Ninh Thuận nan lac puk palei hu rilo drap ar langik tasik, ilamo rilo janih siam gheih dut haong dom tỉnh, ban dalam bhum jeng yau dalam taneh aia. Ngan haong 2 Bein negar nan lac Núi Chúa, Phước Bình saong drap ar ilamo Cam, dom bruk ngak rivang ma-in padeih padei, rivang ma-in padhih tasik, rivang ma-in sinh thái... nan lac dom kadha biak karei piah ka dom puk palei karei pambuak pagam haong Ninh Thuận, ngak jeng rilo pandap panda rivang ma-in biak gheih karei, hu pren meriak gauk glaong. Amuk Phạm Thị Thanh Hường, Phaok akaok Sở Ilamo, Padhih saong Yulit tỉnh Ninh Thuận brei thau: “Pren khang gah rivang ma-in di Ninh Thuận nan lac hu, khaol dahlak caong khin hu patagok birau. Ninh Thuận oh njauk lac daok dang kreh labik di dom tỉnh prong bo kanda, njauk khang hatai klah rabha dom kan kandah jeng yau dom mbuan lagaih”.

Ninh Thuận - Bình Thuận – Khánh Hoà saong Lâm Đồng nan lac 4 puk palei daok dalam cụm pak kieng cak rok patagok bruk rivang ma-in pakat negar nan lac Đà Lạt - Nha Trang - Phan Rang - Phan Thiết. Piah ngak brei cambaih laih bruk pambuak gauk cak rok patagok rivang ma-in, meng blaoh, Ninh Thuận hu pambuak haong Bình Thuận peih ngak rilo bruk yau giải pakacah radaih địa hình angaok cuah, giải Golf Ninh Thuận - Bình Thuận pambak prong..., brei mboh bruk pambuak gauk di sa baoh sang. Ong Nguyễn Văn Khoa, akaok kapul nyaom rivang ma-in Bình Thuận brei thau: “Dalam tukvak tapa, khaol dahlak hu mboh 2 Sở Ilamo, Padhih saong Rivang ma-in Ninh Thuận saong Bình Thuận dang tabiak peih ngak rilo bruk gah padhih , gah rivang ma-in. Cambaih laih nan lac pakacah golf, pakacah radaih mô tô vòng 1, vòng 2, dahlak saneng ini lac bruk ngak sumu yau gauk  bo khaol drei lac dua bhum palei min sa labik padeih.”

Langiu di dom bruk ngak padhih, rivang ma-in, tukvak tapa, Ninh Thuận jeng pambuak bruk haong Khánh Hoà ka gah manuac urang ngak piah cak rok patagok yaom inem krung bimon Cam Po Nagar di TP. Nha Trang. Ninh Thuận pataom hu rilo drap ar piah cak rok patagok bruk rivang ma-in yau ilamo, labik rivang siam gheih, atah di mblang kapal haok Cam Ranh jaik 60 km. Yau nan min, kayua daok kurang ralo janih jalan mbak, labik daok padeih padei saong bruk duh katuai nan ye oh ka pachreih hu rilo tuai damuai mai Ninh Thuận.

Ong Trần Minh Đức, Phaok akaok Kapul nyaom Yulit Nha Trang - Khánh Hoà brei thau, rilo doanh nghiệp lữ hành di Khánh Hoà jeng saneng kuhria tuk peih ngak dom tour nao tal Bein Negar Phước Bình rivang iek, ma-in sambai, kayua lac pak ini oh ka grap tanat hu labik ndih tapa melam ka tuai damuai nao tui kapul nyaom. 

Tui ong Đức, meyah Ninh Thuận pabak hu dom kadha hu khan di angaok nan ye dom  tour mai  rivang main di Khánh Hoà meda hu pambuak gauk jeng chuỗi tour rivang ma-in Nha Trang – Ninh Thuận, dalam nan hu labik mai “Giấc mơ Cha Pi – Bein Negar Phước Bình” pambuak pagam haong Tà Giang – Khánh Sơn piah ngak jeng labik trekking. Langiu di nan Ninh Thuận daok hu Bein Negar Núi Chúa, abih di nyu lac hu ceik patau min urak ini oh ka hu urang thau tal rilo.

Piah peih ngak siam pren khang di puk palei piah ba bruk rivang ma-in cak rok patagok, Ninh Thuận hu dang tabiak peih ngak bruk pambuak pagam haong Lâm Đồng, Bình Thuận saong jaik di ini lac haong Khánh Hoà.

Tui ong Lê Diệp Thanh Tùng, Phaok akaok Kapul nyaom rivang ma-in tỉnh Ninh Thuận, ini lac bruk ngak piah ka dom doanh nghiệp pablei salih bruk rivang ma-in hu dom jalan ngak piah pambuak pagam labik, daong gauk cak rok patagok bruk rivang ma-in khang kajap: “Dom gah ba tuai damai nao ma-in, dom urang bhian padang  tour njauk daok ala biai gauk, bruk ngak ini biak njuak ngak, hadei di nan meng tabiak dom janih pandap piah pambuak bhum. Tuk tuai damuai đặt tour mai Ninh Thuận ye jeng hu thaik binguk di Nha Trang dalam nan saong cagar veik. Hadei di nan khaol drei sanya haong gauk ka pandap panda, abih di nyu lac dịch vụ di dua gah njauk yasa haong gauk.” 

Piah bruk pambuak gauk dak harei dak tame dalam ye caong khin hu jalan ngak atah dua saong yaok thun njauk peih bruk ginum biai, bac megru ilamo ka bruk khik iek, padang dom tour rivang ma-in, bhian khan brei ka gauk thau khaw tin ka darak pasa, sarak brei ka bruk rivang ma-in di yaok puk palei. Meng nan ngak jeng mạng lưới pambuak pagam labik, pambuak gauk dalam chuỗi pabak brei dịch vụ, ba mai kadha pachreih tuai damuai./.