Dahlau daih, sa-ai Lưu Văn Xuân ngak bruk dalam sa Cty jhik di ban raya HCM. Min tuk jit ruak tamuh tabiak, Cty kreih pabah mbang, sa-ai oh hu bruk ngak nan ye sa-ai mai veik palei. Akaok thun 2022, sa-ai hu Xí nghiệp jhik Từ Tâm, huyện Ninh Phước, tỉnh Ninh Thuận pilih ruah tame ngak bruk haong yaom jien bilan 6 triệu đồng sa bilan. Sa-ai Lưu Văn Xuân chreih chrai khan lac:

“Mai ini ngak bruk takik abih jien, hu daok jiak sang yau nan ye mboh tani tanat”.

Dahlau daih ngak bruk dalam gah raong pala kaya ikan, oh thau bruk jhik, min anai Bá Thị Kim Thanh daok di xã Phước Hải jeng hu Xí nghiệp jhik Từ Tâm pilih ruah tui jalan gam bac gam ngak, haong yaom jien bilan tuk camereip lac 4 triệu meteh sa bilan. Hadei di dom bilan nao ngak, sa-ai Thanh hu pato pakai bruk ngak saong dak harei dak ngak siam bruk ngak, saong hu tagok jien bilan 6 triệu đống sa bilan.

Tal urak ini, dalam 14.000 urang ngak mai palei, hu labaih 6.000 urang ngak hu ngak bruk veik, dalam nan hu jaik 2.500 urang duah hu bruk ngak di doanh nghiệp dalam tỉnh. Dom urang ngak oh ka duah hu bruk ngak, daok kham merat duah bruk ngak tapa dom sàn giao dịch piah tani tanat raidiuk pak di palei.

Ong Lê Thanh Trí – Cty TNHH Sản xuất pajaih kaya ikan Minh Phú, huyện Ninh Phước, tỉnh Ninh Thuận brei thau:“Jien bilan di kỹ sư lac 7 triệu 200 rabau đồng sa bilan pasram bruk saong 8 triệu đồng sa bilan tuk tame ngak, cao đẳng lac 6 triệu 300 rabau đồng sa bilan pasram bruk saong 7 triệu đồng sa bilan tuk tame ngak, daok urang ngak lac 5 triệu 400 rabau đồng sa bilan pasram bruk saong 6 triệu đồng sa bilan tuk tame ngak. Langiu jien bilan, daok hu jien thưởng yaok bilan tui prein ngak.”

Yaok bilan di harei 5 saong harei 20, tuk mon 7 meteh, Pasak Dịch vụ bruk ngak tỉnh Ninh Thuận peih Sàn giao dịch bruk ngak piah ka doanh nghiệp haong urang ngak hu taom gaok gauk, ndom biai nao mai, tapa nan daong ka urang ngak duah hu bruk ngak lagaih haong prein, haong hatai takre di drei, saong pabak hu bruk pilih ruah di dom doanh nghiệp. Meng akaok thun tal ini, Pasak hu peih 63 mbang giao dịch bruk ngak, hu labaih 2.600 urang ngak hu tacei jalan, yaih khan bruk ngak. Langiu di dom mbang giao dịch tapak, Pasak daok hu pambuak bruk haong rilo doanh nghiệp langiu tỉnh tư vấn online, brei thau dom gah, dom bruk daok caong hu urang ngak, piah ka urang ngak pilih ruah, duah bruk ngak ka nyu lagaih haong prein, haong tangin ngak di drei.

Ong Võ Ngọc Phương, Chủ tịch UB bhap bini xã Lợi Hải, huyện Thuận Bắc, tinh Ninh Thuận brei thau lac xã daok duah bruk ngak ka urang ngak: “Xã daok ieu da-a dom doanh nghiệp jhik, dom gah laok kanduh asar pa-ak blait piah peih praong bruk ngak, piah ba bruk ngak ka urang ngak dalam palei.”

Thun 2022, Ninh Thuận kham merat ba bruk ngak bahrau ka 16.000 urang ngak. Piah ngak hu bruk nan, tỉnh tacei pato gah chức năng pambuak bruk haong dom huyện, ban sit dalam tỉnh pasang iek veik bruk caong hu bruk ngak di palei piah pambuak haong Pasak Dịch vụ bruk ngak peih bruk tacei jalan ka rahra nao ngak bruk di dom doanh nghiệp, labik sản xuất daok caong pilih ruah urang ngak dalam tỉnh atau di dom tỉnh, ban gah Meraong yau ye: Đồng Nai, Bình Dương, Ban raya HCM…

Ong Hà Anh Quang - Yam ndok Sở LĐTBXH tỉnh Ninh Thuận, lac: “Urang ngak hu tangin gheih ngak di kol drei piah caga ngak gah du lịch atau dom doanh nghiệp caong hu urang ngak hu ilamu glaong ye urak ini tỉnh jeng daok pasang iek piah ba tabiak jalan pato pakai njauk tui bruk patagok KTXH di tỉnh piah duh ka dom gah ngak praong di tỉnh kol drei, min kadha praong lac bruk taom gaok di doanh nghiệp haong urang ngak meng langiu tỉnh dui pachreih mai tỉnh piah pabak bruk di anak meta, piah ba bruk ngak ka urang ngak gaok kan kandah meng jit praong.

Piah ba bruk ngak ka urang ngak gaok kan kandah meng jit praong Covid-19 dalam tỉnh, anak tal, Ninh Thuận daok brei jhul khang bruk pato, pasram bruk ngak tui hatai caong di doanh nghiệp, pataom tame dom bruk pabak ka patagok dom gah kinh tế praong di tỉnh; padang cơ sở dữ liệu quốc gia ka urang ngak, bruk ngak piah pabak bruk khik ramik saong peih ngak dom sarak ka urang ngak, bruk ngak hu tantu, cambaih laih; samar drah, saong ba mbuan lagaih ka dom doanh nghiệp, labik sản xuất hu mesraiy phun jien piah peih praong bruk ngak mbang, dui pachreih rilo jang urang ngak tame ngak bruk. Meng bruk peih ngak samu gauk dom jalan ngak, tỉnh kham merat patrun bruk urang ngak oh hu bruk ngak di thun 2022 mala tanut 3%, patagok urang ngak hu pato bruk ngak meng 64 - 65%./.

Urang lang: M.Phuong – 2/8/2022