Rilo urang nong di tỉnh Ninh Thuận khang hatai daok ba dom pajaih bahrau tame pala drak dalam bilan ini

Dom pajaih bahrau hu rilo urang nong di Ninh Thuận ba tame ngak lac ML214, TH41, OM 4900. Ini lac dom janih pajaih hu gah ngak nong pachreih ngak rilo. Hadei di tuk mboh rilo mikva dalam palei pala hu kein laba, vụ hè - thu 2022 ini, ong Thuận Văn Tương daok di palei Hiếu Lễ, xã Phước Hậu, huyện Ninh Phước trun pajaih bahrau DV108 di mblang taneh praong 5 sào. Ini lac janih pajaih hu rilo siam lagaih, meda salih hu ka dom janih pajaih klak oh daok lagaih di pak ini. Ong Thuận Văn Tương bui sambai khan lac: “Janih pajaih bahrau bo Kanja pabak biak mbuan tamuh…”

Lac urang hu angan je di xã Phước Hậu, Ong Quảng Đại Thắng brei thau lac: Bruk pala drak samu gauk tui jalan mblang hamu praong hu daong ka urang nong hu lagaih dalam bruk trun pajaih saong tui iek jit ruak:

Tapa duah thau, mboh lac mikva daok caong hu ngak veik praong jang dalam tukvak anak tal. Ong Đổng Phát –lac sa dalam dom urang nong hu daong pajaih di vu ini brei thau: “Di mbang pala drak vụ Hè - Thu ini, kayua hu bruk sanka iek glang di Đảng ủy, UBND, hu ba dom pajaih DV108 ka puk pale…”

Piah ka urang nong khang hatai ngak padai chat luong glaong hu kein laba jang, UBND huyện Ninh Phước hu rami ramik pok jien meng kadung jien daong ngak padai tui Sarak 62 di rajaei piah peih bruk ngak tabiak rilo pajaih padai hu chất lượng, ngan haong tanut daong ka yaok xa, yaok ban sit meng 40 ha tal 50 ha. Hu mbaok tame ngak bruk ini, urang nong hu daong mateh pajaih, mateh pandap ngak nong saong hu blei veik abih padai hadei di tuk yuak bloh. Huyện Ninh Phước pachreih urang nong pandar ilamo kỹ thuật saong công nghệ bahrau tame ngak padai chất lượng glaong yau bruk “sa njauk, 5 trun”, pandar ilamo kỹ thuật tui iek jit ruak, halak halin tui tacei pato di Sở Ngak nong saong patagok palei pala.

Ong Nguyễn Đức Thuận, akaok Jabat ngak nong saong patagok palei huyện Ninh Phước ndem lac: “UBND huyện hu tacei pato UBND dom xã, ban sit pandar kadung jien daong ngak padai tui Sarak Rajaei piah pataom tame ngak dom pajaih bahrau. Bruk ngak pajaih padai bahrau ini, thun ini dom xã peih ngak biak khang. Dalam nan, pataom tame daong ka urang nong ngak tui adat lac mateh pajaih saong jru khik caga phun pala ka mikva ngak tui dom bruk nmgak iek. Gam haong nan, peih  dom tal pato pasram ka mikva thau hu ilamo piah ba pajaih bahrau tame ngak piah paglaong năng suất vụ hè thu ini, khol dahlak taong yaom lac mek hu kein laba biak glaong”.

Rilo urang nong di tỉnh Ninh Thuận khang hatai daok ba dom pajaih bahrau tame pala drak dalam bilan ini, brei mboh jalan nao njauk piah paglaong jien mek tame dalam bruk ngak padai di mikva. Min, dom janih pajaih bahrau ini, lac pajaih padai phun khang nan ye dalam tuk pala drak, mikva brei ngak taneh biak siam, plaih bruk pon daok kandaong veik di mblang hamu ka oh ralai abih ngak jhak ka taneh, ngak ka phun padai oh tamuh siam./.

Urang lang: Thu Thao – 05/07