Harei tame thun bac bahrau, 290 anek saih di Sang bac Phổ thông bangsa gam bac gam daok THPT Ninh Thuận thei jeng hu nyim tapuk giáo khoa. Adei Châu Văn Tuấn, anek saih tal 11A brei thau: Thun ini, dom tal bac 11 bac tui danak dak phổ thông 2018 nan ye taong abih tapuk giáo khoa hu sang bac brei nyim jeng lac tapuk bahrau ba mai.

 “Thun ini adei bac tal 11. Danak dak jeng bahrau saong tapuk giáo khoa jeng bahrau. Di sang bac gam bac gam daok brei nyim tapuk yau nan lac biak tak pataom jien padai. Di gah langiu blei tapuk jeng kan saong abih rilo jien ndo. Nyim tapuk piah palagaih ka dom adei bac siam jang".

Lac sang kathaot, oh hu jien piah blei tapuk bac ka 3 urang anek, min thun bac bahrau ini sa-ai Pi Năng Thị Thí daok di palei Chà Đung, xã Phước Thắng, huyện Bác Ái biak bui sambai kayua dahlau di harei tame thun bac ye taong abih 3 urang anek jeng hu sang bac brei nyim tapuk giáo khoa. "Sang adei lac sang kathaot, Karja jeng hu daong pandap bac ta-a ka anek di dahlak saong brei nyim tapuk giáo khoa nan ye sang dahlak biak bui sambai”, sa-ai Thí  khan yau nan. 

Di sang bac Phổ thông Bangsa Bán trú Tiểu học, THCS Ngô Quyền, huyện Bác Ái, langiu di dom bộ tapuk giáo khoa bahrau, sang bac daok hu pandar dom bộ tapuk giáo khoa klak dalam gilang tapuk brei ka anek saih nyim. Meng nan, dalam abih tih 550 anek saih di sang bac ye hu labaih 80% anek saih hu ginup tapuk giáo khoa piah bac. Amuk Lê Thị Lệ Quyên, Phaok akaok jabat pato megru huyện Bác Ái brei thau: “Jabat hu tacei pato kuhria caga ginup tapuk giáo khoa brei ka anek saih, yaok adei hu ginup 1 bộ tapuk.  Min ngan haong tapuk giáo khoa tal 4 saong tal 8 tal tukvak ini suai mai tal. Huyện hu tacei pato dom sang bac pandar tapuk giáo khoa điện tử piah pato ka dom adei tuk tapuk oh ka mai tal.”

Min ong Nguyễn Văn Lợi, akaok Cty Cổ phần Tapuk saong pandap panda sang bac Ninh Thuận brei thau, angaok darak pasar urak ini bộ tapuk giáo khoa ka dom tal bac 4 saong 8 oh kurang. Kayua Cty Cổ phần Tapuk saong Pandap nda Sang bac Ninh Thuận urak ini hu blei mai labaih 1.450.000 akaok tapuk. Ta-eng tapuk giáo khoa peih ngak tui danak dak pato megru phổ thông thun 2018 dalam thun bac ini lac 387.000 akaok tapuk.

 “Ta-eng thun ini, tapuk tal 4, tal 8 saong tal 11 urak ini Sở GD&ĐT daok đấu thầu saong urak ini tui khaol dahlak thau, bruk đấu thầu hu salah blaoh. Thun ini, hadei di harei peih thun bac bahrau 3-4 harei ye anek saih hu tapuk piah bac. Jalan ngak ka anek saih bhum ceik, bhum kan kandah hu nyim tapuk daong palgaih ka dom anek saih bhum kan kandah hu tapuk piah bac. Urak ini, oh njauk lac tỉnh halei jeng ngak hu yau nan. Tỉnh Ninh Thuận biak sangka tal bruk daong tapuk giáo khoa ka anek saih nyim piah nao bac.”

Thun bac 2023-2024, tỉnh Ninh Thuận peih ngak danak dak pato pakai  phổ thông bahrau ka anek saih khối tal 4, 8, 11. Kayua abih rilo tukvak ngak harak gar đấu thầu pabak tapuk tui adat hukum, nan ye, hu dom akaok tapuk tal urak ini jeng oh ka tal tangin anek saih. Kayua yau nan ye, bruk dom sang bac brei ka anek saih nyim tapuk hu mong yau jalan ngak biak siam, laghaih, pabak hu samar drah ka bruk pato saong bac, taphia di nan, daong khik hu ginup mbaok dom anek saih./.