Saai Trương Quang Bôn, urang lambaok vakil ka trang trại PT Farm (xã Mỹ Sơn, huyện Ninh Sơn) brei thau lac, bein taneh trang trại praong 1 ha pala tamakai halam dalam sang jal halam, phun jien buh tame tuk akaok meti pala 1 sào tamakai halam meng 400 – 500 triệu đồng. Kuhria mboh yaok akaok 1 sào pala hu labaih 3.000 pakuang haong dua janih pajaih tamakai halam hu pala rilo abih lac TL3 saong ML 238. Yaok phun tamakai halam pala di dalam yaok baoh pakuang hu ngan saong kanduh brui phun li-u hu mada pabu thu blaoh, daong ka phun plaih anek jit hareik hrom njom palai phun pala.

Piah phun li-u hu cak rok lagaih jeng ye tamuh tagok samu gauk, ia, khak jeng brei nduac eng tui jalan pruh ia hasit hasit tui ilamu Israel tal yaok gar phun tamekai. Saai Bôn brei thau lac: “Bruk pala tamakai halam dalam sang pacang kreih pandar tui jalan pruh ia pa-njaoh hasit hasit daong ka drei patak pataom hu ia pruh, ka dua daong brei pandar takik urang ngak, yang ka klau drei meda pala hu luac thun, mayah pala di langiu ye hu 2 mbang dalam thun daok ngak yau ini drei meda pala hu 4 vụ yaok thun”.

Saai Dương Đình Hiển, po bein taneh trang trại Ngọc Hiển (di xã Lương Sơn, huyện Ninh Sơn) brei thau lac, trang trại daok pambuak haong Cty pala 27 ha kruac njak oh hu asal tui tanut GlobalGAP, yaok ha baoh kruac buh jien tame labaih 200 triệu đồng. Phun kruac njak di trang trại hu pala tui lubang, ngan haong tanut pala lac 400 phun sa ha saong hu parabha jeng lubang piah mbuan iek glang, lagaih dalam bruk ba jamraik tame ngak. Phun kruac njak oh hu asal brei baoh luac thun, labaih 20 harei paik baoh sa mbang, yaok mbang paik hu meng 4-15 tấn baoh.

Masa blaoh tapa, tỉnh Ninh Thuận hu pandar rilo sarak brei pachreih, daong ba dom labik, doanh nghiep, hợp tác xã jhul khang bruk pandar ilamu công nghệ glaong. Tal urak ini, Ninh Thuận pachreih hu 31 danak dak ngak nong pandar ilamu công nghệ glaong ba tame ngak hu 18 danak pala drak, 3 danak dak raong glang, 8 danak dak ngak raong pala kaya dalam ia, 2 danak dak ngak pandap kaya nong. Langiu di nan, tỉnh urak ini hu mblang taneh ngak nong pandar công nghệ glaong lac 260 ha, tui jalan ba tabiak tal thun 2025 meda patagok mblang taneh ngak tagok labaih 1.000 ha.

Ngak nong pandar ilamu công nghệ glaong ieu lac sa dalam di dom jalan ngak siam lagaih di abih piah pataom prein yava cak rok patagok, Ninh Thuận ba tabiak jalan ngak lac thun ini ba jalan ngak patagok yaom glaong di gah ngak nong meng 4-5% sa thun, dalam nan, jalan patagok yaom ngak nong pandar ilamu công nghệ glaong mek hu 30-40% dalam sa thun. Peih praong taneh ngak nong pandar công nghệ ilamu glaong lac 500 ha ngan haong yaom ngak tabiak labaih 700 triệu đồng/ha.

Ninh Thuận jeng meda brei ngak dahlau bruk pachreih urang ngak mbang blei salih di langiu tỉnh hu mbaok tame ngak nong pandar công nghệ ilamu glaong; daong peih meng 1 tal 2 doanh nghiệp ngak nong hu pok brei angan lac doanh nghiep ngak nong pandar công nghệ ilamu glaong; hu takik di nyu lac 20 danak dak ngak nong pandar công nghệ ilamu glaong ngak bruk hu siam lagaih. Brei ngak dahlau bruk cak rok patagok pambuak gam haong bruk peih praong darak pasar duah jalan pablei tabiak ngan haong dom pandap panda kaya ngak nong hu angan je, hu pala rilo di dalam tỉnh saong ieik meng anak tal bruk pablei tabiak negar langiu piah patagok yaom glaong di bruk ngak mbang, pala drak.

Ong Lê Huyền, Phó akaok UBND tỉnh Ninh Thuận brei thau lac, Ninh Thuận daok brei pakhang bruk pasiam gah ngak nong, bruk praong di abih ieu  lac patagok bruk ngak nong pandar công nghệ ilmu glaong pambuak gam lek ekonomi kinh tế số, pasalih lek tui jalan ilamu bahrau, peih ngak gam, ieik nyu yau jalan ngak bahrau, ngak njauk bruk, ieu lac piah cak rok patagok bruk ngak mbang.

Piah ngak hu dom bruk nan, Ninh Thuận hu ba tabiak 9 nyaom bruk ngak saong jalan langyah piah peih ngak, gam tui di nan jeng buh tabiak jaik 7 tỷ đồng daong ka 10 danak dak hu mbaok tame buh jien tame patagok bruk ngak nong pandar công nghệ ilamu glaong di dom gah pala drak saong raong glang di dom bhum palei. Tỉnh jeng brei ngak dahlau abih dom bruk dom janih kein laba khang piah karo peih ngak samar drah bruk salih lek, ba gah ngak nong pandar công nghệ ilamu glaong dak harei dak jeng siam lagaih hu makna kein laba di dalam bruk patagok kinh te ekonomi di palei pala./.