dom mbang livestream, taom gaok ndom biai tapak haong urang takre cải lương piah dui pachreih rilo jang dom menuac maong iek. Dom mbang ghi hình dalam phòng thu pambuak haong ndom biai nao mai jeng taduan hu rilo panuac siam mekre meng dom menuac takre./.
Viết bình luận