Doanh nghiep ba bruk ngak ka urang ngak di palei pala

Hadei di tuk bac salah bruk jhik công nghiệp, adei Bùi Thị Ngọc Linh haong 30 urang bac, hu Sang bac Cao đẳng nghề Ninh Thuận ba tame pasram ngak iek di Cty cổ phần May Tân Tiến tui danak dak pambuak bruk pato pakai di dua gah. Meng hu tacei pato pak di Cty nan ye dalam tukvak katut panak, Ngọc Linh ngak hu rilo bruk kan ngak jang, pabak hu hatai caong di Cty. “Adei bac di Sang bac Cao đẳng nghề. Adei gam bac lý thuyết, gam bac ngak , daong ka adei ngak samar jang. Adei ngak hu rilo jang. Adei gam bac, gam jhik iek, tuk tame Cty ngak adei meda jhik hu dom labik kan jhik, meda ngak hu rilo jang saong siam jang.”

Tui Thạc sỹ Nguyễn Phan Anh Quốc, Hiệu trưởng Sang bac Cao đẳng nghề Ninh Thuận, urak ini, sang bac hu mbaoh tangin pambuak bruk pato pakai haong 3 doanh nghiệp dalam tỉnh, dalam nan pato pakai dom bruk langiu ngak nong bo tỉnh daok hu prein khang yau bruk jhik saong ngak kaya ikan. Tui danak dak pambuak bruk pato pakai, langiu di bruk daong jien bac ka urang bac, dom doanh nghiệp daok hu bruk ngak haong yaom jien bilan tani tanat ka urang bac hadei di tuk bac tamat. “Kol dahlak hu pambuak bruk khang kajap haong dom doanh nghiệp dalam tỉnh Ninh Thuận lac Cty kaya ikan Thông Thuận, Cty Jhik Tiến Thuận piah pato pakai ka urang ngak daok di palei pala. Kol dahlak pato lí thuyết di sang bac saong ngak iek pak di doanh nghiệp. Meng bruk bac ngak iek pak di  doanh nghiệp hu daong ka dom urang bac hadei di tuk bac tamat hu doanh nghiệp taduan tame ngak, dom adei ngak hu bruk chip saong hu jien bilan tani tanat. Kol dahlak taong yaom ini lac bruk ngak hu siam lagaih. Anak tal, kol dahlak daok pambuak haong dom doanh nghiệp piah pato ka dom urang bac tui jalan lac taong abih urang bac bloh jeng hu bruk ngak.”

Hadei di 3 bilan bac bruk jhik công nghiệp di sang bac Cao đẳng nghề Ninh Thuận, sa-ai Katơr Thị Diệu daok di xã Lương Sơn, huyện Ninh Sơn hu sang bac ba tame ngak bruk di Cty Cổ phần dệt Gia dụng Phong Phú tui danak dak pambuak bruk di 2 gah. Meng yaom jien bilan labaih 5 triệu đồng sa bilan, sa-ai Diệu mboh sahanang hatai piah ngak bruk suai lavik haong Cty. Daok sa-ai Thành Ngọc Lâm Quế, lac urang Cam daok di palei An Xuân, xã Xuân Hải, huyện Ninh Hải, hadei di 2 thun ngak công nhân di Cty Cổ phần dệt Gia dụng Phong Phú,  sa-ai Quế hu pok ngak Tổ trưởng, saong yaom jien bilan jaik 8 triệu đồng.“ Tapa tukvak ngak bruk di Cty, hu daong ka dahlak hu bruk ngak tani tanat, jien bilan di dahlak meng 7-8 triệu đồng. Urak ini jeng ginup mbang cai, raong sang.”

Ong Bùi Trọng Vĩ, Yam ndok điều hành – Cty Cổ phần dệt gia dụng Phong Phú, Ninh Sơn brei thau, Cty hu 800 urang ngak, rilo meng lac urang daok dalam palei. Dalam nan hu jaik 100 urang bangsa takik. Dahlau di tuk  hu taduan tame ngak bruk, meng hu pato bruk ngak, gam haong bruk caong duah bruk ngak di urang ngak, nan ye hadei di tuk hu tame ngak bruk, rilo urang ngak pabak hu biak siam bruk ngak. “Kol dahlak ba mbuan lagaih di abih ka dom adei lac urang bangsa takik piah hu bruk ngak saong hu jien bilan tani tanat. Kol dahlak jeng bui sambai mboh lac dom adei hu tangin gheih ngak saong ngak bruk biak siam. Kol dahlak daong palagaih ka urang ngak dalam palei saong bhap bini bangsa takik duah hu bruk ngak, hu jien mek tame saong hu jalan piah cakrok patagok.”

Bruk dom sang bac pato bruk ngak pambuak pagam haong doanh nghiệp saong ba brei bruk ngak hadei di tuk bac tamat, abih di nyu lac urang ngak daok di bhum palei pala, urang ngak lac bhap bini bangsa takik hu daong langyah bruk ngak, daong ka urang ngak di palei pala hu jien mek tame tani tanat, pasiam raidiuk saong yam tagok tabiak truh kan kathaot./.

Urang lang: M. Phuong – 24/07