Sa-ai Nguyễn Thị Minh Anh daok di xã Công Hải, huyện Thuận Bắc brei thau, dahlau daih, sa-ai ngak công nhân ka sa  xí nghiệp jhik daok di TP.HCM saong meng tuk jit COVID-19 tamuh khang di thun 2021, sa-ai mai veik palei. Sa-ai nao duah bruk ngak lagaih haong bruk di drei saong patuah lac kreh thun 2022 hu doanh nghiệp di labik ngak kong Du Long pilih ruah urang ngak bruk jhik: “Tame ini jeng likau ngak công nhân. Meng tuk tame ini jeng hu tapa tal pato pakai saong urak ini adei ngak siam bruk di 1 urang ngak, nan ye adei hu gah angaok pato pasram pok tagok ngak tổ trưởng dalam chuyền jhik pak ini. Min oh ka gheih rilo nan ye adei daok kham merat bac megru. Caong lac Cty hu tani tanat piah ka raidiuk di urang ngak yau adei hu siam mekre jang.”

Sa-ai Lê Kim Yến Châu daok di xã Bắc Phong, huyện Thuận Bắc jeng bui sambai tuk hu ngak bruk pak palei di drei, bruk ngak tani tanat saong oh daok nao atah sang. Tapa 3 bilan bac bruk, tal urak ini, sa-ai Châu hu tame ngak bruk dalam dây chuyền jhik công nghiệp: “dahlau daih adei jeng ngak rilo bruk saong salih bruk gam gam kayua raidiuk. Tuk tame cty ini, dom quản lý tacei pato abih hatai jai. Dom bruk drei ka oh thau, drei tangi sua dom sa-ai tacei pato abih hatai jai piah ka drei hu tangin ngak gheih jang, ngak bruk siam jang.”

Thun 2023, Cty cổ phần Sản xuất saong đầu tư Hoàng Thành Đô Lương daok kuhria pato pakai bruk jhik ka 1.000 tal 1.500 urang ngak. Ong Phan Văn Tiến, Yam ndok Sản xuất saong pato pakai di Cty brei thau: “Dalam tuk bac, sang mac jeng hu daong jien bilan, lisei huak var jala ka urang ngak. Kol dahlak kham merat ba dom ilamu siam di abih saong dom jalan ngak kein laba di abih piah daong ka urang ngak samar bac tamat khoá bac di drei saong hu tangin gheih ngak glaong, hadei ini ngak bruk jeng hu jien bilan glaong.”

Ong Phạm Trọng Hùng, akaok UBND huyện Thuận Nam, tỉnh Ninh Thuận brei thau, tuk hu labik ngak kong, urang ngak palei pala hu pato bruk ngak, hu bac bruk ngak piah hu bruk ngak saong hu jien mek tame tani tanat. Huyện jeng iek praong bruk pato bruk ngak piah daong ka urang ngak pasiam raidiuk: “Jalan pato pakai bruk ngak ka urang ngak palei pala dalam huyện thun bloh saong dom thun anak tal, hu pato bruk ngak piah pabak menuac ngak ka labik ngak kong, rilo meng lac bruk jhik saong menyim. Ta-eng thun 2022 pato pakai labaih 600 urang ngak saong dom urang ngak hadei di bac blaoh, lac hu bruk ngak chip. Thun ini, huyện daok pato bruk ngak ka urang ngak palei pala gah ngak kong.”

Tui Sở LĐTBXH tỉnh Ninh Thuận, meng thun 2010 tal harei ini, hu labaih 45.000 urang hadei di tuk bac blaoh, hu bruk ngak di dom labik ngak kong, tiểu thủ công nghiệp, dịch vụ dalam tỉnh haong jien bilan tani tanat. 

Ong Trần Trung Dũng, Phaok Hiệu trưởng sang bac Cao đẳng nghề Ninh Thuận brei thau, sang bac gam gam peih tal pato dom bruk langiu bruk ngak nong. Yaok thun, sang bac jeng hu pambuak bruk haong dom Cty peih pato pakai paglaong tangin gheih ngak ka urang ngak. Doanh nghiệp biak hu trách nhiệm haong labik pato bruk ngak saong urang ngak. Tuk sang bac pilih ruah urang tame bac tui panuac caong di doanh nghiệp, urang bac hu doanh nghiệp daong 1 triệu đồng 1 urang 1 bilan. “Thun 2023 ngan saong urang ngak bruk jhik, meng quý 1 kol dahlak hu peih 2 tal haong 49 urang bac bruk jhik công nghiệp sơ cấp, bac dalam 3 bilan. Kol dahlak hu pambuak bruk meng tuk pilih ruah, tuk urang ngak tut angan ye cty jeng hu phỏng vấn, hadei di nan brei tut angan bac bruk. Tuk bac tamat blaoh, dom adei hu Cty ba tame ngak bruk.”

Dom thun tapa, tỉnh Ninh Thuận hu peih yaok ratuh tal pato bruk ngak ka urang ngak palei pala yau ye: jhik công nghiệp, chế biến kaya ikan, dịch vụ. Meng nan, ba bruk hit ngak mbang saong jien bilan tani tanat ka yaok pluh rabau urang ngak di bhum palei pala, abih di nyu lac bộ đội xuất ngũ, dam dara, urang kumei kan kathaot, urang likei bhum bangsa takik../.