Ini lac thun ka 2, sang bac Tiểu học Khánh Hội, huyện Ninh Hải peih ngak bruk sang bac haniem phul. Dom mon bac di labik ini jeng hu dom bruk ba drei tame duah thau atau peih akaok mon bac meng dom kadha me-in pak di labik, daong ka anek saih saong gru pato hu dom mon bac biak bui sambai, chreih chrai. Adei Nguyễn Huỳnh Anh Khang, tal bac 3B, Sang bac Tiểu học Khánh Hội, huyện Ninh Hải brei thau: “Yaok harei anai gru brei me-in dom kadha me-in bo adei oh ka bhian hu me-in. Taong abih anek saih dalam tal bac me-in biak bui sambai, biak chreih chrai. Tapa nan ngak ka adei mboh biak takre nao bac yaok harei.”

Gru Trương Văn Đại, hiệu trưởng sang bac Tiểu học Khánh Hội, huyện Ninh Hải brei thau, meng bruk takre nao bac, dom gru pato pak ini daok kham merat ngak ka dom mon bac di anek saih mboh biak hu haniem phul. Saong haniem phul dahlau di abih lac mai meng bruk ngak ka anek saih mboh bui sambai nao bac yaok harei.

 “Ngak jeng talei rohim siam mekre di gru haong gru, di gru haong anek saih, di anek saih haong anek saih. Meng nan, daong ka dom adei bac da-a hu siam. Abih di nyu lac oh ngak trak damak ka anek saih tuk bac ta-a.”

Di dom sang bac dalam huyện Ninh Phước, bruk padang sang bac haniem phul hu peih ngak iek di pakat bac THCS. Sang bac THCS Phan Đình Phùng, huyện Ninh Phước hu pilih ruah asal kadha ka thun bac ini, lac padang sang bac haniem phul haong hatai caong khin anek saih yaok harei nao tal sang bac lac sa harei bui sambai. Adei Kiều Thị Mỹ Duyên tal bac 7A, sang bac THCS Phan Đình Phùng brei thau:  “Tame thun bac, sang bac di adei peih ngak bruk sang bac haniem phul...”

Jeng hu hatai sahneng yau dom ayut, Kiều Hồng Vy jeng bac tal 7A, Sang bac THCS Phan Đình Phùng brei thau, adei oh daok mboh huac tuk nao bac: “Adei mboh lac nao bac biak bui sambai.”

Piah ka anek saih oh daok mboh huac, dom gru pato di sang bac tuk halei jeng caik hatai sangka daong ka dom adei khang hatai jang, jia tame rup drei jang tuk dang ndom biai anak tal bac. Gam haong nan, tacei pato ilamu ndom puac, brei thau hatai sahneng di drei dalam tal bac piah paglaong siam mekre bruk bac ta-a. Ngak habar piah padang hu sa labik bo anek saih tuk nao bac mboh biak bui sambai, kanal hadar, oh mboh trak damak hagait. Anai Kiều Thị Huyền Trần, gru pato di sang bac THCS Phan Đình Phùng, huyện Ninh Phước brei thau: “Padang sang bac haniem phul ye dahlak brei salih jalan pato ka nyu lagaih.”

Gru Nguyễn Anh Linh, Phaok Yam ndok Sở Pato Megru Ninh Thuận khan lac, thun bac 2023-2024, Ninh Thuận peih ngak haong gauk 2 danak dak, danak dak klak 2016 ka dom tal bac 5,9,12 saong danak dak phổ thông bahrau 2018 ka dom tal bac daok veik. Anek saih hu ba drei tame duah thau rilo jang, hu tacei jalan bruk ngak aval jang, bruk pato pakai jeng lagaih haong sang bac haniem phul bo gah Pato Megru tỉnh Ninh Thuận ba tabiak pak di dalam thun bac ini: “Sở Pato Megru hu pambuak bruk haong Mintri Pato Megru hu tacei pato, peih pasram ka dom sang bac padang ngak saong peih bruk sang bac haniem phul, ngak habar ka taong abih dom sang bac khik hu dân chủ, siam mekre dalam taom gaok, ndom biai nao mai piah ngak jeng labik siam di abih ka anek saih, urang jakar, gru pato jeng hu mbaok tame, ba mai siam mekre di abih ka bruk pato saong bac."

Gah pato megru hu tabiak harak tacei pato padang ngak sang bac haniem phul di dalam tỉnh, saong hatai caong kin pambak tabiak bruk ba akaok nao dahlau di hiệu trưởng dom sang bac, halan hatian salih bahrau piah ba mai haniem phul ka anek saih. Piah ka yaok harei nao tal sang bac lac yaok harei bui sambai di dom adei./.