Ini lac var bac camereip abih di dom adei anek saih bangsa Cam Sang bac Tiểu học Bỉnh Nghĩa, xã Bắc Sơn, huyện Thuận Bắc dahlau di tuk yam tame tal 1. Piah daong dom adei ndom puac cambaih sap Việt, sang bac hu brei yaok tal bac hu 4 gru pato. Dalam nan 1 gru pato tal 1 saong 3 gru di dom khối lớp karei mai daong pato pasram bruk pandar sap Việt. Anai gru Phạm Thị Phượng Uyển, Sang bac Tiểu học Bỉnh Nghĩa, huyện Thuận Bắc, tinh Ninh Thuận lac:

"Sang bac brei meng 4 tal 5 gru pato mai daong ye dom gru parabha anek saih tabiak. Yaok anai gru pato meng 4-5 adei ye bruk thau sap Việt di dom adei hu mbuan lagaih jang tuk drei tame bac biak".

Ong Đạo Minh Họa daok di palei Bỉnh Nghĩa uan tabuan brei thau, dom cei gru anai gru abih hatai pato dom adei bac, vak sap Cam. Ong Họa lac: "Anek saih pak ini lac anek kamuan di urang Cam....’’

Anek saih tal 1 bhum urang bangsa takik daok takik thau sap Việt, nan ye dom gru pato jeng patagok bruk pato sap Việt tapa dom kadha ma-in, daoh tamia saong pandar dom harak gar, pandap pato bac piah daong dom adei khang hatai jang dalam bruk pandar sap Việt. Anai gru Phạm Thị Hồng Kim, Sang bac Tiểu học Bỉnh Nghĩa khan lac: "Bahrau tame ye dom adei ka oh vak hu. Pan but jeng kandah kandaiy. Nan ye njauk pabak parilo gru pato vak, pato bac ka dom adei. Tuk tame bac ye dom adei takik glaih glar jang. Bahrau tame dom adei oh ka thau vak nan ye sang bac brei patagok parilo gru pato mai daong dom adei vak, pasram bac saong patagok bruk ndom menyai sap Việt ka dom adei’’.

Urak ini, di Ninh Thuận taong abih dom sang bac tiểu học hu rilo anek saih lac anek bhik urang bangsa takik jeng hu pato sap Việt ka anek saih dahlau di tuk tame tal 1. Amuk Lê Thị Mỹ Liên, Akaok Jabat Pato Megru huyện Ninh Phước brei thau, ini hu maong lac bruk caga dahlau njauk ngak piah daong dom adei yam tame thun bac bahrau.

"Taong abih dom sang bac dalam huyện Ninh Phước ye dom cei gru anai gru di tal 1 jeng pataom tame patagok sap Việt piah dom adei thau hu dom ilamu cơ bản, piah pang, ndom, bac habar ka dom adei hu mbuan lagaih tuk yam tame tal bac 1".

Ong Nguyễn Anh Linh, Phaok Yam ndok Sở Pato Megru tỉnh Ninh Thuận brei thau, thun bac 2024- 2025, Ninh Thuận hu labaih 150 rabau anek saih di dom pakat bac, dalam nan anek saih tal 1 hu labaih 12.600 em. Di dom sang bac bhum urang bangsa takik, anek saih hu khan brei thau lac tame dahlau harei peih thun bac meng 2 tal 3 adit piah ka dom adei ngak randap haong sap Việt. Dalam tukvak nan, dom adei hu pato pasram pang, ndom, bac, vak sap Việt.

 "Brei caga sap Việt ka anek saih bangsa takik dahlau di tuk tame tal 1. Ini lac bruk biak praong. Mintri Pato Megru hu patagiak Thông tư 23 piah peih ngak. Urak ini, dom sang bac di bhum kan kandah jeng hu peih dom tal pato sap Việt ka anek saih dahlau di tuk tame tal 1 dalam 2 adit. Kol dahlak hu ieu pataom dom gru pato, abih di nyu lac gru pato tal 1 dalam thun bac bahrau dang pato ka dom adei. Kol dahlak jeng padang bruk ngak randap haong sap Việt tapa ndom biai nao mai, tapa pato pakai  piah daong ka dom adei thau sap Viet piah tuk yam tame tal 1 hu mbuan lagaih.’’

Piah paglaong siam mekre di bruk pato saong bac, abih di nyu lac bruk pato sap Việt ka anek saih akaok pakat bac, Sở Pato Megru Ninh Thuận daok buh jien padang ngak saong blei dom pandap bac ta-a ka dom labik pato bac di bhum urang bangsa takik, gam haong nan, patagok bruk pathau khan, jak ba anek saih tame bac, abih di nyu lac anek saih tal 1/.