Ninh Thuận peih bruk klauk mbang 4 vắc xin Covid 19

Sang iek ruak Đa khoa Ninh Thuận lac labik peih tabiak bruk klauk mbang 4 vắc xin pacang jit Covid 19. Meng vắc xin hu Sở Y tế parabha brei 1.800 mbang, meng akaok bilan 6/2022, Sang iek ruak hu taduan raok dom menuac umo meng 50 thun tagok, urang umo meng 18 thun tagok trun prein miễn dịch saong urang umo 18 thun tagok daok dalam kapul mbuan njaom mbak glaong haong Covid 19, lac; urang jakar y tế, urang jakar di labik pacang jit praong, abih di nyu nan lac urang ngak di dom labik ngak kong daok ngak bruk dalam labik mbuan njaom mbak piah klauk vắc xin mbang 4 pacang jit Covid 19. Amuk Cao Thị Thanh, palei Lương Cang, xã Nhơn Sơn, huyện Ninh Sơn lac sa dalam dom urang taha praong thun hu klauk camereip abih, brei thau:“Urak ini dahlak taha ye saong jeng hu ruak dalam rup, dahlak klauk hu 3 mbang vaccine bloh. Urak ini sang iek ruak daong palagaih brei klauk mbang 4, ye drei klauk ka rup di drei hu siam.”

Lac menuac dalam rup hu ruak gan saong ruak me-ik saradang, yaom lac hu klauk ginup 3 mbang vắc xin pacang Covid 19 min tuk hu panuac khan di Sang iek ruak Đa khoa Ninh Thuận ka bruk peih klauk pabak mbang 4; sa-ai Bà Râu Đến daok di xã Phước Hà, huyện Thuận Nam hu pasang iek prein yava dahlau piah klauk vắc xin Covid 19, daong ka sa-ai sahanang hatai pacang jit.“Kayua jit ruak covid nan ye dahlak hu klauk mbang ka  3 bloh ye. Kayua dahlak hu rilo ruak dalam rup, tuk sang iek ruak hu pathau khan brei bhap bini thau bruk klauk mbang 4, dahlak tame klauk mbang 4 piah khik kajap prein yava ka rup di drei.”

Urak ini, kayua bhap bini oh ka thau cambaih bruk peih klauk mbang 4 vắc xin Covid 19 nan ye menuac mai klauk daok takik. Tui Bác sỹ Đàng Tấn An – Trưởng Khoa Khám bệnh, sang iek ruak Đa khoa Ninh Thuận, bruk klauk ginup 4 mbang vắc xin Covid 19 hu daong ka menuac sia pacang ruak hu siam, bo ini daok lac jalan piah ka Ninh Thuận ngak jeng miễn dịch bhap bini. “Bruk klauk mbang 4 hu makna biak praong, nyu ngak brei tagok prein pacang caga ruak piah khik caga rup drei, khik caga ka rahra. Dom urang praong thun hu ruak dalam rup, meyah hu klauk mbang 4 ye biak siam piah khik caga rup drei. Ngan saong dom urang praong thun hu ruak dalam rup ye hu makna biak praong kayua nyu tagok prein pacang ruak. Meyah njauk ruak ye takik ba tal trak. Nan ye drei njauk klauk jru.”

Dalam mbang ini, Ninh Thuận hu Mintri Y tế parabha brei 32.760 mbang vắc xin Covid 19. Dalam nan, ban Phan Rang – Tháp Chàm lac labik hu parabha brei rilo di abih, lac 13.800 mbang. Hu thau, dalam tỉnh Ninh Thuận hu 82.900 urang hu klauk brei dahlau mbang klauk ka 4 vắc xin Covid 19.  Sang iek ruak Đa khoa tỉnh meda peih bruk klauk jru dalam mon ngak bruk meng harei som tal harei suk dalam adit./.

Urang lang: Mousa Phương – 17/06