Tỉnh Ninh Thuận daok pataom tame ngak salih bahrau jalan ngak piah paglaong năng suất, chất lượng di sara

Dom thun dahlau daih, urang ngak sara di Ninh Thuận rilo meng ngak sit sot, ngak meng tangin takai tui jalan njuk ia tasik tame hamu piah ka sara pataom veik mangaok haluk. Meng jalan ngak ini, yaom lac patak pataom hu phun jien buh tame ngak, min sara mangaok haluk bhian meluk hagait karei, sara oh siam, pablei oh hu yaom. Mboh hu bruk oh lagaih nan, karja palei hu pachreih ba, daong ka mikva ngak sara jhul khang bruk pandar ilamu - kỹ thuật tame bruk ngak, padang dom HTX, kapul pambuak bruk piah daong ka urang ngak sara dalam bruk pabak pandap piah ngak, blei veik abih sara ngak hu.

Urang ngak sara angan Mai Ngọc Minh daok di xã Phương Hải, huyện Ninh Hải brei thau, sang daok ngak 1,5ha hamu sara, sara mangaok haluk 7 harei mek hu sa mbang, sa bilan mek hu meng 90-100 tấn sara, yaom sara pablei ka HTX lac 700 tal 900 đồng sa kg, hadei di tuk kaoh abih phun jien buh tame ngak, daok laba hu 55 triệu đồng.

Urak ini dalam xã Phương Hải, huyện Ninh Hải hu labaih 90ha hamu sara, HTX daok pambuak bruk, blei sara di labaih 40 sang haong mblang hamu sara labaih 40ha, yaok bilan hu meng 2.000 tal 3.000 tấn sara. Dahlau daih, thei blei ye mikva pablei, urak ini hu HTX blei yaom tani tanat. Langiu di nan, HTX daok hu daong phun jien ka mikva peih praong mblang hamu ngak sara mekre.

Piah paglaong yaom asar sara, rilo mikva ngak sara daok salih jalan ngak, buh jien blei bạt tauk, ngak bingun pandar ia nyar, peih praong taneh ngak sara tauk bạt. Yaom jien buh tame tuk camereip ka 1 sào (1.000m2) sara tauk bạt lac mangaok mala 100 triệu đồng. Yaok mbang ngak sara tauk bạt dui atah meng 7-10 harei, ginup tukvak ka ia tasik khang jeng sara mbong patih, thu, mekre.

Tui Sở Ngak nong saong patagok palei pala tỉnh Ninh Thuận, dalam 6 bilan thun ini, abih tih taneh ngak sara di tỉnh lac labaih 3.000 ha. Abih tih sara mek hu lac labaih 195.000 tấn, samu 55% bruk ba tabiak. Urak ini, yaom sara ngak mangaok haluk meng 600-900 đồng sa kg, sara tauk bạt meng 1.000 tal 1.200 đồng sa kg.

Tui danak dak patagok gah sara di Rajaei, tal thun 2030 Ninh Thuận meda lac labik dang akaok gah ngak sara di taneh ia, ngan saong taneh ngak sara praong abih tih 3.267 ha, saong sara mek hu mangaok 650.000 tấn; dalam nan, sara công nghiệp jaik 550.000 tấn.

Ong Trương Khắc Trí, Phaok Yam ndok Sở Ngah nong saong patagok palei pala tỉnh Ninh Thuận brei thau, piah ngak hu bruk ba tabiak, tỉnh brei padang veik bruk ngak, labik ngak, paglaong prein ngak sara tapa jhul khang bruk pandar jamriak, ba brei ilamu công nghệ bahrau dalam bruk ngak sara. Buh jien blei jamriak ngak di dom mblang hamu sara, pato pasram ilamu ngak sara chất lượng glaong ka urang ngak sara, daong phun jien ka urang ngak sara salih tapa ngak sara công nghệ tauk bạt di mangaok haluk sara piah hu sara siam jang. Gam haong nan, tỉnh ieu da-a dom urang đầu tư padang sang mac ngak sara, ngak hóa chất hadei meng sara di dom puk palei, pambuak haong patagok yaih khan, peih bruk pablei salih dom pandap hadei meng sara piah peih praong darak pasar pablei salih, piah daong khik kajap jalan ngak mbang, paglaong jien mek tame ka urang ngak sara./.

Urang lang: M. Phương – 24/08