Dalam tỉnh Ninh Thuận hu 179 labik hu pilih ruah mẫu pasang iek di 37 xa dalam 7 huyện, ban, ngan haong jaik 6.000 baoh sang hu pilih ruah piah sua tangi, pataom mek khau tin. Dalam nan, huyện Ninh Phước lac labik hu pataom mek khau tin rilo abih, ngan haong jaik 1.200 sang. Ong Nguyễn Văn Hưởng, Akaok Cục yaok pataom Ninh Thuận brei thau: “Meng di tuk peih pasang iek, kol dahlak jeng hu parabha urang pasang iek pakat huyen saong pakat tinh trun haong urang pasang iek piah maong dom urang ini sua tangi. Maong iek bruk ngak piah samar ramik veik habar piah daong ka urang pasang iek  mboh labik labaih kurang piah ngak pasiam veik. Kayua yau nan ye bo daong bruk pasang iek dom baoh sang patui di nan hu dom mbuan lagaih. Tal tukvak ini, kol dahlak  mboh lac  dom urang pasang iek thau cambaih ilamo ngak bruk.

Di huyện Thuận Bắc, abih tih dom baoh sang hu pasang iek 53 bangsa lac 970 baoh sang, parabha ka 5 xã. Dom urang pasang iek lac 15 urang, tui kuhria 1 urang pasang iek 60 baoh sang, pasang iek di mangaok phone par tangin.  Lac urang pasang iek di palei Bà Râu, xã Lợi Hải, huyện Thuận Bắc, saai Katơr Thị Em brei thau jaik abih mikva Raglai di palei jeng thau sap Yuan min dalam tuk pataom mek khau tin, dom urang pasang iek jeng pandar panuac Raglai langyah veik piah ka mikva thau cambaih jang, pabak khau tin samar drah jang saong tantu jang.

 “Mikva daok pak ini ngak hamu saong ngak kong ty rilo nan ye bruk pasang iek rilo abih lac di tuk melam. Drei brei pagun sanya urang dahlau piah ka urang rami ramik tukvak saong sua tangi”.

Piah ngak hu dom bruk ba tabiak, tỉnh Ninh Thuận hu jak ba 122 urang pasang iek, pataom mek khau tin ka bruk kinh tế - xã hội di 53 bangsa takik thun 2024. Bruk pandar kong nghe khau tin hu peih ngak di abih tih dom bruk, meng bruk padang ngak labik, jalan taom gaok baoh sang rahra tal bruk sua tangi, pabak khau tin tantu cambaih laih. Meng nan, daong ka mikva thau hu quyền lợi haong bruk ngak di drei dalam bruk pabak khau tin ginup, cambaih laih, samar drah ka urang pasang iek. Amuk Zac Thị Vui, daok di palei Bà Râu, xã Lợi Hải, huyện Thuận Bắc ndem lac:

 “Harei ini, kapul di tinh mai yaok pataom ye  puk palei jeng pabak khau tin ka Cục yaok pataom. Dom baoh sang hu pilih ruah ye pabak khau tin ka nyu tantu cambaih laih jang pambuak tal bruk cak rok patagok kinh te di bhum bangsa takik”.

Meng ngak siam bruk caga dahlau, abih di nyu lac iek praong bruk pathau khan nan ye bruk pataom mek khau tin di dom puk palei pak tỉnh Ninh Thuận daok taduan hu bruk pambuak gauk biak siam di rahra. Saai Ka Tơr Thị Nương, daok di palei Bà Râu, xã Lợi Hải, huyện Thuận Bắc khan lac:

“Adei jeng hu mbaok tame tal pasram saong hu parabha tal dom baoh sang piah mek khau tin  habar ka nyu njauk. Dalam tuk mek jhau tin, kan kandah di abih lac nao  var page oh hu thei saong bier harei meng hu manuac daok di pasang. Drei  ngak meng bier harei tal melam”.

Tui amuk Nguyễn Như Ngọc, Cục pataom mek khau tin – Tổng Cục Yaok pataom, Ninh Thuận lac tinh hu biak rilo urang bangsa takik saong hu rilo janih ilamo, hu bruk ngak mbang jeng karei di gauk. Nan ye, bruk pasang iek ini brei tantu cambaih laih di abih, Yau ye  bruk sua tangi oh suan ngan haong jalan pasang iek. Meng nan, dom khau tin pataom mek hu tantu, samar drah piah pabak ka bruk padang ngak sarak di Ndang saong Kanja ka KTXH saong dom bruk pambuak tal 53 bangsa takik di Viet Nam.

Ini lac mbang ka 3 peih bruk pasang iek, pataom mek khau tin di 53 bangsa takik hu peih ngak di dalam taneh ia hadei di 2 mbang pasang iek di thun 2015 saong 2019. Dut saong 5 thun dahlau, mbang pasang iek ini hu taong yaom lac praong jang saong siam jang. Meng bruk pasang iek, lac jalan piah padang ngak sarak cak rok patagok kinh tế - xã hội bhum bangsa takik saong bhum ceik tukvak 2026 - 2030./.