Mai tal sang bac Tiểu học Nhơn Sơn B, xã Nhơn Sơn, huyện Ninh Sơn, tỉnh Ninh Thuận, kol dahlak mboh bruk pato patagok sap Việt ka anek saih tal 1 biak tani tanat, biak siam mekre. Thun bac anak tal, dalam sang bac hu 72 anek saih tal 1, taong abih jeng lac anek kamuan di urang bangsa takik. Anai gru Phan Thị Thanh Giang, Phaok Hiệu trưởng Sang bac Tiểu học Nhơn Sơn B brei thau: meng akaok bilan 8/2023, sang bac hu pambuak bruk haong karja dom palei pathau khan angaok loa truyền thanh saong nao tal yaok baoh sang jak ba amaik ame ba uranaih tal bac 1 mai sang bac piah bac sap Việt dahlau di tuk peih thun bac 2023-2024. Tapa pathau khan, jak ba, tal urak ini, hu 50 anek saih mai bac di 2 tal bac. Dom anek saih ka oh mai bac lac kayua daok tui amaik ame nao ngak mbang atah. Amaik ame likau adat brei ka anek hu padeih bac mbiah tal harei peih thun bac bahrau meng ba dom adei mai palei bac veik. Langiu di pato patagok sap Việt dalam tuk hè, tui jalan lac “taong abih kayua anek saih anit ranam”, dalam thun bac, sang bac daok hu pato pasram, patagok bruk pato sap Việt ka anek saih 2 mon sa adit.

Hu mbaok tame bac dom mon bac patagok sap Việt, anek saih hu dom cei gru, anai gru tacei jalan ieu angan dom pandap jaik haong raidiuk yaok harei tapa dom thaot binguk, pandap pato bac trực quan, chreih chrai, ngak randap haong bruk pandar tapuk bac ta-a, dom kadha bac dalam tài liệu “Adei ndom sap Việt” tal 1. Gru pato jeng ba mbuan lagaih ka anek saih ndom biai nao mai meng sap Việt; tacei dom adei jalan pan but kalam, jalan pandar bảng sit, tani tanat labik daok, labik bac... Anai gru Bùi Thị Anh Vui, gru pato di sang bac Tiểu học Nhơn Sơn B brei thau: Jaik abih dom anek saih lac anek bhik di bhap bini bangsa takik, daok di sang ndom biai meng sap di bangsa drei, nan ye tuk nao bac, dom adei thau sap Việt biak takik, hu dom anek saih ndom biai sap di bangsa drei dalam dom mon bac. Kayua yau nan ye, dalam tuk pato, dom gru brei pablak tame dom kadha me-in pambuak tal bruk ndom biai nao mai atau tapa dom pandap pato bac trực quan daong ka dom adei sram ndom biai, sram pang saong ndom biai nao mai meng sap Việt. Tapa nan hu daong ka dom adei thau saong kanal bài học siam jang.

Duah thau dalam jang kol dahlak hu thau lac, bruk peih pato bac patagok sap Việt ka uranaih mầm non, anek saih Tiểu học bhum bangsa takik dalam tỉnh Ninh Thuận hu peih tabiak meng thun 2016 tal thun 2020 tui Sarak ka 1008/QĐ-TTg di Thủ tướng Rajaei ka jalan daok kuhria ngak di UBND tỉnh. Jaik abih dom uranaih mầm non, anek saih tiểu học bhum bangsa takik di tỉnh mai bac jeng hu pato sap Việt lagaih haong yaok umo thun, taong abih dom sang bac hu padang jalan ngak saong peih ngak catang, hu kein laba danak dak “Patagok kuhria caga sap Việt ka uranaih mầm non saong anek saih tiểu học bhum bangsa takik tukvak 2016-2020, patui jalan tal thun 2025”.

Piah paglaong bruk pato megru bhum bangsa takik, UBND tỉnh Ninh Thuận brei ngak danak dak “Paglaong chất lượng pato megru bhum bangsa takik, bhum ceik, bhum biak kan kandah di dalam tỉnh, meng thun 2021-2025, patui jalan ngak tal thun 2030” saong jalan kuhria peih ngak danak dak “Patagok kuhria caga sap Việt ka uranaih  mầm non saong anek saih tiểu học bhum bangsa takik mbang II (meng thun 2021 tal thun 2025) meng sap bangsa drei di uranaih daok dalam tỉnh”. Tacei pato, peih ngak dom Sarak saong jalan ngak angaok nan di UBND tỉnh, Sở Pato Megru Ninh Thuận tacei pato Akaok jabat pato megru dom huyện, ban ba tabiak dom jalan ngak piah caga siam bruk pabak sap Việt ka uranaih bangsa takik dahlau di tuk peih thun bac bahrau 2023-2024; khik ka taong abih dom labik pato pakai peih bruk pato sap Việt ka uranaih mầm non saong anek saih tiểu học bhum bangsa takik ka uranaih mầm non saong anek saih tiểu học bhum bangsa takik, tui kajap dom jalan ngak piah padang jalan tacei pato peih ngak dom bruk patagok sap Việt di UBND tỉnh dahlau di tuk peih thun bac bahrau.

Dom harei ini, dom sang bac tieu hoc bhum bangsa takik dalam tỉnh Ninh Thuận daok peih bruk pato bac patagok sap Việt ka anek saih tal 1 piah ka dom adei khang hatai yam tame thun bac bahrau, kham merat ngak hu salah, siam danak dak tal bac, tapa nan rik daong praong dalam bruk paglaong chất lượng pato megru bhum bangsa takik saong bhum ceik, jeng yau ka abih labik dalam tỉnh./.