Yaok ratuh baoh sang di 2 xã Mỹ Sơn haong Nhơn Sơn daok duh hatai tuk daok daok dalam baoh sang ra-ai

Sang sa-ai Cao Ngọc Quang. palei Lương Cang, xã Nhơn Sơn, huyện Ninh Sơn bahrau ngak salah saong tame daok hu labaih 5 bilan. Min kayua sang sa-ai daok jaik jalan roya 27 nan ye dalam tuk pasiam jalan roya 27, gah padang ngak nyu ngak ka sang sa-ai Quang mbaih, ra-ai. Kayua ini lac bruk ngak praong di tỉnh nan ye sang sa-ai Quang jeng ba mbuan lagaih ka gah padang ngak piah ngak salah jalan. Min mbiah tal urak ini, bruk bayar jien, daong kayua talah, ra-ai sang ka sa-ai Quang jeng oh ka hu langyah.“Tuk jalan daok ngak pasiam ye sang mbaih, ra-ai, radaih lu ngak ra-ai. Gah padang ngak jeng hu da-a karja xã tame pasang iek sang danaok, jeng hu mbaoh tangin tame harak brei thau labik halei mbaih, ra-ai. Blaoh gah padang ngak tabiak nao oh ka mboh hagait.”

Oh dreih yau sang sa-ai Quang, sang di anai Vũ Vạn Xuân di palei Lương Cang, xã Nhơn Sơn, huyện Ninh Sơn daok tapen jalan roya 27, dalam tuk padang ngak pasiam labik jalan nao tapa sang, gah padang ngak mek radaih lu piah lu jalan biak khang, ngak ka baoh sang ra-ai talah di rilo labik daning dalam bilik taduan tuai, bilik ndih, sang ging. Urak ini, rilo labik ra-ai nyu talah atah, ia harei tame hu saong praong nde plak tangin urang praong, huac sang ging jaleih di tuk halei oh thau, nan ye anait Xuân brei ba pandap panda tagok sang gah angaok.“Gah padang ngak hu tame sang, thaot labik daning ra-ai, taong yaom saong mbaoh tangin tame harak biên bản blaoh paje. Urang sanya lac ngak salah jalan ye bayar, bo jaik meteh thun ini mai ngak salah blaoh oh mboh thei javap jalei hagait.”

Tui taong yaom tuk camereip di UBND huyện Ninh Sơn, dalam tuk pasiam jalan roya 27 ngak ka 253 baoh sang njauk ra-ai, talah. Dalam nan, xã Nhơn Sơn lac 23 baoh sang saong xã Mỹ Sơn lac 230 baoh sang. UBND 2 xã Nhơn Sơn saong Mỹ Sơn hu rilo mbang tabiak harak ieu dom gah padang ngak pambuak gauk pasang iek, taong yaom khat lahik piah hu jalan pasiam veik ka bhap bini min mbiah tal harei ini bruk bayar jien daong ka bhap bini jeng oh ka hu peih ngak. Ong Nguyễn Thanh Tú, Phaok Chủ tịch UBND xã Nhơn Sơn, huyện Ninh Sơn, tinh Ninh Thuận brei thau: “Tapa suh sah di dom sang rahra, UBND xã jeng rilo mbang hu ngak harak payua, gam haong UBND huyện Ninh Sơn hu ngak bruk haong gah padang ngak, haong po đầu tư ieu taong yaom bruk khut ra-ai saong bayar jien ka dom baoh sang nan. Min mbiah tal harei ini jeng oh ka ngak hu.”

Di mbang taom gaok cử tri xã Nhơn Sơn, huyện Ninh Sơn di harei 5/5/2022, kapul urang Quốc hội tỉnh Ninh Thuận hu panuac ieu Sở jalan mbak Pajeng ba pambuak haong UBND huyện Ninh Sơn samar ngak bruk haong mBan khik ramik dự án 8 di Tổng cục jalan mbak Việt Nam saong gah padang ngak lac Cty Cổ phần Tập đoàn Đông Đô brei hu trách nhiệm saong hu jalan bayar jien ka rahra tui panuac sanya haong karja palei./.

Lang sap: Mousa Phương – 17/05