Pasak ilamo ka urang Cam di Palei hamu Tanran Hữu Đức, xa Phước Hữu, huyen Ninh Phước hu buh jien tame labaih 13 tỷ đồng. Ini jeng lac sa labik piah peih ngak dom jai padhih sukan palei pala. Thun ini, langiu di bruk peih ngak dom jai dait balong, taong balong saong pakacah daoh tamia, mbang camriep di palei Hamu Tanran Hữu Đức, xa Phước Hữu, huyen Ninh Phước peih ngak jai pakacah nduac ka rahra. Saai Lưu Anh Thái, di palei Hamu Tanran Hữu Đức, xa Phước Hữu, huyen Ninh Phước, Ninh Thuận brei thau lac.

“Thun ini, bahrau abih lac hu peih pakacah nduac. Yaom lac thun camriep peih ngak min mikva biak pachreih tui…”

Daok saai Đạo Văn Vương brei thau lac, danak dak padhih sukan di ini biak chreih chrai, nan ye hu dom ayut saabat daok di Ban raya HCM jeng mai palei hu mbaok tame.

“Dahlak mboh dom kapul hu mbaok tame pahat pasram rup pabhap biak chreih chrai. Hu urang mai meng Sài Gòn jeng mai palei hu mbaok tame…”  

Xa Phước Hữu ieu lac sa bhum palei camriep di huyen Ninh Phước padang ngak Pasak dait balong ka rahra. Bahrau pandar 2 thun ini mai, min tal bac dait balong hu 50 urang bhian hu mbaok tame pasram pahat rup. Saai Bá Kin daok di palei Hamu Tanran Thành Đức brei thau:

“Tapa tukvak masa padang pasak caoh bar ka rahra ye dom amaik ame jeng brei ka anek nao pasram biak rilo…”

Tui ong Võ Đức Khang, Phaok Yam ndok Pasak Ilamo, Thể thao saong Papar sap huyện Ninh Phước, Ninh Thuận, kuhria tal urak ini, taong abih 9/9 xã, ban di huyện Ninh Phước hu 26 mblang pasram pahat rup, 74 mblang taong balong. Dom danak dak jai padhih sukan hu huyện Ninh Phước peih ngak yaok thun, lac mbang piah ka dom urang hu mbaok tame pakacah, gam tui di nan jeng jhul khang danak dak padhih sukan di ini:

“Yaok thun, huyen jeng khik tani tanat peih ngak dom jai dait balong, padhih sukan saong Peih ngak danak dak adaoh tamia ka bhap bini rahra. Piah ngak hu siam jang, Pasak jeng hu pambuak haong dom xa peih ngak dom jai ilamo ma-in, pasram pahat rup. Tapa dom harei pataom mbaok ilamo meng kan yau ye harei Katê, rija roya ilamu meng kan saong dom harei pataom, raya praong di negar peih ngak dom mbang pakacah, tapa nan paglaong dom janih seni nghệ thuật, dom janih pakacah padhih sukan, dom kadha ma-in meng kan gam pato pakai ilamo meng kan. Meng nan, jhul khang bruk cak rok patagok dom mon padhih sukan di bhum labik urang Cam saong pilih ruah dom urang nao pakacah di huyen saong tinh.”

Urak ini, dom bhum palei di bhum mikva urang Cam di huyen Ninh Phước di halei jeng hu mblang pasram pahat rup piah ka rahra bhian pasram pahat rup saong pakacah padhih sukan. Rilo jai thể thao, ba drei tame pakacah jai padhih sukan hu dom bhum palei peih ngak, pachreih hu rahra hu mbaok tame pakacah saong pachreih ba, ngak bui sambai, chreih chrai, paglaong prein yava saong khik tani tanat bruk cak rok patagok bruk pasram pahat rup, padhih sukan di dom palei pala Cam./.