Tui rami ramik di tỉnh, bhum ngak nong pandar ilamu glaong di huyện Ninh Sơn hu mblang taneh praong labaih 790 ha, pataom tame di dom xã Mỹ Sơn, Lương Sơn saong Quảng Sơn. Tal tukvak ini, langiu di dua janih phun pala rilo lac tabau saong bei plom, dalam huyện daok hu rilo bruk ngak nong pandar ilamu glaong haong rilo janih kaya nong siam. Dom janih pandap yau dưa lưới, nha đam, nho, kruac iak oh hu asal hu pala di labik ini hu mbaok di darak pasar dalam saong langiu negar. Tal harei ini, dalam huyện hu 9 doanh nghiệp (DN) hu mbaok tame gah ngak nong pandar ilamu glaong. Dalam nan, hu 3 DN raong glang, 4 DN pala drak, 2 DN ngak pandap. Rilo bruk ngak hu peih ngak tui jalan bahrau yau: Pala phun dalam sang halăm hu rami ramik nhiệt độ, ẩm độ, aia harei hadah; pala phun angaok mejam oh hu haluk; pandar ilamu pruh aia patak pataom di Israel; pandar jalan pala drak hữu cơ, VietGAP.

Hợp tác xã (HTX) Tương Lai Xanh (xã Lâm Sơn) hu labaih 10 urang ngak daok mong iek phun dưa lê Bạch Ngọc saong dưa lê Hàn Quốc. Ini lac bruk ngak nong hu padang ngak biak siam ngan haong sang halăm pacang halak halin hu ngak jeng sa môi trường pacang cakak biak siam ka phun pala, gam haong nan, bruk pandar ilamu pruh aia, buh khak tự động, hệ thống cakak pandiak, patrun nhiệt, rami ramik aia harei hadah, hệ thống điều hòa, ngak ấm, pabak CO2 hu ngak jeng labik biak laghaih daong ka phun dưa lê plaih hu dom bruk oh siam meng gah langiu. Sa-ai Phạm Văn Minh, Yam ndok HTX brei thau: Meng hu bruk daong di karja palei, HTX hu ngak binek padang aia saong jalan pajeng ba kaya nong piah pala dưa lê angaok mblang taneh 20 ha. HTX daok padang xưởng ngak dom janih pandap tamekai sấy dẻo, sấy racam, aia ép...

  Mai rivang Trang trại Ngọc Hiển di palei Tân Lập 2, xã Lương Sơn dalam dom harei puac thun 2021, pak ini yaok pluh urang ngak daok paik baoh kruac iak, saong daok cakak hala piah ngak ka phun tabiak bingu. Sa-ai Dương Đình Hiển, po labik ini bui sambai khan lac: Hadei di 3 thun pala tal urak ini phun kruac iak daok paik baoh. Meng ngak biak siam, rami ramik bhum pala tui talei saong hu parabha lô piah lagaih ka bruk mong iek jeng yau ba mac moc tame pala drak, ngak tabiak pandap. Angaok mblang taneh 30 ha, sa-ai hu pala tui jalan Plogap nan ye kaya nong hu pablei rilo tapa Hà Lan. Sa-ai daok brei thau lac: 1 ha kruac iak ba jien mek tame labaih 400 triệu đồng sa thun nan ye bruk ngak kaya meda angaok phun kruac iak lac bruk oh kan. Anak tal, dahlak meda padang HTX, pambuak haong urang nong di labik salih mblang taneh dom janih phun pala takik kein laba tapa pala phun kruac iak piah paglaong jien mek tame ka mikva.

Ong Dương Đăng Minh, akaok jabat ngak nong saong patagok palei pala huyện Ninh Sơn, brei thau: Huyện hu tabiak sarak piah pachreih dom D.N buh jien tame ngak nong pandar ilamu glaong. Ini hu mong yau sa dalam dom jalan ngak piah daong ka urang nong peih ngak siam bruk ngak di drei, pasiam bruk bilan pala, patrun bruk pambak tame langik tasik, pabak hu hatai caong khin di darak pasar ka chất lượng panda panda. Ngak tabiak pandap panda kaya nong hacih sa-at, ngak nong hữu cơ daok lac jalan njauk ngak, daong ka urang nong hu jien mek tame rilo jang, gam khik caga môi trường saong khik caga pren yava ka urang ngak gam urang blei pandar./.

Urang lang: Jasi -23/1/2022