Peih ngak bruk jak ba “Abih rahra jumpataom padang ngak palei pala bahrau, đô thị hadah krah”, urang jakar, rahra palei Hamu Traok jum pataom gauk, ba gauk padang raidiuk bahrau. Meng nan, palei Hamu Traok dak harei dak hadah hadai, gheih mekre, raidiuk di urang Cam pak ini dak harei dak hu glaong tagok. Abih di nyu nan lac, meng di tuk ilamo ngak lan am hu UNESCO vak tame harak angan inem krung ilamo oh maong mboh njauk khik ramik samar drah, rahra di palei Hamu Traok dak thau iek praong yaom glaong di inem krung, jumpataom gauk, kham marat, sahneng duah bahrau, khik ramik, cak rok patagok palei ngak. Ong Trượng Văn Tận, Phó akaok Ủy ban MT negar Việt Nam ban sit Phước Dân, huyện Ninh Phước, Ninh Thuận chreih chrai ndem lac: “Harei ini lac piah ka mikva taom gaok gauk, bac ilamo dom jalan ngak mbang, abih di nyu nan lac bruk ngak lan…”

Di dua palei Hữu Đức – Thành Đức pak xã Phước Hữu, huyện Ninh Phước. Dahlau di tuk peih ngak harei jumpataom abih bangsa, rilo bruk ngak ilamo, daoh tamia, thể dục, thể thao, dom kadha ma-in meng kan hu peih tabiak dalam chreih chrai, bui sambai di taong abih dom palei. Amuk Thiên Thị Kim Thái, palei Hữu Đức, xã Phước Hữu, huyện Ninh Phước, tỉnh Ninh Thuận brei thau: “Kayua bruk jumpataom gauk saong bruk sangka di dom pakat kanja, nan ye raidiuk di mikva dak harei dak cak rok patagok jang…”

Bruk jumpataom gauk di rahra dua palei Hữu Đức – Thành Đức oh lac brei mboh di Harei jumpataom abih bangsa bo daok hu patagok dalam yaok danak dak, yaok bruk jak ba, rik daong peih ngak jayah bruk cak rok patagok kinh tế, xã hội di palei. Amuk La Thị Thanh Thúy, palei Hamu Taranh, xã Phước Hữu, huyện Ninh Phước, t.Ninh Thuận ndem lac: “Tapa harei ini, dua palei Hữu Đức saong Thành Đức tuk halei jeng jak ba gauk gam cak rok patagok kinh te baoh sang…”

Langiu di bruk iek glaong dom bruk ngak pamaong tal urang kan kathaot, urang gaok kan kandah, tapa peih ngak dom bruk ilamo, daoh tamnia, thể thao, harei roya jumpataom abih bangsa di dua palei Hữu Đức – Thành Đức thun ini hu ngak jeng bruk chreih chrai pakacah gauk saong kak kajap bruk jumpataom gauk dalam rahra. Ong Phú Văn Xã, Bí thư Chi bộ palei Thành Đức, xã Phước Hữu, huyện Ninh Phước, tỉnh Ninh Thuận ndem lac: “Harei ini lac harei roya jumpataom dua palei, ini lac harei piah pambuak mikva gilac veik…”

Samar drah pok mayaom dom manuac urang, kapul nyaom abih drei hu mbaok tame dom bruk ngak di palei; padang ngak palei hijao, hacih, mekre, oh hu tệ nạn xã hội. Ong Lưu Văn Thủy, Phó akaok Uỷ ban MT negar Việt Nam huyện Ninh Phước, tỉnh Ninh Thuận ndem lac: “Thun ini, hu dua bhum palei peih ngak Harei roya jumpataom gauk dalam bangsa thun 2023…”

Bruk bui sambai, chreih chrai di harei jumptaom abih bangsa pak palei Hamu Traok, ban sit Phước Dân saong dua palei Hữu Đức – Thành Đức, xã Phước Hữu hu rik daong pachreih ba rahra dom bangsa dalam huyện Ninh Phước jumpataom pakacah gauk ngak mbang, pala drak, peih ngak jayah dom bruk cak rok patagok kinh tế - xã hội, rik daong dak padang puk paga, palei negar dak harei dak cak rok patagok./.