Dom adei anek saih hadei di klauk jru blaoh mboh prein yava oh hu hagait karei

Piah ka bruk klauk vắc-xin pacang Covid-19 ka uranaih umo meng 5 tal ala 12 thun hu siam mekre; Pasak y tế huyện Ninh Phước hu padang 3 kapul cấp cứu, 3 kapul klauk jru nao tapak tal dom sang bac THCS dalam huyện. Dom labik klauk jru nan jeng hu radaih cứu thương saong hu dom bác sỹ, điều dưỡng piah khám sàng lọc saong tui iek pren yava dom adei dalam tukvak klauk jru.

Bác sỹ Nguyễn Hiếu – Phaok Yam ndok Pasak y tế huyện Ninh Phước, Ninh Thuận lac: “Pasak y tế Ninh Phước padang hu 3 kapul nao klauk jru di dom sang bac…”

Di labik nao klauk vắc xin pacang Covid-19 ka uranaih umo meng 5 thun tal ala 12 thun di sang bac THCS Đổng Dậu di xã Phước Thái, jaik 100 adei anek saih tal 6 hadei di klauk jru blaoh mboh prein yava oh hu hagait karei. Oh hu urang halei hu phản ứng langiu di caong khin, tok hu dom phản ứng njuan di labik.

Adei Đổng Thùy Uyên Trân anek saih tal 6/2 – Sang bac THCS Đổng Dậu, huyện Ninh Phước, Ninh Thuận brei thau: “Harei ini klauk blaoh vắc xin Covid-19…”

Tal urak ini, huyện Ninh Phước, tỉnh Ninh Thuận hu ngak salah bloh bruk klauk vắc xin pacang Covid-19 ka 1.550 anek saih, rilo meng lac anek saih tal 6. Dalam nan, anek saih bangsa Cam lac 850 adei. Bruk nao klauk jru tal labik dalam huyện Ninh Phước hu peih ngak meng sang bac ini tal sang bac daih saong tui bruk jit ruak jeng yau tui vắc xin hu brei pabak brei. Ong Ngô Khánh – Phaok akaok UBND huyện Ninh Phước, Ninh Thuận khan lac:  “Dalam tukvak peih ngak, UBND huyện Ninh Phước hu tacei pato ka Pasak y tế saong Jabat Pato megru njauk khik siam pren yava ka dom anek saih. Abih di nyu lac dom adei umo meng 5 tal 8 thun. Hadei di tuk klauk blaoh, brei ka dom adei padeih sa harei piah khik siam pren yava. Hadei di nan, kakei dom amaik ame tui iek dom adei dalam 28 harei. Hadei di nan, meng brei ka dom adei gilac veik sang bac.”

Meng jhul khang bruk pathau khan, brei ka anek saih saong dom amaik ame thau ka dom kein lagaih di bruk klauk vắc xin pacang Covid -19 nan ye dom amaik ame njauk hatai brei ka anek di drei klauk vắc xin pacang caga Covid-19 biak glaong. Tui Bác sỹ Nguyễn Đình Ngọc, Phaok Yam ndok Pasak pasang iek jit ruak tỉnh Ninh Thuận: uranaih brei hu tui iek 30 minit hadei di klauk jru; dalam 3 harei akaok mereip hadei di klauk jru, uranaih brei hu urang prong tui mong iek saong samar mboh dom kadha oh siam meyah hu. Bác sỹ Nguyễn Đình Ngọc- Phaok Yam ndok Pasak pasang iek ruak kik tỉnh Ninh Thuận kakei lac: “Sa kadha prong tuk peih bruk klauk jru ka uranaih umo meng 5 tal 12 thun lac khaol drei njauk caik hatai hadei di tuk klauk jru ye brei takik nao mai, nduac me-in. Kayua yau nan ye, caong khin dom anai gru, cei gru, dom amaik ame kakei dom anek saih takik nduac ma-in dalam harei akaok mereip piah ka khaol drei tui iek hu hagait halei oh hadei di tuk klauk jru blaoh  ..”

Klauk vắc xin pacang caga Covid-19 ka uranaih lac bruk njauk ngak, ba mai rilo siam lagaih piah khik caga ka uranaih. Tapa rilo mbang tamuh jit mboh lac, vắc xin oh pacang caga hu abih bruk njaom mbak, min nyu daong patrun bruk ba tal ruak trak. Kayua yau nan ye, piah khik caga ka uranaih, dom amaik ame njauk brei ka anek di drei klauk jru avar piah khik hu siam mekre salamat tuk dom adei tame sang bac./.

Urang lang: Jasi – 10/05